Niufala Program Blong Seket Asembli
Yumi save se i stret nomo blong yumi soem lav long Jeova mo fasgud long hem. Be, wol ya i stap traem blong pulum yumi i gowe, blong yumi no moa holemtaet fasin fren we yumi gat wetem hem. (Jon 17:14) Blong mekem se lav we yumi gat long Jeova i kam strong moa, mo blong yumi gat paoa blong blokem ol samting long wol we i mekem denja long yumi long saed blong spirit, niufala program blong seket asembli long sevis yia 2001 bambae i gat stamba tok ya se: “Lavem God—I No Ol Samting Blong Wol Ya.”—1 Jon 2:15-17.
Dip lav we yumi gat long Jeova i pusum yumi blong tokbaot hem. Nating se i olsem, wok blong prij i no wan isi samting long plante man blong God. Long haf ya se “Lav Blong God i Pusum Yumi Long Minista Wok Blong Yumi,” lanem olsem wanem plante oli winim fasin blong sem mo ol narafala samting we i stap blokem olgeta. Long rod ya oli save joen fulwan long wok ya.
?Olsem wanem ol rabis fasin blong wol ya i stap gat paoa long yumi? Ol fasin we bifo ol man oli talem se i nogud, naoia plante man oli talem se oli gud nomo. Tok ya “Yufala We i Laekem Tumas Jeova, Yufala i No Mas Laekem Nating Ol Rabis Fasin” mo tok ya we i gat tu haf blong hem se “Ol Samting Long Wol—?Wanem Tingting Blong Yumi Long Olgeta?” bambae i pusum yumi blong gat strong tingting blong talem no long ol nogud tingting.
Bambae i gat wan eksampel blong Tiokratik Ministri Skul mo Sevis Miting i stap insaed long program, mo tu wan sotfala stadi blong Wajtaoa blong wik ya. Pablik tok we stamba blong hem se, “?Olsem Wanem Fasin Lav Mo Bilif Oli Save Faet Agensem Wol?” bambae i leftemap tingting blong yumi blong mekem olsem Jisas mo agensem ol traem long wol. (Jon 16:33) Mekem sua blong invaetem ol Baebol stadi blong yu blong kam long asembli. Eniwan we i wantem baptaes i mas talem long presiden elda kwiktaem, blong mekem se hem i save plan from.
Long seket asembli ya, bambae yumi luk weples nao lav blong yumi i mas kam strong moa. Long rod ya yumi save harem gud long ol nambawan blesing blong Jeova. !Yu no mas mestem wan long ol tok ya!