Tiokratik Skul Blong Yia 2004
1 Jeova i stap givhan long ol man we oli man nating nomo, blong oli mekem wan wok we i impoten tumas. Wan rod we hem i yusum, hemia trening we hem i givim long yumi evri wik long Tiokratik Skul. ?Yu yu stap joen fulwan long skul ya? Long Jenuware, bambae yumi jenisim sam samting, blong givhan long ol studen blong kasem moa gudfala samting from skul ya.
2 Jenisim Brata We i Givhan Blong Givim Advaes: Ol brata we oli mekem Tok No. 1 mo ol bigfala poen blong Baebol riding, oli glad long advaes we brata we i givhan blong givim advaes i stap givim long olgeta. Sipos i gat naf elda, evri yia oli save jenisim brata we i givhan blong givim advaes. Olsem nao, olgeta elda oli serem wok ya. Be samting we i moa impoten se, ol elda mo ol man blong givhan bambae oli haremgud moa blong kasem advaes long ol defdefren brata we oli gat gudhan blong givim ol tok mo we oli gudfala tija.
3 Tingtingbak: Sipos i gat wan seket asembli long wik we kongregesen i mas mekem tingtingbak, oli save seftem tingtingbak (mo ol narafala tok blong wik ya) i go long nekis wik mo seftem program blong nekis wik i kambak long wik blong seket asembli. Be taem i gat visit blong seket elda long wik we kongregesen i mas mekem tingtingbak, oli no nid blong jenisim evri samting. Bambae oli mekem singsing, fasin blong toktok, mo ol bigfala poen blong Baebol riding, olsem we program i talem. Oli save jenisim Tok N. 1 (afta long fasin blong toktok) wetem hemia blong nekis wik. Afta long ol bigfala poen blong Baebol riding, bambae oli mekem Miting blong Kingdom Wok blong haf aoa. Oli save jenjenisim sam samting long miting ya blong mekem tri haf we wanwan long trifala oli 10 menet, no tu haf we wanwan long tufala oli 15 menet. (Oli no mekem lokol mesej.) Afta long Miting blong Kingdom Wok, bambae yumi singsing, nao biaen i gat tok blong seket elda blong haf aoa. Long nekis wik blong hem, long Tiokratik Skul bambae i gat fasin blong toktok mo ol bigfala poen blong Baebol riding olsem we program i talem, nao biaen yumi mekem tingtingbak.
4 I gud yumi tekem evri janis blong gru long saed blong spirit. Taem yu kamgud moa from trening we yu kasem long Tiokratik Skul, yu leftemap tingting blong kongregesen, yu givhan blong mekem profet tok blong Baebol i kamtru, mo yu presem Man we i Stamba blong nambawan nius we yumi stap talemaot.—Aes. 32:3, 4; Rev. 9:19.