Yumi Gat Ol Sas Samting Blong Serem
1 Yumi glad tumas we Tok blong God i fulapgud long ol tijing we i sas tumas. (Sam 12:6; 119:11, 14) Wan taem, Jisas i yusum ol pijatok blong soemaot ol defdefren samting long saed blong Kingdom, mo biaen hem i askem ol disaepol blong hem se: “?Yufala i haremsave olgeta samting ya?” Taem ol disaepol oli talem se oli harem save samting we hem i tijim olgeta long hem, Jisas i talem long olgeta se: “Hemia i min se man we fastaem i tija blong Loa, be biaen i kam we God i King blong hem, hem i olsem wan man we i gat plante samting long haos blong hem. Nao taem man ya i wantem mekem wan wok, hem i save yusum olfala samting we i gud yet, mo i save yusum niufala samting tu we i jes kamtru, blong mekem wok ya blong hem.”—Matiu 13:1-52.
2 Taem yumi stat stadi Baebol, ol save we yumi bin kasem bambae yumi luk olgeta olsem we oli olfala samting we i gud yet. Taem yumi gohed yumi wan blong stadi dip long Tok blong God, yumi faenem sam narafala trutok blong Baebol. Ol narafala trutok ya oli olsem ol niufala samting we yumi faenem we oli sas tumas. (1 Korin 2:7) Tru long “Slef ya We i Stret Mo Waes,” yumi kasem save bakegen long ol narafala trutok we olgeta ya tu oli sas.—Matiu 24:45, NW.
3 Nating we sam long ol trutok ya oli olfala no oli niu, be yumi rili tinghae tumas long olgeta. From samting ya, i gud yumi kasem ol trening mo yumi gat gudhan olsem wan tija blong yumi save tijimgud Tok blong God. Yumi glad nomo blong serem ol sas trutok ya we yumi lanem wetem ol narafala man.
3 Folem Eksampol Blong Jisas: Jisas i traehad oltaem blong serem trutok wetem narafala. Long rod ya, hem i soemaot olsem wanem ol trutok ya oli sas tumas. Nating se hem i taed, be samting ya i no stopem hem blong karemaot ol gudgudfala samting long “haos” blong hem.—Jon 4:6-14.
5 Jisas i serem ol trutok blong God we i save givim laef from we hem i lavem tumas ol man we oli no save God mo ol stamba tingting blong hem. (Sam 72:13) Hem i sore tumas long olgeta we oli hanggri long saed blong spirit mo samting ya i pusum hem blong “tijim olgeta long plante samting.”—Mak 6:34.
6 Folem Fasin Blong Jisas: Taem yumi tinghae long ol sas samting ya we yumi gat, olsem Jisas, bambae yumi wantem tumas blong soem long man ol sas trutok ya stret long Baebol. (Prov. 2:1-5, NW) Nating se samtaem yumi kam taed, be bambae yumi gohed nomo blong talemaot ol trutok blong Baebol wetem wan hat we i fulap long glad. (Mak 6:34) Yumi tangkiu bigwan from ol sas trutok ya, ale samting ya bambae i pusum yumi blong wantem mekem moa long wok blong prij, mo bambae yumi traehad oltaem blong faenem wan rod blong joen fulwan long wok ya.