Wok Blong Prij i Soemaot Lav We Yumi Gat Long God
1. ?Lav we Jisas i gat long God i pusum hem blong mekem wanem?
1 Lav i pusum Jisas blong mekem wok blong prij. Evri samting we Jisas i mekem long wok blong prij i pruvum lav ya we hem i gat long Jeova. Jisas i talem se: “Mi mas mekem ol man long wol oli save we mi lavem Papa blong mi, mo mi stap mekem ol samting nomo we hem i talem long mi blong mi mekem.” (Jon 14:31) Yumi we yumi wantem folem eksampol blong Jisas, yumi gat janis tu blong soemaot bigfala lav blong yumi i go long God, taem yumi mekem wok blong prij.—Mat. 22:37; Efes. 5:1, 2.
2. ?Olsem wanem lav we yumi gat long Jeova i gat paoa long wok blong prij we yumi mekem?
2 “Mekem Nem Blong Yu i Tabu”: Taem yumi gat strong tingting blong tekem evri janis blong toktok long narafala long saed blong Jeova mo Kingdom blong hem, yumi stap soemaot lav we yumi gat long God, mo i olsem we yumi letem Jeova i yusum yumi blong soemaot long ol man se nem blong hem i tabu. (Sam 83:18, NW; Esik. 36:23; Mat. 6:9, NW) Wok blong prij we Jisas i mekem, i soemaot se nem blong Jeova i tabu. Long sem fasin, taem yumi gohed blong prij, yumi soemaot oltaem we yumi wantem we nem blong Jeova i tabu mo we God i mekem ol samting we hem i wantem i kamaot long wol ya.—Mat. 26:39.
3. ?Long wanem rod, lav we yumi gat long Jeova i givhan long yumi blong winim ol traem?
3 Lav i Pulum Yumi Blong Winim Ol Traem: Taem yumi lavem Jeova bambae yumi save winim olgeta traem. (1 Kor. 13:4, 7) Jisas i gotru long plante samting long laef blong hem we i save blokem hem long wok blong prij. Be taem Jisas i fesem ol traem, bigfala lav blong hem mo tingting ya blong wantem mekem ol samting we Jeova i wantem, i givhan long hem blong winim ol traem ya. (Mak 3:21; 1 Pita 2:18-23) Yumi evriwan i fesem plante traem tu, be lav we yumi gat long God i givhan long yumi blong winim ol traem ya. Taem yumi folemgud eksampol blong Jisas Kraes, samting ya i mekem yumi no fraet mo yumi gohed blong mekem wanem we yumi naf blong mekem long wok blong prij. Nating se famle i agens, yumi sik, yumi kam olfala, no bighaf blong ol man oli no intres, be ol samting ya oli no stopem yumi, yumi gohed oltaem blong mekem wok blong prij from we wok ya nao i soemaot lav we yumi gat long Jeova.
4. ?Lav we yumi gat long Jeova i givim wanem janis long yumi?
4 Lav i gat paoa mo yumi glad tumas from we wok blong prij i givim janis long yumi blong soemaot se yumi lavem God fulwan. (1 Kor. 13:13) Yumi stap kam klosap moa long taem ya we nem blong Jeova bambae i kam tabu blong olwe, taswe i gud we oltaem “yumi stap lavlavem yumi moa.”—Fil. 1:9; Mat. 22:36-38.