Samting We Wok Blong Prij i Mekem
1. ?Wanem tingting blong Jeova long wok blong prij we yumi mekem, mo ol man oli mekem wanem long saed blong gud nius?
1 Tok blong God i tokbaot ol Kristin, se oli mekem wok blong Jeova olsem ol soldia we oli win long faet finis nao oli stap wokbaot blong gohom. (2 Kor. 2:14-16) Taem yumi prij mo yumi givhan long ol man blong oli kasem save long God, hemia i olsem smel blong insens we i mekem Jeova i glad. Gud nius i olsem wan kakae we i swit long tingting blong sam man. Sam narafala oli tanem baksaed long hem. Be taem bighaf blong ol man oli no wantem lesin long yumi, hemia i no min se wok blong yumi i no karem frut. Tingbaot samting we wok blong prij i mekem.
2. ?Wok blong prij i givim janis long yumi blong soemaot wanem?
2 Leftemap Jeova: Setan i talem se ol man oli mekem wok blong Jeova from we oli wantem kasem blesing nomo. (Job 1:9-11) Wok blong prij i givim janis long yumi blong soemaot long Jeova se yumi lavem hem tru. Plante pablisa oli gohed blong obei long oda ya blong prij mo mekem disaepol, nating se oli kasem plante trabol mo nating se bighaf blong ol man oli no intres long gud nius. !Taem oli gohed olsem blong stap tru long Jeova mo stanap strong longtaem, oli mekem Jeova i glad tumas!—Prov. 27:11.
3. ?From wanem i impoten tumas blong yumi gohed blong talemaot nem mo stamba tingting blong God?
3 Wok blong prij i givhan tu blong mekem stamba tingting blong God i kamtru. Jeova i tokbaot taem ya we bambae wol blong Setan i lus, i se: “Nao ol man blong olgeta kantri bambae oli savegud we mi mi [Jeova].” (Esik. 39:7) Blong ol man blong olgeta kantri oli kasem save long samting ya, i impoten we ol man blong Jeova oli gohed blong talemaot nem mo stamba tingting blong hem “long olgeta man long wol, long olgeta blong evri kala, mo kantri, mo laen, mo lanwis.”—Rev. 14:6, 7.
4. ?Olsem wanem wok blong prij i givhan long God blong jajem ol man?
4 Wok Ya i Givhan Long God Blong Jajem Ol Man: Wok blong prij i givhan tu long God blong jajem ol man. Aposol Pol i talem se Jisas Kraes bambae i givim panis “long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.” (2 Tes. 1:8, 9) Jeova bambae i jajem ol man folem fasin blong olgeta blong lesin long gud nius no blong no wantem lesin. !From samting ya, ol man blong God oli mas tinghevi long wok ya! Sipos yumi no wantem gat fol from blad blong ol man, yumi no mas haedem gud nius blong Kingdom we i save sevem laef blong olgeta.—Wok 20:26, 27.
5. ?Olsem wanem wok blong prij i soemaot fasin sore blong God?
5 Taem yumi gohed nomo blong traem givhan long ol man raonabaot long yumi blong oli mekem ol samting we God i glad long hem, hemia i soemaot fasin sore blong Jeova. (1 Tim. 2:3, 4) Yumi save se ol samting we i hapen long laef blong ol man oli stap jenis oltaem, taswe yumi go long olgeta bakegen mo bakegen blong pulum olgeta blong lukaotem Jeova naoia, long smol taem we i stap yet. Taem yumi mekem olsem, yumi soemaot fasin blong God blong yumi we ‘i kaen tumas mo i gat sore,’ mo we i ‘no wantem se bambae wan man i lus, be i wantem blong olgeta man bambae oli tanem tingting blong olgeta from ol sin blong olgeta.’—Luk 1:78; 2 Pita 3:9.
6. ?Olsem wanem fasin blong stap bisi long wok blong Jeova i save givhan long yumi?
6 Wok Ya i Givhan Long Yumi: Sipos oltaem yumi stap bisi long wok blong Jeova, hemia i save lukaotgud long yumi. Fasin ya i givhan long yumi blong “gohed blong wok blong mekem Dei ya i kamtru kwik,” mo blong no letem ol rabis fasin blong wol ya oli spolem yumi. (2 Pita 3:11-14; Taet. 2:11, 12) Taswe, i gud we yumi ‘stanap strong, yumi no slak, mo oltaem yumi wok strong long ol wok ya blong Masta blong yumi,’ from we yumi save se Kristin wok ya blong prij i no blong nating nomo.—1 Kor. 15:58.