Program Blong Nekis Seket Asembli

Long ol laswan dei blong rabis wol ya, i impoten we yumi gohed blong putum ol klos blong yumi long saed blong spirit mo yumi holemtaet ol fasin we oli soemaot se yumi Kristin. (Rev. 16⁠:15) Taswe, i stret nomo we stamba tok blong seket asembli blong sevis yia 2006 hemia, “Putum Niufala Laef Ya Olsem Prapa Klos Blong Yufala.”​—⁠Kol. 3⁠:⁠10.

Faswan Dei: Faswan tok we i gat fo haf blong hem, “Soemaot Ol Defdefren Fasin Blong Niufala Laef Ya,” bambae i tokbaot olsem wanem niufala laef ya i save givhan long evri haf long laef blong yumi. ?Olsem wanem yumi save wokem niufala laef ya? Ansa blong kwestin ya bambae i kamaot long tufala laswan tok blong dei ya: “Trenem Yu Wan Blong Tingting Dip” mo “Tijing We i Mekem Laef Blong Yumi i Kam Niuwan.”

Seken Dei: Namba tu tok ya we i gat fo haf blong hem, “Lanem Blong Toktok Long Waes Fasin,” bambae i tokbaot olsem wanem niufala laef ya i save gat paoa long ol toktok blong yumi. “?Yu Yu Stap Winim Rabis Man Ya Setan?” Hemia nem blong pablik tok we bambae i soemaot se yumi mas wekap gud blong luksave ol trik blong Setan. Tufala laswan tok blong asembli hemia, “Stap Klin, We i No Gat Wan Doti Blong Wol Nating Long Yu,” mo “Mekem Ol Tingting Mo Fasin Blong Yumi Oli Kam Niuwan Evri Dei.” Tufala tok ya bambae oli givhan long yumi blong stap longwe long ol tingting mo fasin we oli agensem ol stret rod blong God, mo blong gohed blong wosip long Jeova we yumi no stop.

!Yumi wantem tumas blong kasem ol tijing ya we oli leftemap tingting blong yumi blong putum mo holemtaet niufala laef ya!