I Gud Yumi Tingbaot Ol Profet Ya—Amos
1. ?From wanem eksampol blong Amos i save leftemap tingting blong yumi?
1 ?Samtaem yu yu harem se yu no naf blong prij, from we yu no skul gud, mo yu kamaot long wan famle we i no gat haenem? Sipos yes, i gud yu folem eksampol blong profet Amos. Amos, hem i wan man blong lukaot long sipsip mo samtaem long yia, hem i wok long garen. Nating se i olsem, Jehova i givim paoa long hem, blong hem i talemaot wan mesej we i impoten tumas. (Amos 1:1; 7:14, 15) Tede tu, Jehova i yusum olgeta we tingting blong olgeta i stap daon, blong oli mekem wok blong hem. (1 Kor. 1:27-29) ?Wanem narafala samting we yumi save lanem long eksampol blong profet Amos, we i save givhan long yumi long wok blong prij?
2. ?From wanem yumi naf blong stanap strong, taem ol man oli agensem yumi?
2 Hem i Stanap Strong Taem Ol Man Oli Agensem Hem: I gat wan pris blong ol ten laen blong kingdom blong Isrel long not, nem blong hem Amajia, hem i harem ol tok we Amos i stap talemaot. Nao hem i talem long Amos se: ‘!Yu gobak! !Yu lego mifala! !Mifala i gat skul blong mifala finis!’ (Amos 7:12, 13) Amajia i go talemaot ol tok blong Amos long King Jeroboam, be hem i twistim ol tok blong Amos. Nao from samting ya, oli putum tabu long wok we Amos i stap mekem. (Amos 7:7-11) Be Amos i no fraet. Tede tu, sam lida blong skul oli pulum ol man blong politik, blong oli traehad blong stopem wok we ol man blong Jehova oli stap mekem. Be Jehova i talem long yumi se, i no gat wan samting blong faet we i save mekem yumi karikil. Bambae hem i blokem gud yumi, i mekem yumi win.—Aes. 54:17.
3. ?Wanem tufala impoten mesej we yumi stap talemaot tede?
3 Hem i Talemaot Ol Jajmen Mo Ol Blesing Blong God: Amos i talemaot jajmen blong God agensem ol ten laen blong Isrel. Be long en blong buk we hem i raetem, hem i tokbaot promes blong Jehova blong mekem olgeta samting oli kam niuwan bakegen, mo ol blesing we Jehova bambae i givim long ol man. (Amos 9:13-15) Yumi tu, yumi stap talemaot “bigfala dei ya we God bambae i jajem” ol man long hem. Hemia tu i wan haf blong ‘gud nius blong kingdom’ we yumi mas talemaot. (2 Pita 3:7; Mat. 24:14) God bambae i yusum bigfala faet ya Amagedon, blong mekem rod blong paradaes i kamtru long wol. Bambae hem i mekem olsem, taem hem i finisim olgeta rabis man.—Sam 37:34.
4. ?Yumi mas gat wanem tingting, nating se ol man oli agensem yumi?
4 Taem yumi stap talemaot gud nius blong Kingdom, ol man oli agensem yumi. Oli wantem luk sipos yumi naf blong holemstrong long Jehova, mo sipos yumi gat strong tingting blong mekem samting we hem i wantem. (Jon 15:19) Nating se ol man ya oli mekem olsem, yumi sua se Jehova bambae i gohed blong givhan long yumi, olsem we hem i bin mekem long Amos. Bambae hem i gohed blong givim ol samting we yumi nidim, blong yumi save finisim wok ya we hem i wantem yumi blong mekem.—2 Kor. 3:5.