!I Gud Yumi Traehad Blong Mekem Ol Gudfala Fasin!
1 Taem yumi kam klosap moa long Memoriol blong 2003, i gat plante risen blong “traehad blong mekem ol gudfala fasin.” (1 Pita 3:13) Wan long ol faswan risen ya hemia ransom sakrefaes blong Jisas Kraes. (Mat. 20:28; Jon 3:16) Aposol Pita i raetem tok ya long saed blong ransom, hem i se: ‘Yufala i save finis wanem samting we God i yusum blong tekemaot yufala long rabis laef ya. Hem i no yusum samting we i save kam nogud, olsem silva no gol. Be hem i yusum blad blong Kraes we i ron taem hem i ded long pos. Blad ya i olsem blad blong wan smol sipsip we i no gat wan samting nating i rong long bodi blong hem. Mo long fes blong God, blad ya blong Kraes i gud tumas.’ (1 Pita 1:18, 19) Sipos yumi gat tangkiu from samting ya we i soem lav blong God, bambae yumi stap bisi long ol gudfala wok. Bambae yumi luksave se Jisas ‘i givim laef blong hem blong tekemaot yumi long ol fasin blong yumi we i no stret, i mekem yumi fri, we laef blong yumi i klin, yumi man blong hem nomo, mo yumi strong blong mekem ol gudfala samting.’—Taet. 2:14; 2 Kor. 5:14, 15.
2 Taem yumi mekem samting we God i glad long hem, yumi harem gud from we yumi frengud wetem hem mo hem i lukaot gud long yumi. Pita i gohed blong talem se: “Man we i wantem gudfala laef, we i wantem harem gud evri dei nomo, . . . hem i mas lego ol fasin nogud mo i mas mekem ol samting nomo we i gud. Long olgeta tingting blong hem, hem i mas wok had blong mekem pis. Hem i mas mekem olsem, from we Hae God i stap lukluk long ol stret man, mo i stap lesin blong harem ol prea blong olgeta.” (1 Pita 3:10-12) Yumi laef long wan taem blong trabol. Taswe, i wan blesing blong save se Jeova i stap lukaot gud long yumi mo i rere blong “blokemgud yumi blong trabol i no kasem yumi, mo i stap lukaot gud long yumi, olsem we i stap lukaot long hem nomo.”—Dut. 32:10; 2 Kron. 16:9.
3 Ol faswan Kristin ya we Pita i raetem leta i go long olgeta, oli stap fesem plante traem. Nating se i olsem, oli gat strong tingting blong wok mo i no gat samting we i save blokem olgeta. Oli talemaot gud nius long plante ples. (1 Pita 1:6; 4:12) Samting ya i tru tu long saed blong ol man blong God tede. Yumi stap long wan ‘taem we laef long wol ya i kam strong tumas.’ Be fasin tangkiu we yumi gat from ol gudgudfala samting we Jeova i givim i pusum yumi blong wantem mekem wok blong hem wetem strong tingting. (2 Tim. 3:1; Sam 145:7) Naoia, i gud yumi tingbaot sam long ol gudfala wok we yumi save mekem long taem blong Memoriol.
4 Singaot Narafala i Kam Long Memoriol: Wan samting we yumi save mekem blong soem se yumi gat tangkiu from nambawan presen ya ransom, hemia se yumi mas kam long lafet blong tingbaot ded blong Jisas evri yia. Long yia ya, bambae yumi mekem lafet ya long Wenesde, Eprel 16, afta we san i godaon. (Luk 22:19, 20) !Las yia, long olgeta 94,600 kongregesen raon long wol, i gat 15,597,746 man we oli kam long Memoriol! Hemia i min se 220,000 moa man i kam i bitim narafala yia bifo.
