Kasem Ol Samting We Yu Nidim Long Saed Blong Spirit
1 Distrik Asembli blong yumi “Ol Man Blong Talemaot Kingdom We Oli Wok Strong,” i klosap nao. Bambae hem i wan nambawan janis blong kasem ol samting we yumi nidim long saed blong spirit. Bambae hem i olsem wan gudfala kakae. Program ya bambae i fidim yumi “long ol tok blong fasin blong bilif long God.” (1 Tim. 4:6) Ol tok ya bambae oli givhan long yumi blong kam klosap moa long Jeova. Mo bambae yumi kasem advaes mo tok blong leftemap tingting, we i givhan long yumi blong winim ol traem blong laef. Jeova i promes se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Sam 32:8) !Yumi glad tumas we hem i givim ol advaes wetem lav blong lidim yumi! Tingbaot sam samting we yumi save mekem blong kasem ol gudfala samting long asembli ya.
2 Mekemrere Hat Blong Yumi: Hem i wok blong yumi wanwan blong lukaot gud long hat blong yumi. (Prov. 4:23) Blong mekem olsem, yumi mas stretem yumi wan, mo yumi no mas giaman long yumi wan. Asembli i givim janis long yumi blong tingting dip long fasin fren blong yumi wetem Jeova, mo blong ‘luklukgud long loa ya we i stret olgeta mo i save mekem man i fri.’ Blong mekemrere hat blong yumi blong “harem tok ya,” yumi mas askem long Jeova blong lukluk gud long yumi, skelem gud yumi. Askem long hem blong faenemaot ‘sipos i gat sam samting nogud long laef blong yumi’ we yumi mas stretem, mo askem long hem blong lidim yumi “long rod ya we i no save lus.”—Jem. 1:21, 25; Sam 139:23, 24.
3 Lesin Mo Tingting Dip: Long kaen fasin, Jisas i givim advaes long Mata se hem i no mas tingting tumas long wan spesel kakae we hem i stap mekem. Be Jisas i talem ol gudfala toktok long Meri from we hem i lesin gud long hem. Hem i se: “Meri, hem i jusumaot gudfala samting ya finis, mo mi mi no save tekemaot samting ya long hem.” (Luk 10:39, 42) Sipos yumi gat semfala tingting, bambae yumi no save letem ol smosmol samting oli pulum tingting blong yumi. Bambae yumi meksua se yumi stap sidaon mo lesin gud long olgeta tok we oli kamaot long asembli. Bambae yumi no save storian wetem narafala no wokbaot olbaot, mo bambae yumi lukaot gud blong no blokem ol narafala blong lesin, wetem mobael fon blong yumi, no wetem kamera, no ol rikoda.
4 Taem yumi stap lesin long ol tok, i gud blong raetem ol not we oli sot. Oli givhan long yumi blong folem gud ol tok we brata i stap givimaot. Ol save we yumi stap harem, yumi mas joenem i go long ol save we yumi gat finis. Samting ya bambae i givhan long yumi blong kasem gud ol tok we oli kamaot mo blong holemtaet olgeta long tingting blong yumi. Taem yumi lukluk bak long ol not blong yumi, yumi mas gat tingting se bambae yumi mekem ol samting ya i wok long laef blong yumi. I gud we wanwan long yumi i askem se: ‘?Olsem wanem save ya i givhan long mi blong fren moa wetem Jeova? ?Mi mas jenisim wanem samting long laef blong mi? ?Olsem wanem mi save folem save ya long ol fasin we mi mekem long ol narafala? ?Olsem wanem mi save yusum save ya long wok blong prij?’ Tokbaot ol poen we yu laekem tumas wetem ol narafala. Ol samting ya bambae i givhan long yumi blong holemtaet ol tok blong Jeova ‘long hat blong yumi.’—Prov. 4:20, 21, NW.
5 Mekem Samting We Yumi Lanem: Afta long wan distrik asembli, wan brata i talem se: “Ol save we i kamaot, i go stret long yumi wanwan, i pulum yumi blong lukluk gud long prapa hat blong yumi mo hat blong ol famle blong yumi. Mo hem i pulum yumi tu blong yusum Baebol blong givhan long narafala wetem lav, taem i nidim. Asembli ya i mekem mi mi luksave se mi mas halpem kongregesen moa.” Ating plante long yumi i bin gat semfala tingting. I tru se long en blong wan asembli, yumi evriwan i harem gud mo tingting blong yumi i glad. Be hemia i no naf. Jisas i talem se: “Naoia yufala i savegud ol samting ya. Oraet, sipos yufala i stap mekem olsem, bambae yufala i save harem gud.” (Jon 13:17) Yumi mas traehad blong folem ol save we i stret long yumi wan. (Fil. 4:9) Hemia nao rod blong kasem olgeta samting we yumi nidim long saed blong spirit.
[Bokis blong pija long pej 4]
Tingting Dip Long Wanem We Yu Harem:
■ ?Olsem wanem save ya i givhan long mi blong fren moa wetem Jeova?
■ ?Olsem wanem mi save folem save ya long fasin we mi mekem long ol narafala?
■ ?Olsem wanem mi save mekem save ya i wok long laef blong mi mo long wok blong prij?