?Yu Yu Putum Wanem Long Fasples Long Laef Blong Yu?

¹ ?Olsem wanem bambae yu yu ansa long kwestin ya? I tru se yumi evriwan i wantem lukaot Kingdom fastaem. (Mat. 6:33) Be maet yumi askem se: ‘?Ol samting we mi mi jusum oli soemaot se mi stap putum Kingdom long fasples long laef blong mi?’ Baebol i leftemap tingting blong yumi, i se: “Yufala i mas gohed blong pruvum we yufala i wanem kaen man.” (2 Kor 13:​5, NW ) ?Olsem wanem yumi save pruvum long yumi wan se yumi stap lukaot Kingdom fastaem?

² Taem Blong Yumi: I gud we fastaem yumi skelem olsem wanem yumi stap jusum blong spenem taem blong yumi. (Efes. 5:​15, 16) ?Yu yu spenem hamas taem evri wik blong joen wetem ol fren, wajem televisin, lukluk Intenet, no blong mekem wan samting we yu laekem? Sipos yumi raetemdaon hamas taem yumi spenem long ol samting olsem, mo yumi skelem wetem taem we yumi spenem long ol samting long saed blong spirit, maet yumi sapraes. ?Olsem wanem? ?Yumi stap spenem moa aoa long wok, blong yumi save pem moa samting blong haremgud long laef, nating se i tekem taem blong ol samting long saed blong spirit? ?Hamas taem yumi mestem ol miting mo wok blong prij from we yumi go spel samples long wiken?

³ Putum Ol Impoten Samting Long Fasples: Bighaf blong yumi i no gat naf taem blong mekem evri samting we yumi wantem mekem. Taswe, blong lukaot Kingdom fastaem, yumi nidim blong skelem wanem samting i mas stap long fasples long laef blong yumi, mo biaen, yumi makemaot taem blong mekem “ol samting we oli impoten moa.” (Fil. 1:​10, NW ) Sam long ol samting ya, hemia blong stadi long Tok blong God, joen long wok blong prij, lukaot long famle blong yumi, mo go long ol Kristin miting. (Sam 1:​1, 2; Rom 10:​13, 14; 1 Tim. 5:8; Hib. 10:​24, 25) I gat sam narafala samting olsem eksasaes mo ol gudfala pleplei we oli save mekem i gud long yumi. (Mak 6:31; 1 Tim. 4:8) Be ol samting olsem we oli no impoten tumas oli no mas stap long fasples long laef blong yumi.

⁴ Wan yangfala brata i no traem blong kasem hae edukesen blong hem i save gat wan gudfala wok. Defren olgeta, hem i jusum blong joen long wok blong fultaem paenia from we hem i wantem lukaot Kingdom fastaem. Hem i lanem wan narafala lanwis mo i muv i go long wan ples we i gat bigfala nid long hem. Hem i talem se: “Mi mi haremgud tumas blong stap long ples ya. !Wok blong prij i gud tumas! Mi wantem se evri yangfala i mekem desisen ya mo haremgud olsem mi. I no gat wan samting we i moagud i bitim we yumi mekem wok blong Jeova wetem olgeta hat blong yumi.” Yes, taem yumi putum Kingdom long fasples long laef blong yumi, yumi kasem plante blesing, be samting we i moa impoten, hemia se yumi mekem Jeova, Papa blong yumi long heven, i glad.​—Hib. 6:10.