Program Blong Nekiswan Spesel Dei Asembli
Sipos yumi luk no yumi harem wan samting we i givim woning long yumi be yumi no lesin, bigfala trabol i save kasem yumi. I moa impoten yet blong folem ol advaes long saed blong spirit we Jeova i givim long yumi. Spesel dei asembli blong nekiswan sevis yia bambae i makemgud poen ya. Stamba tok blong asembli ya: “Tingbaotgud Tok Ya We Yu Stap Lesin Long Hem.”—Luk 8:18, Nyutesteman wetem Ol Sam long Bislama.
Long faswan tok, brata we i kam long branj ofis bambae i tokbaot ol advaes long ol faswan japta blong leta we Pol i raetem long ol Hibru Kristin, mo bambae i soem olsem wanem advaes ya i stret long yumi tede. Long laswan tok ya, “Lesingud Oltaem Long Tijing Blong God,” brata ya bakegen bambae i halpem yumi evriwan blong jekemgud yumi blong luksave sipos yumi rili stap lesin long Jeova, Pikinini blong hem, mo ‘slef we i stret mo waes.’—Mat. 24:45, NW.
Plante tok long program bambae oli givhan long ol famle. Wan long olgeta ya hemia “Ol Famle We Oli No Letem Wan Samting i Blokem Olgeta Blong Lesin Long Tok Blong God.” Tok ya bambae i givhan long yumi blong blokem ol samting blong wol we oli save mekem yumi kam slak long saed blong spirit. Brata we i givim tok ya bambae i askem kwestin long samfala we oli bin jenisim sam samting long laef blong olgeta blong oli save putum ol samting long saed blong spirit long fasples. Brata we i givim tok ya “Ol Yangfala Blong Yumi Oli Save Kam Strong Sipos Oli Lesingud Long Tok Blong God,” bambae i askem kwestin long sam yangfala we oli bin stanap strong long saed blong trutok long skul, mo taem ol fren oli traem pulum olgeta, mo long wok blong prij. Tok ya “Ol Pikinini We Oli Lesin Long God Mo Lanem Samting,” bambae i halpem yumi blong luksave se ol smosmol pikinini oli naf blong lanem plante samting. Brata we i mekem tok ya bambae i singaot sam pikinini wetem papa mama blong olgeta, blong askem kwestin long olgeta long saed blong ol gudfala frut we i kamaot taem papa mama i stat tijim pikinini we i bebi nomo long ol rod blong Jeova.
Setan i stap ‘giaman long olgeta man long wol blong lidim olgeta oli go krangke.’ Be long semtaem, Jeova i stap soemaot rod long ol man we oli stap tru long hem, blong oli save wokbaot stret. (Rev. 12:9; Aes. 30:21) Sipos yumi lesingud long ol advaes blong hem mo obei long hem long laef blong yumi, bambae yumi kam waes, bambae yumi hapi, mo bambae yumi wokbaot long rod we i go kasem laef blong olwe.—Prov. 8:32-35.