“Ol Man We Oli Olsem Presen” Oli Glad Blong Lukaot Long Ol Sipsip Blong God
1 !Jeova i yusum Pikinini blong hem blong givhan long yumi wetem lav taem hem i givim “ol man we oli olsem presen”! (Efes. 4:8, 11, 12, NW ) Olgeta ya oli gat plante defren wok, wetem wok ya tu we oli mas glad mo rere oltaem blong lukaot gud long ol sipsip blong God. (1 Pita 5:2, 3) Yumi evriwan i harem gud long help ya we yumi nidim tumas. Samfala oli kasem wan trabol, samfala oli niuwan nomo long kongregesen, samfala oli gat sam slak fasin, mo sam narafala oli lusum rod. Nating se i olsem wanem, ol elda oli rili wantem givhan long yumi evriwan blong yumi stap strong long bilif.—Fil. 2:4; 1 Tes. 5:12-14.
2 Taem ol samting we oli kamaot long wol oli mekem ol man oli fraet, ol man ya blong lukaot long sipsip oli soemaot se oli “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.” Taem yumi taed, no ol samting oli kam hevi tumas long yumi, no yumi nidim narafala blong leftemap tingting blong yumi, oli mekem yumi harem gud bakegen. Oli olsem “reva we i ron, i pastru long ples we i drae” no “sed blong bigfala ston, we i stanap hem wan long ples we i no gat tri long hem.”—Aes. 32:2.
3 Leftemap Tingting Blong Olgeta We Oli No Moa Prij: Long sevis yia ya, ol elda oli stap mekem wan spesel traehad blong leftemap tingting blong olgeta we oli no moa prij plante no maet oli no moa prij nating. Oli halpem olgeta blong oli joen bakegen long ol wok blong kongregesen. Ol visit we ol elda oli mekem long ol sipsip wetem lav, i givhan long plante blong oli joen oltaem long ol miting mo blong oli kam strong long saed blong spirit gogo kasem mak we oli naf blong stat bakegen long wok blong prij. Ol traehad blong ol elda ya oli soemaot fasin blong Jeova blong keagud long yumi wetem lav, mo i soemaot we Jisas Kraes i stap lidim yumi. Jisas i soemaot eksampol ya blong wari long eni sipsip we i livim rod no i lus.—Mat. 18:12-14; Jon 10:16, 27-29.
4 Ol man blong lukaot long sipsip oli luksave ol saen we oli soemaot se wan brata no sista i hafhaf long saed blong spirit. Eniwan we oli luk se tingting blong hem i foldaon, eniwan we i no moa joen oltaem long ol miting, no eniwan we i no moa prij plante, i nidim help long saed blong spirit. Ol elda oli wantem tumas blong givhan long man we i stat folem fasin blong wol long saed blong klos mo hea, no we i stap faenem poen long kongregesen. Wetem trufala intres mo lav, ol elda oli wari long ol man olsem, mo oli rere blong ‘lego laef blong olgeta’ blong givhan long ol man ya blong oli lavem Jeova bakegen.—1 Tes. 2:8.
5 Long ol yia we oli pas, sam Kristin we oli givim laef blong olgeta i go long God finis, oli no moa joen wetem kongregesen, oli no moa mekem ol wok long saed blong spirit from we trabol long saed blong helt, trabol long saed blong mane, mo ol wari long famle oli kam hevi tumas long olgeta. Ol elda oli no tok nogud long olgeta. Be wetem kaen fasin, oli mekem olgeta oli save se Jeova i stap tingbaot olgeta sipsip blong hem, mo bambae Hem i halpem olgeta tru long ol hadtaem. (Sam 55:22; 1 Pita 5:7) Ol man blong lukaot long sipsip we oli rere oltaem blong givhan, oli halpem ol man ya blong kasem save se sipos oli ‘stap klosap long God, hem bambae i kam stap klosap long olgeta,’ mo bambae hem i mekem olgeta oli harem gud mo i givim spel long tingting blong olgeta.—Jem. 4:8; Sam 23:3, 4.
6 Tinghae Long Olgeta We Oli Sik Mo Olfala: Ol man blong lukaot long sipsip ya oli tingbaot olgeta tu we maet yumi save fogetem olgeta. Long evri kongregesen i gat olgeta we oli sik mo olfala, samfala we oli slip long hospital, mo samfala we oli no naf blong wok. From samting we i blokem olgeta, oli no save talemaot mesej blong Kingdom plante. Maet oli gat janis blong toktok nomo long ol man we oli kam visitim olgeta, ol narafala sik man, no long ol man we oli stap lukaot long olgeta. Nating se i olsem, be smol wok we oli naf blong mekem i givhan bigwan long wok blong prij long fulwol. (Mat. 25:15) Nating sipos oli prij 15 menet nomo, oli mas raetem samting ya long ripot, mo bambae kongregesen i gohed blong kaontem olgeta olsem ol man blong talemaot Kingdom.
7 Long taem blong Memoriol, ol “man we oli olsem presen” oli tingbaot moa ol samting we ol brata blong olgeta oli nidim long saed blong spirit. !Hemia stret taem blong ol elda oli mekem wan spesel traehad blong givhan long olgeta we oli lusum rod! !Sipos oli joen bakegen wetem kongregesen, oli save kasem glad mo pis long tingting blong olgeta! Yumi rili glad taem yumi luk ol “brata blong yumi long saed blong bilif” oli stap long ol miting mo long wok blong prij. Samting ya i soemaot se bilif blong olgeta i stap strong long ransom sakrefaes.—Gal. 6:10; Luk 15:4-7; Jon 10:11, 14.