!Yumi Soemaot Se Yumi Glad We Oli Kam!
1. ?Wetaem yumi evriwan i gat janis blong givim witnes? ?Yumi mekem samting ya olsem wanem?
1 I no gat wan taem we i moa gud blong givim witnes, i bitim taem blong Memoriol. Long yia ya, maet bambae i gat bitim 10 milian man long wol oli joen wetem yumi long Memoriol. Bambae oli harem ol tok we i soemaot bigfala samting we Jehova mo Jisas tufala i mekem from we tufala i lavem yumi. (Jon 3:16; 15:13) Bambae oli kasem save long ol blesing we Jehova i save givim long olgeta from sakrefaes blong Jisas. (Aes. 65:21-23) Long taem ya, i no brata we i mekem tok nomo we i givim witnes long ol man. Yumi evriwan i gat janis blong mekem olsem, taem yumi soemaot long ol man se yumi glad we oli kam.—Rom 15:7.
2. ?Yumi save mekem wanem blong soemaot long man se yumi glad we hem i kam?
2 Taem yu stap wet blong miting i stat, yu save sekhan wetem ol niuwan we oli kam. I moa gud yu mekem olsem, i bitim we yu go sidaon kwaet nomo. Ol niuwan oli fraet mo oli no save se miting ya i olsem wanem. Taem yu sekhan mo yu toktok gud wetem olgeta, oli no moa fraet mo oli glad blong stap wetem yumi. I gud yu askem long man sipos hemia fastaem blong hem blong kam long miting, no maet hem i save wan Witnes blong Jehova. Maet hem i talem se hem i kam from we hem i kasem wan pepa blong Memoriol. Yu save talem long hem blong i kam sidaon wetem yu blong serem Baebol mo buk blong singsing. Sipos yufala i mekem Memoriol long Haos Kingdom, yu save tekem hem i goraon blong i lukluk ol samting insaed. Afta long miting ya, yu askem long hem sipos hem i gat sam kwestin. Sipos yufala i mas kamaot kwiktaem from we narafala grup bambae i kam insaed, yu save talem long hem se: “Mi mi wantem tumas blong save tingting blong yu long program ya. ?Yu yu gat wan mobaelfon we mi save kasem yu long hem?” Biaen yu mekem plan blong ring long hem. Ol elda tu bambae oli tekem janis blong leftemap tingting blong ol pablisa we oli no moa prij.
3. I impoten tumas we yumi soemaot long ol man se yumi glad we oli kam. ?From wanem?
3 Plante man we oli kam, maet hemia i fastaem blong olgeta blong luk we ol Witnes blong Jehova oli glad, oli gat pis, mo oli joen gud, i olsem we oli stap long paradaes finis. (Sam 29:11; Aes. 11:6-9; 65:13, 14) Taem oli gobak long haos blong olgeta, ?wanem samting we bambae oli tingbaot? Ansa blong kwestin ya i dipen long fasin we yumi mekem long olgeta taem oli kam long Memoriol.