Ol Baebol Stadi Long Doa Blong Man Mo Long Telefon—Mekem Oli Gohed Gud
1. ?Wanem mak blong yumi taem yumi mekem ol Baebol stadi?
1 !Yumi glad tumas taem yumi statem wan Baebol stadi! Be taem yumi faenem wan man we i intres blong stadi Baebol, hemia stat nomo. Mak blong yumi i blong givhan long hem blong i kam wan trufala disaepol blong Jisas. (Mat. 28:19, 20) ?Wanem i save givhan long yumi blong kasem mak ya?
2. ?Wanem ya Baebol stadi long doa blong man mo long telefon, mo from wanem tufala rod ya oli wokgud?
2 Ol Man We Oli Bisi: Tede ol man oli bisi tumas. Long sam ples, smol nomo long ol man we oli stat blong stadi Baebol, oli agri blong spenem wan aoa blong stadi. Blong givhan long ol man olsem, yumi kasem advaes se yumi mas traem statem mo mekem ol Baebol stadi taem yumi stap stanap long doa blong man mo taem yumi yusum telefon. Long stat, yumi save mekem ol stadi ya oli sot nomo. Maet yumi tokbaot sam vas blong Baebol nomo wetem wan no tu haf blong wan buk, olsem buk ya Baebol Tijim. !I gud tumas blong luk se i gat plante pablisa naoia we oli stap mekem stadi olsemia, taem oli stanap nomo long doa blong ol man no taem oli toktok long telefon!
3. ?From wanem yumi mas traehad blong mekem se taem we yumi spenem blong stadi long doa blong man i kam longfala moa?
3 ?Be i gud blong gohed olwe blong stadi long doa blong man? Nogat. Taem wan man i jes stadi, yumi waes sipos yumi no toktok longtaem. Be Kingdom Wok Blong Yumi blong Mei 1990, pej 8, i talem se: “Taem we bambae stadi i gohed gud ale man ya i wantem save gud long sam poen. Long taem ya nao yumi save seftem taem blong stadi i kam longwan moa.” Hemia i impoten tumas. Wan pijatok: Blong fidim wan pikinini we i hanggri bitim mak, maet long stat oli givim smosmol kakae nomo long hem gogo kasem we pikinini ya i glad blong kakae bakegen. Be pikinini ya i no save kasembak ful paoa blong hem mo gru gud sipos hem i gohed blong kakae smosmol nomo evritaem. Long sem fasin, wan Baebol studen i nidim wan stadi we i longfala moa, mo i nidim blong stadi evri wik, blong hem i save kam bigman long saed blong spirit.—Hib. 5:13, 14.
4. ?Wanem gudfala samting i save kamaot sipos yumi mekem Baebol stadi insaed long haos blong man?
4 Baebol Stadi Insaed Long Haos: I moagud blong mekem stadi long wan ples we i no gat man long hem—insaed long haos no long wan narafala ples we i stret blong stadi long hem. Hemia bambae i mekem i moa isi long studen blong putum tingting blong hem i stap strong long ol samting we hem i stap lanem, mo bambae i givhan long hem blong kasem save long mining blong Tok blong God. (Mat. 13:23) Hemia bambae i givhan long tija tu blong i mekem stadi ya i laenap wetem nid blong studen. Antap moa, taem stadi i longfala moa, bambae i gat moa taem blong eksplenem gud Tok blong God, mo hemia bambae i mekem bilif blong studen i kam strong moa.—Rom 10:17.
5. ?Olsem wanem yumi save mekem se man we yumi mekem stadi long hem long doa blong haos i glad blong stadi insaed long haos?
5 ?Taem yu mekem stadi long wan man long doa blong haos, olsem wanem yu save mekem se man i glad blong stadi insaed long haos blong hem? ?Afta we yu mekem plante sotfala stadi, yu save askem long man ya sipos hem i glad blong mekem stadi ya i kam longfala moa? No maet yu askem long hem se: “?Yu yu gat taem tede blong yumitu sidaon mo tokbaot samting ya?” No maet yu askem se: “?Yu yu wantem spenem hamas minit tede blong yumitu tokbaot haf ya?” Sipos yu luk se traehad blong yu i no karem frut, i gud we yu gohed nomo blong mekem ol sotfala stadi long doa blong haos. Long wan taem we i stret, traem bakegen blong pulum studen ya blong stadi insaed long haos.
6. ?Wanem mak i mas stap long fored blong yumi taem yumi prij, mo olsem wanem ol advaes long haf ya oli save givhan long yumi blong kasem mak ya?
6 Taem yumi stap gohed blong lukaotem olgeta we hat blong olgeta i stret, yumi no mas fogetem mak blong yumi. Taem yumi statem mo mekem ol Baebol stadi, mak blong yumi i blong givhan long olgeta we hat long olgeta i stret blong oli kam ol man blong Jeova we oli givim laef blong olgeta i go long Hem mo tekem baptaes. Bambae Hem i blesem traehad blong yumi taem yumi wok strong blong kasem mak ya.—2 Tim. 4:5.