?Wetaem Yumi Mas Gobak Visitim Wan Man Bakegen?
1. ?Blong pulum ol man oli kam man blong Kraes, yumi mas mekem wanem?
1 Blong mekem wok ya blong pulum ol man oli kam man blong Kraes, yumi mas gobak visitim olgeta we oli soemaot se oli wantem lanem moa long saed blong Kingdom blong Jeova. (Mat. 28:19, 20) Blong putum wan stret taem blong visitim man bakegen, plante taem, i nidim blong skelem ol plan blong yumi mo ol plan blong hemia we i soem intres long trutok. ?Taem yumi storian wetem wan man finis, from wanem yumi mas gobak visitim hem kwiktaem?
2, 3. ?From wanem yumi mas traehad blong gobak kwiktaem blong visitim ol man we oli intres?
2 ?From Wanem Yumi Mas Gobak Kwiktaem? I no longtaem, wok ya blong “talemaot gud nius blong Kingdom” bambae i finis mo en blong ol rabis fasin long wol ya tu i kam klosap finis. (Mat. 24:14, NW; 1 Pita 4:7) Taswe, from we yumi stap yet long “dei ya blong sevem” olgeta we oli intres long trutok, yumi mas lesin long advaes ya se yumi mas ‘strong blong talemaot tok ya.’ Hemia i minim tu se yumi mas gobak kwiktaem blong visitim ol man we oli soemaot intres, blong mekem se intres blong olgeta i gru.—2 Kor. 6:1, 2; 2 Tim. 4:2.
3 Setan i stap hareap tumas blong tekemaot sid blong Kingdom we yumi planem long hat blong man we i intres long trutok. (Mak 4:14, 15) Plante taem, ol memba blong famle, ol man long ples blong wok mo ol narafala man bakegen oli jikim olgeta we oli soem intres long trutok. Taem yumi gobak kwiktaem, yumi save givhan long man blong save moa long saed blong faswan storian blong yumi wetem hem, bifo we ol narafala oli winim hem, nao hem i no moa intres long trutok.
4. ?Long taem blong faswan storian, olsem wanem yumi save mekem rere rod blong visitim man bakegen?
4 Mekem Wan Plan: Bifo we yu lego man blong haos, yu mas mekem plan blong gobak visitim hem bakegen. Blong mekem olsem, yu save stanemap wan kwestin mo talem long man ya se long nekis visit bambae yu ansa long kwestin ya. I gud blong raetemdaon nem, adres, telefon mo sam narafala samting long saed blong man ya mo wetaem yu promes long hem blong gobak. Sipos i oraet long yu, maet yu save talem long man ya se bambae yu gobak long nekis dei no long tu no tri dei biaen. Sipos yu prij long wan man long wiken mo man ya i wok long ol dei blong wik, maet hem i agri blong yutufala i save storian bakegen long nekis wiken. Taem yu mekem plan blong gobak visitim man bakegen, yu mas holem promes blong yu.—Mat. 5:37.
5. ?Olsem wanem yumi folem tok blong Jisas blong mekem disaepol taem yumi gobak kwiktaem blong visitim wan man?
5 Yumi gat gudfala risen blong visitim kwiktaem ol man we oli intres long trutok. Taswe, mekem wan plan mo gobak kwiktaem from we i “no gat plante taem i stap.” (1 Kor. 7:29) Sipos yumi gobak kwiktaem blong visitim olgeta we oli intres long mesej blong Kingdom, bambae yumi kasem plante gudfala frut from traehad blong yumi.