Ol Blesing We Oli Kamaot Taem Yumi Soem Tangkiu From Lav Blong Jeova—Haf 2
1 Las manis yumi bin tokbaot fo rod long wok blong prij blong soem tangkiu from lav blong Jeova. (1 Jon 4:9-11) Long manis ya, bambae yumi tokbaot faef moa rod blong mekem olsem. Taem yumi joen fulwan blong givhan long ol narafala long saed blong spirit, yumi kasem blesing.
2 Tekem Evri Janis Blong Prij: Hemia wan nambawan rod blong faenem ol man we oli wantem tumas stret fasin, mo blong seremaot ol buk we oli save givhan long olgeta. I gud blong ‘yusum evri janis we yumi kasem’ blong prij long evriwan we yumi mitim. (Efes. 5:16) Blong mekem olsem, maet yumi mas wok had blong winim fasin fraet, be sipos yumi gat tangkiu from lav blong God mo yumi luksave nid blong ol narafala, bambae yumi prij long evri janis we yumi gat.—2 Tim. 1:7, 8.
3 Wan misinari i bin kasem bigfala blesing taem hem i storian wetem wan narafala pasenja we i ron long sem taksi olsem hem. Man ya i soem se hem i intres, ale misinari ya i visitim hem bakegen mo i statem Baebol stadi wetem hem. !Biaen, man ya i akseptem trutok, i gohed gud mo i kam wan elda long kongregesen!
4 Raetem Leta: Maet yumi no save prij long ol haos wanwan from we helt i nogud, no weta i nogud. Be yumi save raetem wan smol leta blong prij long sam man we yumi save olgeta, no long olgeta we wan famle no fren blong olgeta i ded, no long olgeta we oli no stap long haos taem yumi prij long teritori. Long leta ya, yumi save sanem wan traket tu, we i gat ol gudfala tok blong Baebol long hem. Samting ya i save pulum hem blong raetem leta i kambak sipos hem i gat sam kwestin. Raetem prapa adres blong yu no adres blong Haos Kingdom blong oli save sanem wan leta i kambak, be plis yu no raetem adres blong ofis blong Sosaeti long leta ya.
5 Prij Long Telefon: Hemia wan nambawan rod blong kasem ol man we yumi no faenem olgeta taem yumi prij long ol haos wanwan. Sipos yumi gat fasin luksave, mo soem kaen mo waes fasin, mo yumi tingbaot filing blong narafala taem yumi mekem wok ya, maet bambae yumi kasem gudfala frut.
6 Taem wan sista i bin prij long telefon, hem i askem long wan woman sipos hem i stap tingbaot fiuja blong hem mo famle blong hem. Woman ya i talem se hem i stap tingbaot samting ya oltaem. Hem i gohed blong talem se hem i harem nogud mo tingting blong hem i foldaon, taswe hem i stap oltaem nomo long haos. Woman ya i sapraes we sista i rili tingbaot fiuja blong hem, mo hem i agri blong mitim hem long maket. !Biaen, woman ya i glad tumas blong statem Baebol stadi!
7 Welkamem Ol Strenja: Sipos yumi gat lav long ol man raonabaot long yumi, bambae yumi kwik blong luksave eni niuwan we i kam long miting blong yumi, mo bambae yumi welkamem hem. (Rom 15:7) Soem long hem se hem i stap long medel blong ol man we oli rili wantem hem blong haremgud long saed blong spirit. Sipos yumi soem trufala intres mo askem hem blong stadi Baebol, maet samting ya nao i pulum hem blong akseptem help blong yumi.
8 Gudfala Fasin: Yumi leftemap trutok taem yumi soemaot gudfala fasin. (Taet. 2:10) Taem ol man blong wol oli talem ol gudfala tok long saed blong ol Witnes blong Jeova, olgeta oli givim ona long God blong yumi. (1 Pita 2:12) Samting ya tu i save halpem narafala blong stat blong wokbaot long rod blong laef.
9 I gud blong tingbaot mo folem olgeta faef rod ya blong soem tangkiu from bigfala lav blong Jeova (1 Jon 4:16) Sipos yu mekem olsem, bambae yu kasem plante blesing.