?Yumi Tokbaot Wanem Long Ol Magasin?

Wajtaoa Mei 1

“Samfala oli faenem i had blong storian wetem hasban no waef blong olgeta. Baebol i soem se i nidim ona, lav, mo respek, insaed long mared. [Ridim 1 Pita 3:7-9.] ?Yu yu ting se advaes ya i save givhan long yumi sipos yumi folem? [Letem man i ansa.] Magasin ya i eksplenem ol stamba samting we oli save givhan long yumi blong storian gud wetem hasban no waef blong yumi.”

Wekap! Jul./Sept. (Bislama)

“Sam man oli ting se sipos yumi wantem win long wol ya, yumi mas gat raf fasin. Be makem narafala fasin ya we Jisas i talem long yumi blong mekem. [Ridim Matiu 5:5, 9.] ?Yu yu agri wetem tok ya? [Letem man i ansa.] Magasin ya i tokbaot tri blesing we yumi save kasem sipos yumi gat pis wetem ol narafala.” Tokbaot haf we i stat long pej 20.

Wajtaoa Jun 1

“Long taem blong Noa, God i mekem se wota i kavremap wol, blong spolem ol man we oli mekem rabis fasin. ?Yu yu save se God i promes blong tekemaot ol rabis fasin bakegen long wol ya? [Ridim 2 Pita 3:5-7. Biaen, letem man i ansa.] Magasin ya i eksplenem olsem wanem yumi save laef tru long trabol ya, olsem Noa mo famle blong hem oli mekem bifo.”

Wekap! Jun (Franis/Inglis)

“Longtaem finis i kam, ol teroris oli stap mekem ol rabis wok blong olgeta. Be tede, rabis wok blong olgeta i stap kam plante moa long olgeta ples long wol, mo klosap evri man oli stap long denja. ?Yu yu ting se from wanem i olsem? [Letem man i ansa.] Wekap! ya i soem tok we Baebol i talem long saed blong rabis wok blong ol teroris, se wetaem bambae i finis mo olsem wanem God bambae i putum trufala pis long wol.” Ridim Maeka 4:4.