5 ?Hamas man bambae oli kam long yia ya? Samting ya bambae i dipen bigwan long traehad we yumi mekem blong singaot ol man oli kam. I gud yu mekem wan lis blong olgeta man we yu wantem singaot olgeta oli kam. Ol faswan man we yu mas putum long lis ya hemia stret famle blong yu. Sipos hasban no waef blong yu i no stap long trutok, talemaot long hem se yu rili wantem we hem i kam long miting ya wetem yu. Hasban blong wan sista i talem se hem i kam long Memoriol las yia from we hem i luksave se waef blong hem i wantem tumas we hem i kam. Nekiswan man we yu save putum long lis blong yu hemia ol narafala famle, ol man we oli stap klosap long yu, ol man long wok no skul blong yu. No fogetem ol Baebol stadi blong yu tu.
6 Afta we yu mekem lis blong yu, tekem taem blong go luk olgeta wanwan blong invaetem olgeta. Yusum ol smol pepa we oli wokem speseli blong singaot ol man oli kam long Memoriol. Blong givhan long ol man blong oli no fogetem stret taem mo ples blong Memoriol ya, maet yu save raetem samting ya long smol pepa ya. Taem Eprel 16 i kam klosap, i gud blong talem bakegen long olgeta ya we yu invaetem olgeta se oli mas kam long Memoriol. I gud yumi traem bes blong yumi blong givhan long plante man blong oli kam long tabu lafet ya.
7 Halpem Olgeta We Oli Kam Long Memoriol: Naet blong Memoriol i rili wan taem blong glad. Yumi gat janis blong welkamem ol man we maet oli neva kam long ol miting blong yumi. Mekem plan blong kam eli mo stap longtaem lelebet afta long miting ya, sipos yu naf blong mekem olsem. No fraet blong go storian wetem ol niuwan we oli kam. Soem kaen fasin mo mekem man i harem se hem i welkam.—Rom 12:13.
8 ?Yumi save halpem sam long olgeta ya we oli kam long Memoriol blong oli stadi Baebol? Sipos yu toktok wetem wan man we i no gat brata no sista i stap visitim hem, meksua se yu karem nem mo adres blong hem, blong yu save go visitim hem. Sipos yumi rere blong halpem ol man ya, maet nekis yia long Memoriol, sam long olgeta ya oli kam pablisa finis. Taem yumi mekem visit long ol man we oli kam long Memoriol, askem olgeta blong kam long spesel tok we bambae yumi gat long Eprel 27.
9 ?Yu Yu Save Mekem Wok Blong Haftaem Paenia? Evri yia, strong tingting we yumi gat long wok blong Jeova i pusum yumi blong mekem moa long wok blong prij long ol spesel manis. Las yia, long Vanuatu, i gat 39 haftaem paenia long Maj mo 22 long Eprel. Long Eprel, yumi seremaot 6,053 magasin mo mekem 2,552 visit, ol namba we yumi neva kasem bifo. Taem olgeta long kongregesen oli joen fulwan blong talemaot gud nius wetem strong tingting long taem blong Memoriol, gudfala frut i save kamaot.
10 Wan kongregesen we i gat 107 pablisa long hem mo 9 fultaem paenia i mekem ripot se oli bin gat wan “nambawan manis” long Eprel las yia, from we i gat 53 man, wetem olgeta elda mo man blong givhan long kongregesen, we oli mekem wok blong haftaem paenia. ?Olsem wanem ol elda oli pulum ol man blong mekem wok blong haftaem paenia long manis ya? Oli leftemap tingting blong eniwan we oli luk se maet oli naf blong mekem wok blong paenia, mo oli stat mekem olsem, longtaem bifo long ol spesel manis ya. Oli putum ol miting blong prij long ol defdefren taem blong dei blong givhan long evriwan long kongregesen. Oli traem pulum plante blong prij long telefon, antap moa olgeta we oli sik.
