Brata We i Lukaot Long Buk Stadi i Soem Intres Long Evriwan Long Grup

¹ Buk Stadi i blong ‘givhan gud long olgeta wanwan long grup, ale olgeta oli save gru gud long saed blong speret. . . . Tru ya, ol Buk Stadi oli soemaot we Jeova i laekem yumi tumas mo i tingbaotgud yumi.’ (om pej 72; Aes. 40:11) Brata we i lukaot long buk stadi i mekem bighaf blong wok ya blong givhan long wanwan man long grup blong hem.

² Long Buk Stadi: Buk stadi i wan smol grup blong man nomo. Hemia i mekem se brata we i lukaot long buk stadi i gat janis blong savegud ol wanwan man long grup blong hem. (Prov. 27:23) Klosap oltaem hem i gat janis blong storian wetem olgeta bifo mo afta long buk stadi evri wik. Sipos hem i mekem olsem, maet long en blong wan manis hem i storian finis wetem bighaf blong ol man long grup blong hem. Samting ya bambae i mekem se olgeta long grup oli no fraet blong kam toktok long hem taem oli kasem wan traem no taem tingting blong olgeta i kam slak.—Aes. 32:2.

³ Brata we i lukaot long buk stadi bambae i traem leftemap tingting blong evriwan long grup blong oli ansa long stadi. Blong mekem olsem, hem i mas lidim stadi ya long kwaet mo kaen fasin. (1 Tes. 2:7, 8) Bambae hem i lukaotem rod blong pulum olgeta evriwan oli joen long stadi ya, wetem ol yangfala tu. Sipos samfala oli sem blong givim ansa, maet hem i toktok wetem olgeta bifo long stadi, mo mekem plan se oli ridim wan vas no oli rere wan ansa long wan paragraf blong stadi. Sipos no, maet hem i soem long olgeta olsem wanem blong rerem wan ansa long prapa toktok blong olgeta.

⁴ Sipos wan man blong givhan i stap halpem brata ya we i lukaot long buk stadi, maet brata i mekem plan se man ya blong givhan bambae i lidim stadi wan taem evri tu manis. Nao brata we i lukaot long buk stadi i save lukluk fasin blong man ya blong givhan, mo givim sam gudfala advaes blong halpem hem. !Hemia wan nambawan plan blong givhan long ol brata blong oli kamgud moa long fasin blong tijim narafala!—Taet. 1:9.

⁵ Long Wok Blong Prij: Wan bigfala wok blong brata we i lukaot long buk stadi, i blong lidim ol narafala long wok blong prij. (Nam. 27:16, 17) Bambae hem i mekem gudfala plan blong prij long grup blong hem, mo bambae hem i traehad blong givhan long evriwan blong oli faenem glad long wok blong prij. (Efes. 4:11, 12) Blong mekem wok ya, hem i mas traehad blong prij wetem olgeta evriwan long grup blong hem. Mo tu, hem i wok wetem brata we i lukaot long wok blong prij, blong mekem plan se sam pablisa we oli prij longtaem finis bambae oli givhan long sam narafala we oli wantem kamgud moa long wan haf blong minista wok blong olgeta.

⁶ Man Blong Lukaot Long Sipsip We i Gat Lav: Brata we i lukaot long buk stadi bambae i soem intres tu long olgeta we oli no save prij plante, from we sam samting long laef blong olgeta i blokem olgeta. Bambae hem i meksua se ol olfala, olgeta we oli no save wokbaot, olgeta we oli kasem wan strong sik no aksiden, oli save long plan ya we oli gat raet blong putum smoltaem olsem 15 menet nomo long ripot blong olgeta, sipos oli no naf blong mekem wan aoa long wan manis. (Sevis Komiti blong Kongregesen bambae i luksave hu nao i gat raet blong mekem olsem.) Mo tu, brata ya bambae i soem intres long samfala long grup blong hem we oli no moa prij. Bambae hem i traehad blong givhan long olgeta blong oli joen bakegen long wok blong kongregesen.—Luk 15:4-7.

⁷ !Yumi glad tumas we ol brata blong lukaot long ol buk stadi oli soem intres mo lav long ol wanwan man! Help we oli givim long yumi evriwan i save givhan long yumi blong “kam wan nomo, we yumi bilif long Pikinini blong God, mo yumi savegud hem. . . Bambae yumi kam olsem Kraes nomo, we hem i bigman tru.”—Efes. 4:13.