Evriwan Oli Save Joen Long Wok Ya Blong Pulum Man i Kam Disaepol
1 I no ol traehad blong wan pablisa nomo we i mekem se wan man i kam disaepol. Jeova i save yusum evriwan we oli ‘stap joen wetem hem blong mekem wok,’ blong oli givhan long olgeta we oli stadi Baebol blong oli gohed gud long saed blong spirit. (1 Kor. 3:6-9) Yumi wanwan yumi givhan long ol niuwan taem yumi givim ansa we i kamaot long hat blong yumi long ol Kristin miting, mo taem yumi gat ol gudfala fasin. Hemia i wan klia pruf se spirit blong God i stap wok long laef blong yumi. (Jon 13:35; Gal. 5:22, 23; Efes. 4:22, 23) ?Wanem sam moa samting we yumi save mekem blong givhan long ol niuwan?
2 Samting We Kongregesen i Save Mekem: Taem ol niuwan oli stat blong joen long ol miting, yumi evriwan i save soem intres long olgeta. Olsem nao, yumi go talem halo long olgeta, soem fasin fren long olgeta, mo yumi storian wetem olgeta bifo mo afta long miting. Wan man i tingbaot faswan taem we hem i joen long kongregesen, hem i se: “Mi mi mitim ol man we mi no save olgeta nating, be oli soem trufala lav long mi. Long wan dei, mi mitim moa man olsem, i bitim ol man we mi mitim long jos blong mi long olgeta yia we mi stap long hem, stat taem mi pikinini. I klia se mi mi faenem trutok.” Seven manis afta long faswan miting ya, man ya i tekem baptaes.
3 Talem ol gudfala tok long Baebol studen taem hem i stap gohed gud long saed blong spirit. ?Olsem wanem? ?Hem i fesem fasin agens mo i stanap strong? ?Hem i joen oltaem long ol miting? ?Hem i winim fraet blong hem mo i givim ansa long miting? ?Hem i putum nem blong hem long Tiokratik Skul no i stat blong joen long wok blong prij? Ale, talem ol gudfala toktok long hem from ol gudfala wok ya we hem i mekem. Hemia bambae i mekem hem i haremgud mo i save givim paoa long hem.—Prov. 25:11.
4 Samting We Man Blong Lidim Stadi i Save Mekem: Sam pablisa oli askem long ol narafala pablisa blong oli joen wetem olgeta taem oli mekem Baebol stadi. Long rod ya oli givhan long ol studen blong oli save ol memba blong kongregesen. Askem kwiktaem long studen blong i joen long ol miting blong kongregesen. Taem hem i stat blong joen long ol miting, meksua se yu tekem hem i goraon long ol narafala blong hem i save olgeta. ?Olsem wanem? ?Hem i stap traem blong winim wan rabis fasin, olsem smok tabak? ?Wan long famle blong hem i agensem hem from we hem i stadi? Bambae hem i kasem help sipos hem i toktok wetem wan pablisa we i bin fesem mo i winim semfala traem ya.—1 Pita 5:9.
5 Ol niuwan oli nidim we kongregesen i givhan long olgeta. Yumi evriwan i save givhan long olgeta blong oli gohed gud sipos yumi soemaot se yumi rili intres long olgeta.