11 Wan sista we i gat 86 yia mo i no save wokbaot gud from we hem i stap siksik plante, i fulumap pepa blong joen long wok blong haftaem paenia. Ale, evri moning hem i sidaon long kijin mo i yusum telefon blong prij long narafala man. Afta we hem i prij tu aoa, hem i spel blong sam aoa, mo i stat bakegen biaen. Wan woman we sista ya i telefon long hem, i bin lusum hasban blong hem mo tu pikinini boe blong hem, long tu yia we i pas. Woman ya i no kasem save from wanem God i letem ol nogud samting olsem i hapen. Sista i givim wan gudfala witnes long woman ya mo woman ya i stat stadi Baebol. Rod ya blong yusum telefon blong prij long sapa no long narafala taem, i gud tu blong toktok wetem ol man we oli laef long ol stori haos no narafala ples we i tabu blong go long olgeta. Mo tu, rod ya i halpem ol pablisa blong kasem sam man we i had blong kasem olgeta long dei.
12 Ol elda we oli bin joen long wok blong paenia oli finisim ripot blong olgeta wetem ol tok ya se: “Mifala i gat wan gudfala taem, mo mifala i tangkiu bigwan long Jeova from ol blesing mo janis ya we Hem i givim long mifala wanwan.” Sipos yumi mekem gudfala plan, kongregesen blong yu tu i save kasem sam gudfala blesing.
13 Evriwan i Mas Traehad Blong Joen Long Wok Blong Prij: Lav we yumi gat long God mo ol man raonabaot long yumi i pulum yumi blong pemaot taem evri manis blong joen long wok blong talemaot gud nius long ol man. (Mat. 22:37-39) Ol brata we oli lukaot long ol Buk Stadi, wetem ol man blong givhan long olgeta, oli mas traehad blong givhan moa long evri pablisa long grup blong olgeta blong meksua se oli joen long wok blong prij evri manis. Wan gudfala rod blong mekem olsem, hemia blong mekem plan fastaem blong prij wetem sam pablisa long grup. I nogud blong wet gogo kasem en blong manis blong mekem plan olsem, i moagud blong stat naoia. Hemia bambae i givim moa janis long yu blong givhan long olgeta ya.
14 ?I gat sam pablisa long buk stadi blong yu we oli sik no oli no save wokbaot? ?Olgeta ya oli faenem i had blong joen long wok blong prij? Sipos sam long olgeta oli no save aot long haos, i klia se bambae i had long olgeta blong prij long narafala. Be sipos olgeta ya oli tekem smol janis we oli gat blong letem laet blong olgeta i saenaot, maet bambae oli pulum sam man we oli luk ol gudfala wok blong olgeta, blong oli intres long trutok. (Mat. 5:16) Elda we i lukaot long buk stadi i mas meksua se olgeta ya oli save se, nating sipos oli mekem 15 menet nomo be oli save putum ripot. Rod ya i save leftemap tingting blong ol pablisa ya we oli holem strong long bilif mo i save mekem oli glad. Mo tu, rod ya i mekem se ripot blong olgeta man blong God raon long wol i stret.
15 !Ol Yangfala We Oli Bisi Blong Mekem Gudfala Wok! !I gud tumas blong luk ol yangfala Kristin we oli yusum paoa mo taem blong olgeta long wok blong Jeova! (Prov. 20:29) ?Sipos yu yu wan yangfala, olsem wanem yu save soem se tingting blong yu i strong long Jeova long ol spesel manis ya?
16 ?Sipos yu yu no wan pablisa yet, yu save traem kasem mak ya? Traem askem ol kwestin ya long yu wan: ‘?Mi mi save ol stamba trutok blong Baebol? ?Mi mi rili wantem joen long wok blong talemaot Kingdom? ?Mi mi gat gudfala fasin? ?Mi mi save eksplenem gud bilif blong mi taem mi stap talemaot gud nius long narafala? ?Hat blong mi nao i pusum mi blong mekem olsem?’ Sipos yu save ansa se yes long olgeta kwestin ya, ale, talem long papa mama blong yu se yu wantem kam wan pablisa. Ale, papa mo mama blong yu tufala i save toktok wetem wan elda long sevis komiti.
