Klos Mo Hea Blong Yumi i Mas Stret
1 Wan ripot long niuspepa i bin talem se: “Ol man, wetem ol smosmol boe tu, olgeta evriwan oli werem nektae. Ol woman mo ol gel, nating se oli bigfala gel no smol gel, olgeta evriwan oli werem wan dres no sket. I no gat wan jin traoses no wan man we i no putum nektae. Evriwan long ples ya oli klin gud, i olsem we oli saen gud.” ?Niuspepa ya i stap tokbaot hu? ?Ol man we oli joen blong kampen from politik? ?Wan grup we i stap lukluk spot? ?Ol man we oli stap long wan konset blong rok miusik? !Nogat! Hem i stap tokbaot wan grup blong ol Kristin brata mo sista we oli joen long wan distrik asembli las yia.
2 Ol man long olgeta ples blong wol oli save gud se klos mo hea blong yumi i defren olgeta long ol narafala man. (Mal. 3:18) ?From wanem yumi defren? From we yumi folem advaes blong Baebol blong putum klos ‘we i stret nomo, i no blong pulum ae blong man, mo i no blong flas be i stret blong ol man we oli stap talem se oli lavem God.’—1 Tim. 2:9, 10.
3 ?Klos Mo Hea Blong Yu i Soemaot Wanem? Klos blong yumi i soemaot plante samting long saed blong yumi—ol bilif, tingting, mo plan blong yumi. Stael blong klos blong yumi i save soemaot se yumi wanem kaen man, mo wanem grup we yumi joen wetem hem. Yumi neva mas soem se yumi agri wetem ol rabis tingting mo fasin we ol man blong wol oli leftemap. Yumi no mas tingbaot tumas sipos wan stael i stret long fasin blong naoia, be yumi mas tingbaot sipos i stret long wan man blong God. (Rom 12:2) I nogud yumi jusum wan stael we i soemaot tingting blong independen no i joen wetem wan fasin blong laef we i no stret. I moa gud yumi soemaot se yumi rili wantem “leftemap nem blong God.”—1 Pita 2:12.
4 Samfala we oli jes kasem trutok, samfala we oli no gat gud save yet, mo samfala we oli slak long saed blong spirit, maet oli save agri long enikaen klos mo stael blong hea we wol i leftemap. Maet oli no tingbaot fastaem sipos stael ya bambae i leftemap Jeova mo ogenaesesen blong hem, no nogat. Taswe, i gud we yumi evriwan i jekem yumi blong luk sipos tingting blong wol i stap gat paoa long yumi. Yumi save go luk wan brata no sista we i bigman long ol Kristin fasin mo we ol narafala long kongregesen oli respektem hem. Nao yumi save askem long hem blong talem stret long yumi sipos klos mo hea blong yumi i stret. Biaen, yumi save tingting dip long ol advaes we hem i givim.
5 Long Distrik Asembli long yia ya, “Ol Man Blong Talemaot Kingdom We Oli Wok Strong,” i gud we yumi soemaot se yumi ‘tabu, yumi man blong Jeova nomo.’ Gudfala tingting we fasin blong yumi i save givim long ol narafala man, bambae i ‘presem Jeova mo i leftemap nem blong hem i go antap.’—Dut. 26:19, NW.