?Yu Yu Rere Finis Blong Givim Witnes Long Skul?

1. ?Wanem ol janis we yu save gat long skul?

¹ Nomata sipos hemia faswan yia blong yu long skul, no hemia wan narafala yia blong yu bakegen, be yufala ol yangfala Kristin yufala i fesem plante traem mo wari. Be yufala i gat plante janis tu blong givim “witnes long trutok.” (Jon 18:37, NW) ?Olsem wanem? ?Yu yu rere finis blong givim witnes long skul?

2. ?Olsem wanem yu yu save rere from skul?

² Blong givhan long yu blong wingud long evri samting long laef blong yu, yu kasem plante trening long Jeova, long papa mama blong yu, mo long slef ya we i stret mo waes. (Prov. 1:8; 6:20; 23:23-25; Efes. 6:1-4; 2 Tim. 3:16, 17) I sua se naoia yu save finis wanem ol traem we bambae yu fesem long skul. Wetem trening we i kamaot long God, mo save we yu yu gat long saed blong ol traem ya, yu mas rerem yu blong yu save prij. (Prov. 22:3) I gud we yu tingting gud long ol save mo advaes blong Baebol we oli stap long tufala buk ya Young People Ask, we oli save givhan long yu, mo haf ya “Ol Yangfala Oli Askem,” we i stap kamaot oltaem long magasin ya Wekap!

3. ?Wanem ol rod blong yu save givim witnes long ol man?

³ Skul i olsem teritori blong yu, mo long ples ya yu gat plante rod blong givim witnes long ol man. Taem ol narafala oli luk ol fasin blong yu, ol klos blong yu, respek we yu gat long ol fren mo tija blong yu, ol mak we yu kasem long skul, fasin blong yu blong mekem hea blong yu, mo taem oli harem ol toktok blong yu, bambae oli kasem save se laef blong yu i stanap long wan strong fandesen. Samfala oli save askem long yu se: “?From wanem yu yu defren long ol narafala pikinini?” (Mal. 3:18; Jon 15:19) Maet bambae wan rod i open blong yu save prij mo eksplenem bilif blong yu. (1 Tim. 2:9, 10) Taem yia ya i stap pas, i sua se bambae yu fesem ol traem olsem ol lafet blong leftemap kantri mo ol holide. Sipos samfala oli askem long yu se from wanem yu no joen long ol lafet ya, ?bambae yu yu ansa olsem wanem? ?Bambae yu talem nomo se: ‘Hemia i agensem jos blong mi; mi mi wan Witnes blong Jeova,’? no,?bambae yu tekem janis ya blong givim witnes long saed blong Papa blong yu we i gat lav, Jeova? Sipos yu letem Jeova i lidim yu blong yu rere gud from ol traem olsem, hemia bambae i mekem se yu rere blong givim wan gudfala witnes long ol tija, ol fren long skul, mo ol narafala man.—1 Pita 3:15.

4. ?From wanem yu save trastem se bambae yu gat wan gudfala yia long skul?

⁴ Nating sipos yu harem se yu fraet lelebet blong prij long skul, yu mas save se plante oli wantem se yu gat wan gudfala yia long skul, mo oli stap sapotem yu. Mo tu, mifala i glad wetem yu long janis ya we yu yu gat blong prij long olgeta long teritori ya we yu nomo yu save prij long hem. !Taswe, i gud we yu no fraet mo yu rere blong givim witnes long skul!