17 ?Sipos yu yu wan pablisa finis, yu save yusum taem afta long skul no ol holide blong joen long wok blong prij? Sam yangfala we oli baptaes finis oli joen long wok blong haftaem paenia from we oli mekem gudfala plan, mo tu, papa mama blong olgeta mo sam narafala brata sista oli halpem olgeta. Sipos yu yu no gat janis blong mekem samting ya, ale traem spenem moa taem long wok blong prij. Putum wan mak we yu yu save kasem. I gud blong putum mak blong hamas aoa we yu yu wantem kasem, be i gud tu blong traem kamgud moa long fasin blong yu blong prij. Maet yu save traem soem wan vas blong Baebol long evri man, kamgud moa blong mekem visit, statem wan Baebol stadi, no traem prij long rod no narafala ples bakegen. ?Olsem wanem sipos yu traem putum mak blong singaot wan man klosap long haos blong yu, wan fren long skul no wan famle blong yu, blong oli kam long Memoriol blong yia ya? Sipos yu traem bes blong yu blong joen fulwan long wok blong God bambae yu kasem blesing mo tu i sua se bambae yu leftemap tingting blong ol narafala insaed long kongregesen.—1 Tesalonaeka 5:11.
18 Halpem Ol Niuwan Blong Oli Gru: Long laswan sevis yia long Vanuatu, yumi mekem samwe long 467 Baebol stadi evri manis. Sloslo, plante long ol stadi ya bambae oli givim laef blong olgeta i go long Jeova mo tekem baptaes. Be, bifo we oli kasem mak ya, yumi mas halpem olgeta blong oli kam ol pablisa blong gud nius. Hemia wan impoten samting blong halpem ol niuwan blong biaenem Jisas Kraes. (Mat. 9:9; Luk 6:40) ?Yu yu gat wan Baebol stadi we i rere finis blong mekem olsem?
19 Sipos yu yu no sua se Baebol studen blong yu i stap gohedgud no nogat, askem brata we i lukaot long buk stadi blong yu no elda we i lukaot long wok blong prij, blong oli halpem yu blong luksave samting ya. Maet yu save singaot wan long tufala ya blong joen wetem yu taem yu mekem stadi blong studen ya. Ekspiriens we ol brata ya oli gat i save tijim yumi blong luksave sipos studen i stap gohedgud no olsem wanem. Maet oli gat sam gudfala advaes blong givim, we i save halpem studen ya blong gohed gud moa long saed blong spirit.
20 Taem studen blong yu i soem se hem i wantem kam wan pablisa we i no baptaes yet mo yu harem se hem i naf blong mekem olsem, toktok wetem presiden elda. Bambae hem i mekem plan blong tufala elda oli toktok wetem yu mo studen blong yu blong luk sipos hem i naf. Bambae yufala i tokbaot ol kwestin we oli stap long pej 93-94 long buk ya Minista Wok Blong Yumi. (Lukluk Wajtaoa blong Novemba 15, 1988, Franis mo Inglis, pej 17.) Sipos i stret blong studen ya i kam wan pablisa, yu mas stat trenem hem kwiktaem. Taem hem i givim faswan ripot blong prij blong hem, bambae oli talemaot long kongregesen se hem i kam wan pablisa. Yumi hop se plante taosen niuwan, nating se i oli yangfala no olfala, bambae oli kasem mak ya long ol spesel manis ya.
21 Yumi Mekem Moa Wok Taem Yumi Gat Plan: Long ol spesel manis ya klosap long Memoriol, bambae yumi save mekem moa tiokratik wok sipos yumi mekem gud plan fastaem. (Prov. 21:5) I gat plante samting we ol elda oli nidim blong mekem.
22 Blong halpem kongregesen blong joen moa long wok blong prij, ol elda oli mas mekem gudfala plan blong ol miting blong prij long wik mo long wiken. Elda we i lukaot long wok blong prij i mas lidim wok ya blong mekem plan. ?Maet i save gat sam moa miting blong prij long eli moning, let aftenun, no sapa? Kongregesen i mas save long ol plan ya. Maet i gud tu blong pinim wan lis blong stret taem blong ol miting ya long notis bod blong Haos Kingdom.
