Prij Long Ol Haos Wanwan
1. ?Wanem kwestin i stanap long saed blong wok blong prij long ol haos wanwan, mo from wanem?
1 “Olgeta we oli gat gudhan blong yusum ol defdefren rod blong talemaot Trutok, bambae oli agri se fasin ya blong go long olgeta haos wanwan blong seremaot buk ya MILLENNIAL DAWN, hem i beswan rod blong talemaot Trutok tede.” Tok ya we i kamaot long Zion’s Watch Tower blong Julae 1, 1893, i soemaot se wok blong prij long ol haos wanwan i impoten tumas. Ol man long olgeta ples long wol oli luksave ol Witnes Blong Jeova tru long wok ya. Be long sam ples tede i hadwok moa blong faenem ol man long haos blong olgeta. ?Olsem wanem? ?I impoten yet blong prij long ol haos wanwan?
2. ?Wanem ol vas blong Baebol we oli soemaot se yumi mas prij long ol haos wanwan?
2 I Folem Baebol Mo i Impoten: Wok ya blong prij long ol haos wanwan i stanap long Baebol. Jisas i givim oda long ol 70 disaepol blong hem se oli mas go tutu blong prij long ol haos wanwan. (Luk 10:5-7) Baebol i tokbaot ol disaepol blong Jisas smoltaem afta long ded blong hem, i se: “Evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius.” (Wok 5:42) Aposol Pol tu i wok strong blong tijim ol man long ol haos wanwan.—Wok 20:20.
3. ?From wanem plante taem i moagud blong prij long ol haos wanwan?
3 Tede, wok blong prij long ol haos wanwan i wan impoten rod yet blong talemaot gud nius. Taem yumi prij folem wan gudfala plan mo long fasin we i gat oda, wok ya bambae i mekem se yumi save “faenem” ol man we oli laekem trutok. (Mat. 10:11) Plante man oli no fraet blong storian taem oli stap long haos blong olgeta. Taem yumi toktok stret long ol man, yumi harem voes blong olgeta, yumi lukluk fes blong olgeta, mo yumi makem ol samting we i stap raonabaot long olgeta. Hemia i givhan long yumi blong luksave wanem samting we oli intres long hem mo wanem samting i mekem oli wari. Plante taem yumi gat janis blong storian moa wetem ol man taem yumi mitim olgeta long haos blong olgeta.
4. ?Olsem wanem yumi save karem moa frut taem yumi prij long ol haos wanwan?
4 Jenisim Sam Samting Long Laef Blong Yumi: Aposol Pol i glad nomo blong jenisim sam samting long laef blong hem “from gud nius.” (1 Kor. 9:23) Ating yumi tu yumi save jenisim program blong yumi, blong yumi save prij long taem we ol man oli stap long haos blong olgeta, olsem long sapa, long wiken, mo long ol holide. Makemdaon ol haos we i no gat man long olgeta, mo traem gobak long wan defren taem long dei no long wan narafala dei blong wik.
5. ?Olsem wanem olgeta we sik i blokem olgeta oli save joen blong prij long ol haos wanwan?
5 Olgeta we sik i blokem olgeta, ating olgeta tu oli save prij long ol haos wanwan. Maet yumi save mekem plan blong tekem olgeta oli go wetem yumi taem yumi prij long ol haos we oli kloklosap, mekem se i no hadwok long olgeta blong wokbaot. Wan sista i stap sotwin, mekem se long evri haf aoa hem i naf blong prij long wan haos nomo. !Nating se i olsem, sista ya i glad tumas mo i harem gud afta we hem i bin joen wetem ol narafala pablisa blong prij!
6. ?From wanem yumi mas joen oltaem long wok blong prij long ol haos wanwan?
6 Yumi stap faenem yet ol man we oli olsem sipsip taem yumi prij long ol haos wanwan. Wan pablisa i noknok long wan doa, mo man blong haos ya i talem long hem se: “Kam insaed. Mi mi save se yu hu. Mi mi stap prea long God blong i sanem wan man i kam blong givhan long mi, nao mi harem yu yu noknok long doa. God i harem prea blong mi mo i sanem yu yu kam.” Frut we i stap kamaot i soemaot se Jeova i stap blesem rod ya blong prij. (Mat. 11:19) Yu mas gat strong tingting blong joen oltaem long wok blong prij long ol haos wanwan.