?Yu Yu Askem Long Ol Baebol Studen Sipos Oli Save Samfala We Oli Wantem Stadi?

?Sipos yu yu gat wan Baebol stadi, from wanem yu no askem long studen ya sipos hem i gat sam fren, famle, no sam narafala man we hem i save olgeta, we bambae oli glad blong save ol tijing blong Baebol? Plante taem studen i save givim plante nem blong ol man olsem. Sipos studen i agri, yu save talem nem blong hem taem yu go luk ol man ya blong askem olgeta blong stadi Baebol. Yu save talem se: “[Nem blong studen] i stap stadi Baebol mo hem i glad from, taswe hem i ting se maet yu tu yu save haremgud long Baebol stadi we mifala i stap mekem long ol man, we i fri nomo.” Biaen, yusum buk ya Baebol Tijim blong soemaot kwiktaem olsem wanem blong stadi.

Sipos yu yu gat wan Baebol stadi we i stap gohed gud, yu save leftemap tingting blong hem blong i tokbaot rod blong stadi long ol fren mo famle blong hem we maet oli intres. Hem i save singaotem olgeta blong oli joen long stadi blong hem. Sipos hem i no save mekem olsem, hem i save mekem plan blong yu yu mitim olgeta blong soemaot long olgeta olsem wanem blong stadi. Sipos studen i mekem olsem, hemia i save givhan long hem blong stat blong serem save blong hem long saed blong Baebol wetem ol narafala.

Olgeta we yu stap visitim olgeta oltaem, olgeta tu oli save givim nem blong samfala we maet oli intres blong stadi, nating sipos ol visit ya oli no agri yet blong stadi Baebol. Taem yu givim buk ya Baebol Tijim long olgeta, yu save askem se: “?Yu yu save samfala we bambae oli glad blong gat wan buk olsem?”

From we yumi stap kam klosap moa long en, yumi mas yusum evri rod blong givhan long ol man blong oli harem mo bilif long gud nius. ?Olsem wanem? ?Yu yu stap askem long ol Baebol studen blong yu sipos oli save samfala we oli wantem stadi?