!Spesel Kampen Blong Talemaot Memoriol!
1. ?Ol pablisa blong Kingdom bambae oli mekem wanem raon long wol stat long Maj 21, 2009, mo from wanem?
1 Long Tasde, Eprel 9, 2009, raon long wol ol man we oli wosip long Jeova God bambae oli kam wanples blong tingbaot bigfala lav blong hem we hem i soemaot long ol man. (Rom 5:6-8) Yumi wantem tumas blong luk we plante milian man bambae oli save joen wetem yumi blong tingbaot ded blong Jisas. Stat long Maj 21, ol pablisa blong Kingdom raon long wol bambae oli seremaot pepa blong singaotem ol man oli kam long Memoriol.
2. ?Wanem ol samting we yu mas tingbaot taem yu stap seremaot ol pepa blong singaotem ol man i kam long Memoriol?
2 Ol Samting Blong Tingbaot: Yusum gud ol pija, ol kwestin, mo vas blong Baebol we i stap long pepa blong singaotem man i kam long Memoriol. Eksampol, maet yu save yusum pija we i stap long fored blong pepa ya mo talem se: “Mi wantem singaotem yu yu kam blong tingbaot ded blong Jisas wetem mifala, long Tasde, Eprel 9, 2009.” Ale pulum tingting blong hem i go long taetel blong pepa ya mo ol kwestin we i stap daon. Yu mas mekem i klia long man blong haos se hem i save kam wetem ol memba blong famle blong hem mo eni narafala man we hem i wantem se oli kam wetem hem.
3. ?Yu save mekem wanem samtaem afta we yu givim wan pepa blong singaot wan man i kam long Memoriol?
3 Sipos kongregesen blong yu i gat wan bigfala teritori, ol elda oli save talem long yu blong livim pepa blong Memoriol i stap long ol haos sipos man i no stap. Long ol wiken, taem yu stap serem ol pepa ya, yu save seremaot ol magasin tu. Mak blong yu, i blong singaotem ol visit blong yu, ol Baebol stadi, ol famle, ol fren long skul, ol man long ples blong wok, ol man we oli stap raonabaot long yu mo sam narafala we yu save olgeta. Las yia, wan sista i singaotem 30 memba blong famle blong hem blong oli kam, mo samtaem biaen hem i talem bakegen long olgeta se dei ya blong tingbaot ded blong Jisas i rili impoten. Hem i glad tumas taem 25 memba blong famle blong hem oli kam, mo biaen 4 long olgeta oli stadi Baebol.
4. ?Wanem plan we yumi mas mekem naoia, mo from wanem?
4 Mekem Plan Naoia: Plante pablisa oli save mekem moa wok long tufala manis ya, Maj mo Eprel. Sipos yu gat ol pikinini no ol Baebol studen we oli stap gohed gud, maet i wan gudfala taem blong oli save kam wan pablisa we i no baptaes yet. Naoia i taem blong mekem ol plan blong joen fulwan long kampen ya we i blong talemaot dei ya blong tingbaot bigfala lav we Jeova mo Jisas tufala i soemaot.—Jon 3:16; 15:13.