23 Ol elda oli mas meksua se ol plan blong Memoriol oli klia mo stret evriwan, bifo long Eprel 16. Hemia i minim plan blong weswan kongregesen bambae oli miting long Haos Kingdom mo long wanem taem, wetaem blong klinim Haos Kingdom, hu ol brata we bambae oli pasem bred mo waen, mo hu bambae i pem waen mo wokem bred ya. Kongregesen i mas save stret taem mo ples blong Memoriol, mo oli mas save tu sipos i gat sam jenis long ol miting blong wik. Sipos yumi tinghevi long ol samting ya bambae yumi mekem we Memoriol i gohed long “fasin we i stret gud, we ol man oli glad long hem.”—1 Kor. 14:40.
24 Maet ol papa oli wantem tektaem long famle stadi blong tokbaot sam rod blong famle i save joen moa long wok blong ol spesel manis long taem blong Memoriol. ?Maet ful famle i save joen long wok blong haftaem paenia? ?No maet famle i save givhan long wan no tu memba blong oli joen long wok ya? Sipos i no gat janis blong mekem olsem, ale, putum mak blong famle i spenem moa taem long wok blong prij. ?I gat wan yangfala long famle we i save kam pablisa sipos yu leftemap tingting blong hem smol mo givhan long hem? ?Hamas man we famle blong yu i save singaot olgeta oli kam long Memoriol blong yia ya? Gudfala plan i save karem plante blesing mo glad long famle blong yu.
25 Yusumgud Taem We i Stap: Taem aposol Pita i raetem leta i go long ol Kristin long faswan handred yia, hem i mekem olgeta oli tingbaot se oli laef long wan taem we oli mas wok strong from we klosap nao, fasin blong laef blong ol man Jiu bambae i lus. (1 Pita 4:7) Tede, evri samting i pruvum finis se yumi stap klosap long en blong rabis wol ya. Laef blong yumi evri dei i mas soem se yumi bilif long samting ya. From we yumi ol man blong Jeova we yumi wantem wok strong, tingting blong yumi i mas stap strong long impoten wok ya blong talemaot gud nius.—Taet. 2:13, 14.
26 !Naoia i taem blong wok strong! Tingting dip long ol samting we Jeova i mekem blong yu, famle blong yu, mo kongregesen. I tru, yumi no naf blong pembak olgeta samting we Jeova i givim long yumi. Be yumi save wosipim Jeova long olgeta laef blong yumi. (Sam 116:12-14) Jeova bambae i blesem ol traehad blong yumi. (Prov. 10:22) I gud we yumi evriwan i “traehad blong mekem ol gudfala fasin” long spesel taem ya blong wok strong moa, “nao long olgeta fasin ya, nem blong God bambae i save go antap moa, from Jisas Kraes ya.”—1 Pita 3:13; 4:11.
[Bokis blong pija long pej 3]
Namba Blong Man We Oli Kam Long Memoriol
1999 14,088,751
2000 14,872,086
2001 15,374,986
2002 15,597,746
[Bokis blong pija long pej 4]
?Bambae Yu Singaot Hu i Kam Long Memoriol?
□ Ol famle blong yumi
□ Ol man we oli stap raonabaot long yumi
□ Ol fren long wok mo long skul
□ Ol visit mo Baebol studen
[Bokis blong pija long pej 5]
Givhan Long Olgeta We Oli Kam Long Memoriol
□ Welkamemgud ol man
□ Mekem visit long ol niuwan
□ Askem olgeta blong stadi Baebol
□ Singaot olgeta oli kam long spesel tok
[Bokis blong pija long pej 6]
?Wanem Mak We Bambae Yu Traem Kasem Long Ol Manis Klosap Long Memoriol?
□ Pulum wan man i kam long Memoriol
□ Kam wan pablisa blong gud nius
□ Jusum wan stret namba blong aoa we yu wantem spenem long wok blong prij
□ Kamgud moa long wan haf blong wok blong prij
□ Joen long wok blong haftaem paenia