Yu Save Yusum Gud Traket Ya
1. ?Traket ya, ?Yu Yu Wantem Save Trutok? i givhan long yumi blong mekem wanem?
1 Ol Witnes blong Jehova oli wokem traket ya, ?Yu Yu Wantem Save Trutok? Traket ya i blong halpem yumi blong statem Baebol stadi wetem ol man. Be tu, hem i wan gudfala tul we yumi save yusum blong mekem sid blong trutok i kasem olgeta ples blong wol. (Prija 11:6) Hemia sam advaes we oli save halpem yumi, blong yumi yusum gud traket ya.
2. ?Yumi save statem wan storian long traket ya olsem wanem?
2 Blong Statem Wan Storian: Maet taem yu givim traket ya long man blong haos, i gud blong soem ol kwestin we oli stap long fored blong traket, mo yu save askem se: “?Weswan long ol kwestin ya we yu yu bin tingbaot?” Afta we man i talemaot tingting blong hem, yu mas tokbaot ol vas blong Baebol we oli stap blong ansarem kwestin blong hem. Mo yu save ridim wan long ol vas blong Baebol we oli raetem. Yu save ridim, no tokbaot ol bigfala poen we oli stap long las pej, mo yu save seremaot buk ya, Baebol Tijim. Nating sipos hem i no wantem tekem buk ya, be, wan gud samting se, hem i kasem traket ya finis. Maet ol save blong trutok we oli stap long traket ya, bambae oli save go dip long hat blong hem.—Mat. 13:23.
3. ?Sipos wan man blong haos i bisi, maet yumi save mekem wanem?
3 Sipos Man Blong Haos i Bisi: Maet yu save talem se: “From we yu yu bisi, mi save livim traket ya wetem yu. I gat ol sikis stamba kwestin we bighaf blong yumi i stap askem, mo Baebol i givim wan stret ansa long ol kwestin ya wanwan. Taem bambae mi kam luk yu nekis wik, yu save talemaot tingting blong yu.”
4. ?Bambae yumi talem wanem taem yumi seremaot traket ya long rod?
4 Taem Yumi Prij Long Rod: Yu save talem long man se: “Halo. ?Yu yu askem wan long ol kwestin ya samtaem? [Yu save letem man i ansa.] Traket ya i soemaot ol gudfala ansa we oli klia, we oli kamaot long Baebol.” Sipos hem i no hareap, maet yu save tokbaot wan long ol ansa we oli stap long traket ya, mo tu, yu save seremaot buk ya, Baebol Tijim.
5. Yumi save yusum traket ya olsem wanem taem yumi go long ol haos we yumi no faenem man long olgeta?
5 Ol Haos We Yumi No Faenem Man Long Olgeta: Long sam teritori, plante taem ol pablisa oli livim ol traket long ol haos we oli no faenem man long olgeta. Sipos hemia nao rod we kongregesen we yu stap long hem i yusum, yu save livim traket ya tu, ?Yu Yu Wantem Save Trutok? Taem yu go blong luk man blong haos, yu save talem long hem se: “?Taem mifala i pas las wik, mifala i no faenem yu, ale mifala i lego traket ya long doa blong yu. ?Weswan long ol kwestin ya, we yu yu wantem save ansa blong hem?”
6. ?Wanem samting i mekem se traket ya, ?Yu Yu Wantem Save Trutok?, i wan gudfala tul blong yusum long wok blong prij?
6 Traket ya, ?Yu Yu Wantem Save Trutok?, i tokbaot ol trutok blong Baebol long fasin we i isi mo i klia. Hem i save pulum tingting blong ol man blong ol defdefren skul, mo ol man we oli gat ol defdefren kastom. I isi blong soemaot traket ya, ol yangfala pablisa mo ol niuwan tu oli naf blong givimaot long ol man. ?Olsem wanem? ?Yu yu stap yusum gud traket ya?