Ansa Long Wan Kwestin
◼ ?Hu i mas mekem prea long ol miting blong kongregesen?
Prea blong kongregesen i wan impoten haf blong wosip. Fasin blong toktok long Jeova long nem blong ol narafala i wan nambawan blesing mo wan samting we yumi mas tinghevi long hem. Taswe, ol elda oli mas skelemgud weswan brata i nafgud blong prea long ol miting. Ol brata we oli prea long nem blong kongregesen, oli mas ol Kristin we oli bigman long saed blong spirit, oli soem gudfala eksampel, mo kongregesen i respektem olgeta. Prea blong olgeta we i gat ona mo respek i mas soem se oli gat wan gudfala fasin fren wetem Jeova God. Haf ya “Prea Long Fored Blong Narafala Wetem Hat We i Stap Daon” long Wajtaoa blong Mei 15, 1986 (Inglis), i makem sam impoten rul we i save givhan bigwan long olgeta we oli prea long nem blong kongregesen.
Ol elda oli no mas jusum wan brata we oli save se hem i hafhaf long trutok no oli no sua long fasin blong hem. Oli no mas jusum wan brata we i stap leftemap hem tumas no i wantem yusum prea olsem rod blong soemaot hem nomo. (1 Tim. 2:8) Nating se wan brata we i baptaes i yangfala nomo, ol elda bambae oli faenemaot fastaem sipos hem i kasem ol mak long saed blong spirit blong kam naf blong prea long nem blong kongregesen.—Wok 16:1, 2.
Sam samtaem, long ol miting blong prij, wan sista we i baptaes finis i mekem prea sipos i no gat wan brata we i nafgud i stap. Sista ya i mas kavremap hed blong hem long wan pis kaliko we i stret. Sipos i no gat wan brata we i nafgud i stap blong lidim ol miting blong prij, ol elda oli save jusum wan sista we i nafgud blong lidim grup.
Long miting blong Pablik Tok, brata we i jeaman, hem nao i mas mekem faswan prea. Be, long ol narafala miting blong kongregesen, sipos i gat plante brata we i nafgud oli stap, brata we i lidim ol miting ya i save askem wan long olgeta blong mekem faswan prea mo laswan prea. I gud blong no jusum brata we i givim faswan tok no laswan tok. Long ol taem ya, i gud blong talemaot fastaem long brata we i mekem prea, olsem nao hem i save tingting long wanem we bambae hem i talem. Ale prea blong hem bambae i no olbaot, i kamaot long hat, mo i stret wetem miting ya.
Ol prea ya oli no mas longfala. Taem wan brata i mekem prea long fored blong ol narafala, plante taem, ol man we oli stap lesin oli kasem save long wanem we hem i talem, sipos hem i stanap, toktok wetem voes we i bigwan i naf, mo toktok klia. Long rod ya, olgeta we oli stap lesin oli save harem prea ya mo wetem fulhat blong olgeta, oli talem “!Amen!”—1 Kron. 16:36; 1 Kor. 14:6.