!Yu Yu Naf Blong Kam Wan Tija!
1. ?Wanem spesel janis we i stap long fored blong wanwan pablisa blong Kingdom?
1 Wan long ol haf blong wok blong prij we yumi kasem gudfala frut long hem, hemia blong tijim man long trutok. Yumi glad tumas taem yumi luk we wan man i lesin long gud nius blong Kingdom, mo yumi halpem hem blong kam klosap long Haefala Rula blong heven mo wol. (Jem. 4:8) Olgeta pablisa blong Kingdom oli gat mak ya blong tijim man we i hanggri from trutok, mo blong luk olsem wanem hem i jenisim ol fasin mo ol aksen blong hem.—Mat. 28:19, 20.
2. ?From wanem sam oli fraet blong mekem ol Baebol stadi, mo wanem samting we i save givhan long olgeta blong winim traem ya?
2 Trastem Jeova: Long taem bifo, ol man blong God oli harem se oli no naf nating blong mekem wok we Jeova i putum long han blong olgeta. Moses, Jeremaea, Amos, mo ol narafala man oli winim tingting we i hafhaf mo fasin fraet, from we oli trastem Jeova God, nao from samting ya, oli naf blong mekem wan impoten wok we Jeova i givim long olgeta blong mekem. (Eks. 4:10-12; Jer. 1:6, 7; Amos 7:14, 15) Aposol Pol tu i ‘mekem tingting blong hem i strong.’ ?Olsem wanem? Hem i talem se “God blong yumi” nao i mekem tingting blong hem i strong. (1 Tes. 2:2) Yes, yumi evriwan i mas trastem Jeova blong hem i halpem yumi blong gat waes mo paoa we yumi nidim, blong yumi save mekem ol Baebol stadi we oli karem gudfala frut.—Aes. 41:10; 1 Kor. 1:26, 27; 1 Pita 4:11.
3, 4. ?Wanem trening we yumi save kasem blong tijim Tok blong God?
3 Kasem Trening: Bigfala Tija blong yumi Jeova God, i stap trenem yumi oltaem tru long wan program we i stanap long Baebol, blong bambae yumi save kam ol gudfala tija. (Aes. 54:13; 2 Tim. 3:16, 17) I gud we yu letem program ya i trenem yu, taem yu mekem evri samting we yu yu naf blong mekem, blong save blong yu long saed blong Baebol i kam antap moa, mo blong yu kam gud moa long fasin blong yu blong tijim trutok. Yumi kasem trening ya tru long Tiokratik Skul, mo Miting Blong Kingdom Wok. Be ol narafala miting blong kongregesen tu oli trenem yumi blong yumi tijim Tok blong God
4 Yu mas traehad blong lanem ol isi rod blong tijim ol dip save blong trutok long ol man. Buk ya, Ministry School, pej 227, i eksplenem se: “Sipos yu wantem se narafala i kasem save long wan poen, ale yu wan, yu mas savegud fastaem samting we yu yu wantem tijim long narafala.” Fasin blong givim ansa long ol miting i save halpem yumi blong rimemba ol impoten save we yumi save yusum bakegen biaen. Taswe yu mas rere gud, olsem nao yu save sua se bambae yu save kamgud moa long fasin blong tijim man.
5. ?Wanem ol narafala trening we yumi gat insaed long kongregesen we oli trenem yumi blong kam ol gudfala tija?
5 Fastaem, i sua se ol faswan Kristin oli lanem olsem wanem blong tij taem oli wok tugeta blong mekem disaepol. (Luk 10:1) Sipos i gat janis, i gud yu joen wetem ol pablisa we oli gat gudhan blong tij, wetem ol paenia, ol elda mo ol seket elda tu, blong mekem Baebol stadi. Makemgud olsem wanem oli yusum ol isi pijatok, ol pija mo ol narafala save we oli stap insaed long ol buk we yumi yusum blong mekem stadi long ol man, blong eksplenem ol trutok blong Baebol. Askem advaes long olgeta se olsem wanem yu yu save kam wan gudfala tija. (Prov. 1:5; 27:17) Yumi mas gat tangkiu from ol trening ya we i kamaot long God.—2 Kor. 3:5.
6. ?Wanem impoten samting we wan man i nidim blong i save kam wan tija blong Tok blong God?
6 Trastem Jeova, mo haremgud long trening we hem i givim long yumi. Prea i go long hem blong bambae i halpem yu blong gohed gud. (Sam 25:4, 5) !Bambae yu tu, yu save haremgud taem yu halpem wan man blong i kam wan tija olsem yu, we i stap tijim Tok blong God!