Stap Dipen Long Jeova Blong Kasem Paoa
1 I gat plante samting we i mekem se yumi nidim blong dipen long Jeova. Talemaot gud nius “long olgeta ples long wol,” hemia wan bigfala wok. (Mat. 24:14) Evri dei, yumi faet agens long sin we i stap long bodi blong yumi. (Rom 7:21-23) Mo tu, “yumi stap faet agens long . . . ol jif blong olgeta [ol devel] we oli stamba blong ol fasin blong tudak long wol ya.” (Efes. 6:11, 12) I klia we yumi nidim help. ?Olsem wanem yumi save kasem paoa we i kamaot long Jeova?
2 Tru Long Prea: Jeova i givim tabu spirit blong hem i fri nomo long ol man blong hem we oli askem. (Luk 11:13) ?Yu yu harem se yu no naf blong prij long ol haos wanwan, long ol rod, no long telefon? ?Yu yu sem blong tekem janis blong prij? ?Yu no moa gat strong tingting long wok blong prij from we ol man long teritori blong yu oli no moa soem intres long trutok? ?Bambae yu mekem wanem sipos bilif blong yu i kasem traem? Dipen long Jeova. Yu mas prea blong kasem paoa.—Fil. 4:13.
3 Tru Long Stadi Wanwan: Bodi blong yumi i kam strong taem yumi kakae. Long sem fasin, yumi kam strong long saed blong spirit taem yumi stadi oltaem long Tok blong God mo long ol buk we “slef we i stret mo waes” i wokem. (Mat. 4:4; 24:45, NW ) Stanley Jones i bin stap kalabus blong plante yia long Jaena, hem wan nomo long wan rum, we i no gat wan Baebol wetem hem. Taem oli askem long hem se wanem nao i givim paoa long hem blong stanap strong, hem i talem se: “Yumi naf blong stanap strong long bilif blong yumi. Be fastaem, yumi mas stadi. Sipos yumi no stadi, bambae yumi no save gat paoa ya blong stanap strong.”
4 Tru Long Ol Miting: Taem Judas mo Saelas i stap long wan Kristin miting long faswan handred yia, “tufala i stap toktok longtaem long ol brata ya blong yumi, tufala i stap leftemap tingting blong olgeta, mo tufala i stap mekem olgeta oli strong.” (Wok 15:32) Long sem fasin tede, ol tok we yumi harem long ol miting oli mekem tangkiu blong yumi long Jeova i kam bigwan moa, i mekem bilif blong yumi i gru, mo i pusum yumi blong mekem wok blong prij. Ol miting oli mekem se yumi stap joen oltaem wetem “ol narafala man blong talemaot Kingdom blong God,” we oli “givhan long yumi blong kam strong.”—Kol. 4:11, NW.
5 “Long taem ya we bambae i klosap long Lasdei, laef long wol ya bambae i kam strong tumas,” taswe yumi nidim help. (2 Tim. 3:1) Baebol i talem long saed blong olgeta we oli kasem paoa long Jeova, se: “Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”—Aes. 40:31.