“Biaen Long Hem”
1. ?Olsem wanem yumi save kam wan gudfala man blong prij?
1 Nomata we Jisas i no bin go long skul blong ol tija blong ol man Jiu, be hem i Man we i hae moa long olgeta man long saed blong wok blong prij. Yumi glad we oli bin raetemdaon plante stori blong wok blong prij blong Jisas blong givhan long yumi. Yes, blong kam wan gudfala man blong prij, yumi mas “biaen long hem.”—1 Pita 2:21.
2. ?Wanem bambae i givhan long yumi blong wokem semfala lav we Jisas i bin soemaot long narafala?
2 Soemaot Lav Long Ol Man: Lav we Jisas i gat long ol man i pusum hem blong wok strong. (Mak 6:30-34) Plante man long teritori blong yumi oli “stap harem nogud” mo oli rili nidim trutok. (Rom 8:22) Taem yumi tingbaot olsem wanem olgeta oli trabol mo bigfala intres we Jeova i soemaot long olgeta from lav blong hem, samting ya bambae i pulum yumi blong gohed nomo long wok blong prij. (2 Pita 3:9) Antap moa, sipos ol man oli luksave se yumi rili intres long olgeta, bambae oli glad moa blong lesin long gud nius we yumi talemaot.
3. ?Jisas i jusum wanem taem blong prij long ol man?
3 Tekem Evri Janis Blong Toktok: Jisas i tekem evri janis we hem i kasem blong talemaot gud nius long narafala. (Mat. 4:23; 9:9; Jon 4:7-10) Long sem fasin, taem yumi stap mekem ol wok blong yumi evri dei, yumi mas rere tu blong talemaot trutok long ol man. Samfala oli karem wan Baebol mo sam buk wetem olgeta oltaem, blong oli save prij long ples blong wok, long skul, taem oli stap wokbaot i go long narafala ples no taem oli go long ol stoa, no long wan narafala taem bakegen.
4. ?Olsem wanem yumi save mekem se Kingdom i kam stamba samting we yumi tokbaot long wok blong prij?
4 Tokbaot Kingdom: Stamba samting we Jisas i talemaot taem hem i prij hemia gud nius blong Kingdom. (Luk 4:43, NW) Oltaem yumi mas tingbaot blong halpem ol man blong luksave se yumi nidim Kingdom, nomata se yumi no talem samting ya stret long fastok blong yumi. Nating sipos yumi tekem smoltaem blong tokbaot ol nogud samting we i stap kamaot long wol tede we oli soemaot se yumi stap laef long ol las dei, be yumi spenem moa taem blong “talemaot gud nius.”—Rom 10:15.
5. ?Sipos yumi wantem karem gudfala frut long wok blong prij, yumi mas yusum Baebol olsem wanem?
5 Yusum Tok Blong God: Taem Jisas i stap prij, oltaem hem i yusum Baebol. Hem i no tijim wan samting nating we i kamaot long prapa tingting blong hem. (Jon 7:16, 18) Tok blong God i olsem kakae blong Jisas, mo hem i wok folem wanem we Baebol i talem taem hem i stap fesem ol traem blong Setan. (Mat. 4:1-4) Sipos yumi wantem blong tijimgud ol narafala, yumi mas ridim Baebol evri dei mo folem wanem we Baebol i talem long laef blong yumi. (Rom 2:21) Taem yumi stap ansa long wan kwestin long wok blong prij, i gud we yumi pruvum samting we yumi stap talem wetem wan vas, mo ridim vas ya stret long Baebol. Long fasin ya, bambae ol man oli luksave se yumi no talemaot prapa tingting blong yumi, be yumi stanap strong long ol tingting blong God nomo.
6. ?Jisas i mekem wanem blong kasem hat blong ol man we oli lesin long hem?
6 Kasem Hat Taem Yu Tij: “!I no gat man we i save tok olsem man ya samtaem!” (Jon 7:46) Hemia nao tok we ol soldia oli talem long saed blong Jisas, taem ol jif pris mo ol Farisi oli bin askem from wanem oli no bin holem hem. Jisas i no givim save nomo, be hem i tijim ol man long fasin we i kasem hat blong olgeta. (Luk 24:32) Jisas i yusum ol pija tok long saed blong ol samting long laef blong ol man evri dei, blong mekem se i isi long olgeta blong kasem save long ol tok blong hem. (Mat. 13:34) Jisas i no mekem tingting blong olgeta we oli lesin long hem i fasfas from we i givim tumas save wantaem long olgeta. (Jon 16:12) Hem i pulum ol man blong lukluk i go long Jeova, i no long hem wan. Olsem Jisas, blong kam wan gudfala tija, yumi mas ‘lukaot gud long ol tok we yumi stap tijim ol man long hem.’—1 Tim. 4:16.
7. ?From wanem Jisas i gohed nomo long wok blong prij?
7 Gohed Nomo Nating Se Ol Man Oli No Wantem Lesin No Oli Agensem Yumi: Nating se Jisas i bin mekem plante merikel, be fulap man oli no lesin long hem. (Luk 10:13) Sam memba blong prapa famle blong hem tu oli bin talem se “hed blong hem i krangke ya.” (Mak 3:21) Be nating, Jisas i gohed nomo long wok blong hem. Hem i holem wan gudfala tingting long saed blong wok ya from we hem i bilif fulwan se hem i karem trutok ya we i save mekem man i kam fri man. (Jon 8:32) Long sem fasin, yumi gat strong tingting blong mekem wok ya wetem help blong Jeova, yumi no save lego.—2 Kor. 4:1.
8, 9. ?Olsem wanem yumi save folem eksampol blong Jisas blong lego sam samting from gud nius?
8 Lego Sam Samting Blong Joen Fulwan Long Wok Ya: Jisas i lego ol samting we i save mekem laef blong hem i isi, blong hem i save mekem wok blong prij. (Mat. 8:20) Hem i prij strong, hem i neva kam taed blong mekem wok ya. Samtaem san i stap godaon be hem i prij yet. (Mak 6:35, 36) Jisas i save se hem i gat sot taem nomo blong finisim olgeta wok blong hem long wol ya. Yumi tu, “yumi no gat plante taem i stap.” From samting ya, olsem Jisas i bin mekem, yumi mas rere blong lego sam samting we oli kakae taem, paoa, mo ol narafala samting blong yumi.—1 Kor. 7:29-31.
9 From we ol Kristin long faswan handred yia oli bin lanem plante samting taem oli folem Jisas, oli karem gudfala frut long wok blong prij. (Wok 4:13) Olsem olgeta ya, yumi tu yumi save finisimgud wok ya blong talemaot gud nius sipos yumi biaen long Man ya we i hae moa long olgeta man long saed blong wok blong prij.—2 Tim. 4:5.