?Olsem Wanem Blong Kasem Ol Mak We Yu Putumap Long Kristin Laef Blong Yu?
1. ?Wanem ol mak we plante yangfala Kristin oli putumap long Kristin laef blong olgeta?
1 Ol yangfala, taem yufala i putum ol mak long laef blong yufala, i sua se lav we yufala i gat long Jeova mo tok we Jisas i talem long ol Kristin blong ‘lukaot Kingdom fastaem,’ i gat paoa long yufala. (Mat. 6:33, NW ) Maet mak blong yufala i blong mekem wok blong paenia, blong yufala i save spenem moa taem blong prij. Maet samfala oli gat tingting blong joen long wok blong bildim ol Haos Kingdom raon long wol, wok long betel, no mekem wok blong misinari. !Ol mak ya oli nambawan mo oli save mekem yufala i glad!
2. ?Wanem i save givhan long yu blong kasem ol mak long Kristin laef blong yu?
2 Wan samting we i save givhan long yu blong kasem ol mak ya, hemia blong raetemdaon olgeta. Wajtaoa blong Julae 15, 2004 i talem se: “Wan tingting i kam klia moa taem yumi faenem ol stret tok blong eksplenem tingting ya. Long sem fasin, maet yumi tu yumi save raetemdaon ol mak we yumi wantem kasem, [mo] olsem wanem yumi wantem kasem ol mak ya.” Mo tu, i gud yumi putum ol smosmol mak we oli isi blong kasem fastaem, nao biaen yumi save kasem sam mak we oli had moa. Olsemia, ol smosmol mak ya oli save stap olsem ol step we oli halpem yumi blong luksave se yumi stap gohed olsem wanem, mo oli givhan long yumi blong holem tingting blong yumi i stap oltaem long bigfala mak blong yumi.
3. Talem sam smosmol mak we oli save givhan long wan man blong i kam naf blong tekem baptaes.
3 Ol Smosmol Mak: Sipos yu yu no baptaes yet, tingbaot wanem samting we yu mas mekem blong yu save kasem mak ya. Maet yu nidim blong kasem save moa long ol stamba tijing blong Baebol. Sipos i olsem, yu mas putum mak ya blong stadi fulwan long buk ya Baebol Tijim, mo blong jekem evri vas we oli stap long hem. (1 Tim. 4:15) Mo tu, putum wan mak blong ridim fulwan Baebol stat long Jenesis go kasem Revelesen, olsem olgeta we oli stap long Betel mo ol studen blong Gilead oli mekem. Afta, yu mas folem wan program blong ridim Baebol evri dei. (Sam 1:2, 3) !Tingbaot olsem wanem hemia bambae i givhan long yu blong kam bigman long ol Kristin fasin mo save! Bifo we yu stat mo afta we yu finis blong ridim Baebol mo blong stadi, yu mas mekem wan prea we i kamaot long hat blong yu, mo oltaem yu mas traehad blong mekem ol samting we yu lanem i wok long laef blong yu.—Jem. 1:25.
4. ?Wanem ol smosmol mak we maet wan Kristin i putum, sipos hem i gat tingting blong wok long Betel no blong mekem wok blong misinari?
4 ?Sipos yu yu baptaes finis, wanem sam narafala mak we yu save putum? ?Yu yu nidim blong kamgud moa long wok blong prij? Olsem, maet yu save putum mak ya blong gat gudhan blong yusum Baebol long wok blong prij. (2 Tim. 2:15) ?Olsem wanem yu save mekem moa long wok blong prij? Putum ol smosmol mak we oli stret long yia blong yu mo long ol samting long laef blong yu, mo we oli save givhan long yu blong kasem ol bigfala mak.
5. ?Olsem wanem ol smosmol mak oli givhan long wan brata blong i kasem bigfala mak ya blong wok long Betel?
5 Wan Gudfala Stori: Tony, we i gat 19 yia blong hem, i go visitim wan branj ofis blong ol Witnes blong Jeova, nao hem i harem se hem i wantem wok long Betel. Be fasin blong laef blong hem i olbaot, mo hem i no givim laef blong hem i go long God yet. Ale, Tony i mekem tingting blong hem i strong blong jenisim laef blong hem mo blong mekem i laenap wetem ol samting we Jeova i wantem, mo hem i putum mak ya blong baptaes. Afta we hem i kasem mak ya, hem i putum narafala mak blong mekem wok blong haftaem paenia, mo biaen, fultaem paenia. Hem i makem long kalenda blong hem, stret dei we hem i plan blong statem wok ya. Afta we hem i paenia blong sam taem, oli singaot hem blong i kam wok long Betel. !Tingbaot bigfala glad we hem i kasem!
6. ?Wanem i save givhan long yu blong kasem ol mak long Kristin laef blong yu?
6 Yu tu yu save kasem ol mak long Kristin laef blong yu sipos yu putum wok blong Kingdom i stap long fasples long laef blong yu. Prea long Jeova mo tokbaot “ol plan blong yu,” ale wok strong blong mekem olgeta oli kamtru.—Prov. 16:3; 21:5.