“!Mi Stanap Strong! !Mi Stanap Strong! !Mi Stanap Strong!”
1 Hemia tok blong wan Kristin we i gat strong bilif. Kristin ya i bin laef tru long Holokos. Tok ya blong hem i soemaot strong tingting we plante taosen Witnes oli bin gat. Samfala oli laef i stap yet, samfala oli ded finis, be olgeta oli bin holem strong bilif blong olgeta, nating se ol Nasi oli mekem i nogud tumas long olgeta. (Efesas 6:11, 13) Stori blong olgeta we oli bin stanap strong mo oli no foldaon, i pulum filing blong yumi, mo yumi save harem ol stori ya long nambawan video kaset ya Jehovah’s Witnesses Stand Firm Against Nazi Assault. I gud we yumi evriwan long kongregesen i lukluk kaset ya, mo tokbaot long ol narafala.
2 Tingbaot ol kwestin ya: (1) ?From wanem ol Witnes blong Jeova oli stanap strong agensem rul blong Nasi? (2a) ?Ol Witnes blong Jeova oli no agri blong talem wanem tok, mo from wanem? (2b) ?Olsem wanem samting ya i gat paoa long olgeta famle we oli Witnes? (3) ?Ol Nasi oli sanem hamas Witnes i go long ol rabis kalabus, mo oli makemaot olgeta olsem wanem, mo ol Gestapo oli mekem wanem long olgeta? (4) ?Wanem samting we ol brata oli no glad blong mekem blong kam fri? (5a) ?Wetaem mo olsem wanem ol Witnes oli talemaot ol rabis samting we gavman blong Hitler i mekem? (5b) ?Hitler i mekem wanem taem oli talemaot ol rabis samting we gavman blong hem i mekem? (6) ?Olsem wanem fasin joengud blong ol man blong Jeova i bin sevem laef blong olgeta mo sam narafala, long saed blong bodi mo long saed blong spirit? (7) ?Wanem singsing blong Kingdom we ol brata oli raetem taem oli stap long rabis kalabus? (8) ?Wanem eksampol blong ol man, woman mo pikinini we oli bin stanap strong we i leftemap tingting blong yu blong stap tru long Jeova, nomata wanem i hapen? (Lukluk 1999 Yearbook, pej 144-147.) (9) ?From we yu wan Witnes blong Jeova, video kaset ya i pulum yu blong gat wanem filing long saed blong fasin blong no joen long wol?
3 Gudfala eksampol blong ol Witnes blong Jeova we yumi lukluk long kaset ya, Stand Firm, i save halpem yumi, antap moa, ol yangfala, blong winim ol bigfala problem long saed blong fasin agens, ol fren we oli traem pulum olgeta blong mekem rong samting, mo i save givhan long olgeta blong holem wan tingting we i no jajem olgeta. ?Sipos yu stap skul yet, olsem wanem yu save givim janis long tija blong yu blong yusum kaset ya long klas? Maet yu save askem sipos oli wantem lukluk kaset ya we i tokbaot wan taem blong histri we plante man oli no save, no wan trufala stori we i givim wan gudfala lesen long saed blong laef.
4 Kaset ya Stand Firm i wan nambawan tul blong soemaot olsem wanem tijing we i kamaot long God i givim paoa blong stanap strong long saed blong spirit mo blong mekem God i glad. (1 Korin 16:13) Soem kaset ya long olgeta we oli intres long trutok.