Taem We Man Blong Haos i Toktok Wan Narafala Lanwis
1. ?From wanem i gat bigfala nid blong wokgud tugeta taem yumi prij long teritori blong yumi?
1 Raon long ful wol tede, plante moa man blong talemaot Kingdom oli stap faenem sam man we oli toktok wan narafala lanwis long teritori blong kongregesen blong olgeta. Blong givhan long ol man olsem long saed blong spirit, plante branj ofis oli faenem se i nidim blong wokem sam grup mo kongregesen long narafala lanwis. From we i save gat plante man we oli toktok defdefren lanwis long wan ples, ale samting ya i mekem se plante kongregesen long narafala lanwis oli prij long semfala teritori. ?Olsem wanem ol kongregesen wanwan oli save wokgud tugeta blong meksua se wok blong prij i gohed long wan fasin we i folem oda?—1 Kor. 14:33.
2. ?Olsem wanem yumi save wokgud tugeta wetem wan grup no kongregesen long narafala lanwis, taem yumi stap prij long haos wanwan?
2 Wokgud Tugeta: Taem wan pablisa i stap prij long rod no hem i tekem janis blong prij, hem i mas fri blong toktok wetem eni kaen man. Sipos hem i mitim wan man we i toktok wan narafala lanwis, hem i save prij long hem mo givim sam buk long lanwis blong man ya. Be taem hem i go prij long haos wanwan, wan pablisa i mas tingbaot se samfala kongregesen long narafala lanwis oli prij tu long sam long ol haos ya. Taswe, i gud we hem i prij long ol haos we ol man oli toktok lanwis blong kongregesen blong hem nomo. Taem ol defdefren kongregesen oli prij long semfala teritori, i impoten tumas we oli yusum pepa blong prij blong raetem daon ol wok we oli mekem long teritori. I gud sipos ol elda we oli lukaot long wok blong prij blong wanwan kongregesen oli toktok tugeta mo ogenaesem wok blong prij blong evriwan i haremgud. (Prov. 11:14) ?Olsem wanem taem wan pablisa we i stap prij long haos wanwan i faenem wan man we i toktok narafala lanwis? Sipos i no gat kongregesen long lanwis blong man ya we i klosap long teritori ya, i gud we pablisa ya i traehad blong prij long man ya mo i gohed blong visitim hem.
3. ?Taem yumi prij long wan teritori we i gat sam pablisa blong wan grup no kongregesen we i toktok narafala lanwis we oli stap prij tu, yumi mas gat wanem fasin?
3 Semfala Wok: ?Sipos sam pablisa we oli blong defdefren kongregesen oli prij long semfala teritori long semtaem, bambae oli mekem olsem wanem? I tru se i no gat lanwis we i save blokem fasin lav blong ol Kristin, mo tu, nid blong ol man long teritori hemia faswan samting blong tingbaot. (Jon 13:34, 35) Be olgeta we oli lidim grup long taem ya, bambae oli soemaot se oli no bitim mak mo we oli gat lav taem oli jusum se hu long olgeta bambae i save muv i go prij long wan narafala teritori blong smoltaem.—Jem. 3:17, 18.
4. ?Wanem profet tok i stap kamtru tede?
4 Baebol i bin talem se ol man blong narafala lanwis bambae oli lesin long gud nius. (Rev. 14:6, 7) Sipos evriwan i joen blong wokgud tugeta, bambae i isi moa blong givhan long olgeta man long teritori mo plante moa niuwan bambae oli harem gud nius, wetem olgeta ya tu we oli toktok narafala lanwis.—Efes. 4:16.