Waes We i Kamaot Long God i Gud Moa
1 Sam man oli talem se ol Witnes blong Jeova oli sud traem moa blong mekem sam samting blong givhan long ol man we oli trabol. Be ol man we oli talem olsem, oli mestem wan samting. Oli no luksave se wok blong tijim man long Baebol i wan samting we i gud moa. Hemia i laenap wetem wanem we aposol Pol i raetem se: “Tok blong talemaot ded blong Kraes long [“pos,” NW], hem i olsem krangke tok nomo long ol man blong lus. Be long yumi ya we God i stap sevem yumi, tok ya i olsem paoa blong God.” (1 Kor. 1:18) Yes, yumi save se Kristin wok blong prij hem i wok ya we i impoten moa i bitim ol narafala wok long wol tede.
2 Wan Gudfala Laef Naoia: Traehad we man i mekem blong traem winim ol trabol long wol, i karem smol frut nomo. Nating se man i stanemap ol loa, samting ya i no stopem ol man blong oli no moa stil, kilim man i ded mo mekem rabis fasin. Nating se man i saenem ol pepa blong pis, mo oli gat sam spesel ami blong putum pis, be oli no naf yet blong stopem wo fulwan. Nating se man i wokem sam spesel program blong givhan long ol puaman, be oli no save finisim fasin pua. (Sam 146:3, 4; Jer. 8:9) Defren olgeta, gud nius blong Kingdom i jenisim laef blong plante milian man taem hem i halpem olgeta blong wokem ol gudfala fasin we God i glad long olgeta. (Rom 12:2; Kol. 3:9, 10) Taem ol man oli mekem olsem, oli harem gud naoia finis long wan laef we i moagud.—1 Tim. 4:8.
3 Wan Gudfala Fiuja: Waes blong God i givhan long yumi blong winim ol traem we yumi fesem naoia long laef, be tu, hem i halpem yumi blong mekem plan we i save karem frut long laef blong yumi long fiuja. (Sam 119:105) Samting ya i mekem se yumi no stap westem taem blong traem jenisim ol samting long wol naoia, we man i no save jenisim. (Pri. 1:15; Rom 8:20) !Yumi glad tumas we yumi no stap westem laef blong yumi blong traem kasem sam mak we oli olsem drim nomo! Defren olgeta, yumi putum olgeta paoa mo tingting blong yumi i go long promes ya blong Jeova we i sua fulwan, se bambae i gat “niufala skae mo niufala wol” we stret fasin nomo bambae i stap long hem. Taem dei blong jajmen blong Jeova i kam, bambae ol man oli luksave klia nomo se olgeta we oli trastem waes blong God, olgeta nao oli mekem jus we i stret.—2 Pita 3:10-13; Sam 37:34.
4 Olgeta we oli putum tingting blong olgeta i stap fulwan long ‘waestok blong wol ya,’ oli luk waes blong God olsem samting we i no save wok. Be tru, waes blong God nomo i save soem stret rod blong man i wokbaot long hem. (1 Kor. 1:21; 2:6-8) Taswe, yumi mas gohed blong talemaot tok blong God long olgeta man long wol. God ya, “hem nomo i waes gud.”—Rom 16:27.