?Wanem Samting We Baebol i Rili Tijim?—Faswan Buk We Yumi Yusum Blong Mekem Baebol Stadi
1 !Yumi glad tumas blong kasem buk ya, ?Wanem Samting We Baebol i Rili Tijim? long Distrik Asembli ya “Obei Long God”! Olgeta we oli joen long asembli ya, oli glad blong kasem wan buk blong olgeta taem program blong asembli i finis long Sarede. ?Olsem wanem bambae yumi yusum niufala tul ya blong tijim ol man? Oli wokem buk ya blong yumi yusum olsem faswan buk blong mekem Baebol stadi. Nating se bambae yumi jes seremaot niufala buk ya long Maj nomo, be ol pablisa oli save stat naoia blong yusum buk ya blong statem ol Baebol stadi long wok blong prij mo long ol Baebol stadi we oli stap mekem finis.
2 Ol Baebol Stadi We Yumi Mekem Finis: Ol pablisa we oli stap yusum Save buk mo buklet Wanem blong mekem ol stadi, oli mas skelem gud olsem wanem mo wetaem blong yusum niufala buk ya long ol Baebol stadi ya. Sipos yu jes stat blong stadi wetem wan man, yu save stat long fas haf blong niufala buk ya. Sipos yu stap long medel blong Save buk finis, maet yu save gohed blong stadi long niufala buk ya ?Wanem Samting We Baebol i Rili Tijim? long japta we i laenap wetem hemia we yu stap stadi long hem long Save buk. Sipos yu stap klosap long en blong Save buk, maet yu jusum blong gohed nomo go kasem en blong buk ya.
3 Yes, yumi evriwan i save plante man we niufala buk ya ?Wanem Samting We Baebol i Rili Tijim? i save givhan long olgeta sipos oli stadi long hem. Taswe i gud we yumi askem long olgeta sipos oli glad blong mekem Baebol stadi long buk ya we i eksplenem sloslo ol trutok blong Baebol. Olsem nao, olgeta we oli stadi finis long buklet ya Wanem mo long Save buk, be oli no bin gohed kasem mak ya we oli givim laef blong olgeta i go long God mo tekem baptaes, maet oli wantem stadi bakegen long niufala buk ya. Maet ol papa mama oli wantem yusum buk ya taem oli stap tijim ol pikinini blong olgeta long ol stret save long saed blong samting we God i wantem.—Kol. 1:9, 10.
4 Stadi Long Namba Tu Buk: ?Olsem wanem? ?Plan i stap se Baebol studen i save stadi long wan narafala buk afta we hem i finisim buk ya ?Wanem Samting We Baebol i Rili Tijim? Yes. Sipos i klia se studen i stap gohed gud, nating sipos hem i slo, mo se hem i gat tangkiu from ol save we hem i lanem, hem i save gohed blong stadi long buk ya, Wosipim Trufala God. Yumi gat strong tingting se bambae yumi yusum buk ya ?Wanem Samting We Baebol i Rili Tijim? olsem wan tul we i gat paoa, taem yumi mekem wok ya blong pulum ol man oli kam disaepol.—Mat. 28:19, 20.