Trutok Long Saed Blong Fiuja
?Samtaem yu stap tingbaot se wanem bambae i hapen long fiuja? Baebol i talem se i no longtaem, sam bigfala samting bambae oli hapen long wol, mo bambae oli kasem olgeta man long wol.
Jisas i talem olsem wanem blong “save se Kingdom blong God i klosap.” (Luk 21:31) Hem i talemaot se bambae i gat ol bigfala faet, graon i seksek, kakae i sot, mo i gat ol sik. Hemia ol samting we yumi stap luk tede.—Luk 21:10-17.
Baebol i soemaot tu se long “ol las dei” we man i rul, fasin blong ol man bambae i kam nogud olgeta. Baebol i tokbaot ol fasin ya long 2 Timoti 3:1-5. Ol samting we yumi luk tede oli soemaot se profet tok ya i stap kamtru.
?Yumi lanem wanem? Yumi lanem se klosap nao Kingdom blong God bambae i mekem laef blong ol man i kamgud. (Luk 21:36) Baebol i tokbaot ol gudfala samting we God i promes blong mekem long wol mo long ol man we bambae oli laef long hem. Hemia sam long olgeta.
GUDFALA KING
‘Nao Olfala ya i putumap [Jisas] i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem. Hem i king we paoa blong hem bambae i stap oltaem nomo, mo rul blong hem bambae i no save finis samtaem.’—DANIEL 7:14.
?I minim wanem? Bambae yu haremgud aninit long gavman we God i putumap mo Pikinini blong hem i rulum.
GUDFALA HELT
“Bambae i no gat wan man ples we i save talem se: ‘Mi mi sik’”—AESEA 33:24, NW.
?I minim wanem? Bambae yu no moa sik o handikap, mo bambae yu laef olwe.
PIS
“Hem i stap mekem ol faet i finis long olgeta ples long wol.”—OL SAM 46:9.
?I minim wanem? Bambae i no moa gat faet, mo bambae ol man oli no moa safa from ol trabol we faet i mekem.
WOL BAMBAE I FULAP LONG OL GUDFALA MAN
“Bambae i no longtaem, ol man nogud oli lus . . . Ol man we tingting blong olgeta i stap daon, bambae oli tekem graon ya i blong olgeta.”—OL SAM 37:10, 11.
?I minim wanem? Bambae i no moa gat ol rabis man, be ol man we oli wantem obei long God nomo bambae oli stap.
FULWOL BAMBAE I KAM PARADAES
‘Man we i wokem haos blong hem, hem bambae i save stap gud long hem. Man we i planem plantesen blong grep, hem bambae i dring waen blong ol grep ya.’—AESEA 65:21, 22.
?I minim wanem? Fulwol bambae i naes we i naes. God bambae i mekem samting we hem i wantem i kamtru “long wol ya,” olsem yumi prea from.—Matiu 6:10