“Oltaem Yufala i Mas Talem Tangkiu Long God”
1 Taem Jisas i mekem ol ten man we oli gat leprosi oli kam gud bakegen, i gat wan nomo long olgeta we i kambak blong talem tangkiu long hem. Jisas i askem se: “?Olsem wanem? Mi mi ting se i gat ten man we bodi blong olgeta i kam klin. ?Wehem ol narafala naen man ya?” (Luk 17:11-19) I impoten tumas we yumi luksave mo talem tangkiu from evri samting we oli gud mo evri presen we oli nambawan we gudfala Papa blong yumi long heven, Jeova God we i lavem yumi tumas, i stap givim long yumi.—Kol. 3:15; Jem. 1:17.
2 ?Wanem sam samting we yumi mas talem tangkiu from? Yumi mas talem tangkiu from ransom we i wan presen we i bigwan moa bitim ol narafala presen we God i givim long ol man. (Jon 3:16) Mo tu, yumi talem tangkiu long Jeova from we hem i wokem rod blong yumi save kam klosap long hem. (Jon 6:44) Wan narafala samting we yumi mas talem tangkiu long God from, hemia se yumi ol Kristin long fulwol yumi olsem wan famle. (Sam 133:1-3) Ating yu save tingbaot sam narafala presen blong Jeova we yu save talem tangkiu long hem from. Yumi neva mas kam olsem ol man Isrel bifo, we oli no gat tangkiu nating, oli fogetem ol bigbigfala wok we Jeova i mekem blong olgeta.—Sam 106:12, 13.
3 Soemaot Se Yu Gat Tangkiu: Tru ya, ol ten man we oli gat leprosi oli mas soem tangkiu from samting we Jisas i mekem long olgeta, be wan nomo i talem tangkiu. (Luk 17:15) Olsem man ya we i talem tangkiu, yumi tu yumi mas soemaot se yumi gat tangkiu taem yumi joen oltaem long wok blong prij. Sipos yumi gat trufala tangkiu from ol samting we Papa blong yumi Jeova i stap mekem long yumi, hat blong yumi bambae i pusum yumi blong soemaot semfala lav ya we Jeova i soemaot long yumi, taem yumi tokbaot hem long ol narafala. (Luk 6:45) Taem yumi toktok wetem narafala long saed blong ‘ol nambawan wok blong Jeova mo ol tingting we hem i gat long saed blong yumi,’ lav we yumi gat long Jeova bambae i gru moa mo glad blong yumi bambae i kam bigwan moa.—Sam 40:5, NW.
4 Pulum Ol Narafala Blong Oli Gat Fasin Tangkiu: Yumi mas lukaot janis blong halpem ol pikinini mo ol Baebol stadi blong yumi blong oli kam gud moa long fasin blong gat tangkiu. Ol papa mama oli save storian wetem ol pikinini blong olgeta long saed blong ol naesfala samting we Jeova i wokem. (Rom 1:20) Taem yumi stap stadi wetem ol Baebol stadi blong yumi, maet yumi save askem se, “?Stadi ya i givhan long yumi blong kasem save se Jeova i wanem kaen God?” Long rod ya, studen ya bambae i gat moa tangkiu long Jeova, mo long semtaem, bambae lav blong hem long Jeova i kam strong moa mo bambae hem i wantem moa blong mekem samting we Jeova i wantem.
5 Long taem blong ol las dei, plante man oli no luksave gudfala samting we narafala i mekem long olgeta mo oli no gat tangkiu nating. (2 Tim. 3:1, 2) !Jeova i glad tumas blong luk we ol man blong hem oli soemaot tangkiu blong olgeta taem oli joen oltaem long wok blong prij!—Jem. 1:22-25.