Yu Givhan Long Man We i No Rere Yet Blong Stadi Long Buk Ya Baebol Tijim
1. ?Yu ting se olgeta man bambae oli akseptem buk ya Baebol Tijim? Yu eksplenem.
1 Wan man we i wantem kam mekem wosip long Jehova, hem i mas save samting we Baebol i tijim. Be ol man wanwan oli defdefren. Samfala oli no bilif long God, mo oli no luk Baebol olsem tok blong God. Sam narafala oli no bilif long God nating, mo oli no respektem Baebol. ?Wanem buk yumi save yusum blong givhan long man we i no akseptem buk ya Baebol Tijim? Ol haf we oli kam biaen, bambae oli tokbaot samting we ol pablisa long 20 defren kantri oli talem.
2. Sipos wan man i talem long yumi se hem i no bilif long God, ?yumi mas kasem save long wanem, mo from wanem?
2 Olgeta We Oli No Bilif Long God: Sipos man i talem se hem i no bilif long God, i gud we yu faenemaot fastaem from wanem hem i gat tingting olsem. ?Maet hem i bilif long evolusen? ?Hem i no moa bilif from hem i luk se wol i fulap long kruked fasin, no ol skul oli gat tu fes? ?Hem i stap long wan kantri we oli blokem ol man blong oli no bilif long God? No maet oli no wantem bilif se God i stap, from oli harem se oli no nidim God. Plante pablisa oli askem long man se, “?Yu yu gat tingting ya longtaem finis?” Taem yumi askem kwestin olsem, yumi pulum man ya blong talemaot tingting blong hem. Mo taem man ya i stap toktok, yumi mas lesen gud long hem, mo yumi no katem toktok blong hem. Taem yumi kasem save from wanem man ya i no bilif long God, bambae yumi save olsem wanem blong givim ansa long hem. Mo tu, bambae yumi save wanem buk bambae yumi givim long hem.—Prov. 18:13.
3. ?Yumi save mekem wanem, blong soemaot se yumi respektem man mo bilif blong hem?
3 Taem yumi givim ansa long man olsem, yumi mas lukaot gud se yumi no mekem man i harem se yumi agensem tingting blong hem. Yu traem luk samting we ol man long Yunaeted Stet oli talem se: “Ol man wanwan oli fri blong jusum bilif blong olgeta, taswe i impoten tumas blong respektem tingting blong olgeta. Yumi no traem blong talem long olgeta se, tingting blong olgeta i rong. Defren olgeta, i gud yumi askem kwestin we i mekem olgeta oli tingting, mo blong olgeta nomo oli traem faenem ansa blong kwestin ya.” Wan distrik elda i mekem olsem. Taem man blong haos i talemaot tingting blong hem finis, elda ya i statem ansa blong hem olsem se: “?Samtaem yu yu tingbaot sipos God i stap?”
4. ?Sipos yumi prij long ol Budis, olsem wanem yumi save givhan long olgeta?
4 Plante Budis oli no save God. Sam pablisa long Briten oli yusum buklet ya Lasting Peace and Happiness—How to Find Them, blong prij long ol man olsem. Fastaem oli talem wan smol fastok we i pulum tingting blong man i go long buklet ya, biaen oli tokbaot haf ya se, “Is There Really a Most High Creator?” mo afta long hemia oli tokbaot, “A Guidebook for the Blessing of All Mankind.” Taem oli tokbaot ol haf ya finis, oli soemaot buk ya Baebol Tijim long man blong haos, mo oli talem long hem se, “Mifala i save se yu yu no bilif long God. Be sipos yu stadi long Baebol, hemia bambae i givhan long yu bigwan, from we i gat plante gudfala advaes insaed long hem.” Wan paenia brata long Yunaeted Stet we i stap prij long ol Jaenis, i talem se: “Plante man long ol teritori blong mifala oli laekem tumas blong rid. Plante taem, oli ridim ful magasin bifo we mifala i gobak. Be oli no kasem save yet se Baebol stadi i olsem wanem. Taswe, taem mi prij, mi givim buklet ya Gud Nius long olgeta, from we oli raetem long fasin we i pulum man blong storian.” Wan eria elda long Yunaeted Stet we i lukaot long eria blong ol Jaenis, i talem se, long wok blong prij, yumi save soemaot buk ya Baebol Tijim long olgeta long fastaem we yumi prij long olgeta. Be, i moa gud blong statem stadi long japta 2 blong buk ya we i tokbaot Baebol, i bitim we yumi go stret long japta 1 we i tokbaot God.
5. ?From wanem i impoten we yumi gat longfala tingting?
5 I tekem longtaem blong wan man olsem, i bilif long God. Taswe i impoten tumas we yumi gat longfala tingting. Ating long fastaem we yu storian wetem hem, maet hem i no save agri se God i stap. Be taem ol yia oli pas, bambae hem i luksave se maet i tru, no maet hem i talem se hem i kasem save from wanem sam man oli bilif se God i stap.
6. ?From wanem sam man oli no bilif long Baebol?
6 Olgeta We Oli No Intres No Oli No Trastem Baebol: Plante taem, wan man i luksave se God i stap, be hem no intres long Baebol, from hem i no bilif se Baebol i tok blong God. Maet from we hem i laef long wan kantri we ol man oli no Kristin, mo oli luk Baebol olsem buk blong ol Kristin. No maet hem i laef long wan Kristin kantri, be ol man long kantri ya oli tinghae moa long ol samting blong wol i bitim Baebol. Taswe hem ting se Baebol i no save givhan long laef blong hem. Ale, ?yumi save mekem wanem blong givhan long ol man olsem blong oli laekem Baebol, mo oli glad blong stadi long buk ya Baebol Tijim?
7. ?Long wanem rod yumi save pulum man blong intres long Baebol?
7 Branj ofis long Gris i raetem wan leta i talem se: “Wan rod nomo we i save givhan long ol man we oli no trastem Baebol, i blong openem Baebol mo soemaot long olgeta, ol save we i stap insaed. Plante pablisa oli luk se mesej we i stap long Baebol, i gat moa paoa blong kasem hat blong man, i bitim eni narafala toktok we yumi save talem. (Hib. 4:12) Taem yumi soemaot long olgeta nem blong God long Baebol, hemia i mekem se plante man oli wantem tumas blong save samting we i stap insaed long Baebol.” Branj ofis blong India i talem se: “Trutok long saed blong laef mo ded, i pulum tingting blong plante man Hindu. Mo tu, wan narafala samting we i pulum olgeta, hemia promes ya blong Baebol se, ol man long wol bambae oli no moa seraot.” Plante pablisa oli tingbaot ol samting we oli stap hapen long ples blong olgeta, nao oli yusum Baebol blong soemaot se Kingdom blong God, bambae i finisim ol samting ya.
8. ?Yumi save talem wanem long man we i gat rong tingting long Baebol?
8 Sipos wan man i gat rong tingting long Baebol from ol giaman skul, i gud yu mekem hem i luksave se ol giaman skul oli twistim tok blong God, mo ol tijing blong hem. Branj ofis long India i talem se: “Samtaem yumi mas givhan long ol man blong oli luksave se, ol tok blong Baebol oli no kamaot long ol jos.” Oli talem se plante taem, ol Hindu oli laekem stadi 4 long buklet ya What Is the Purpose of Life? How Can You Find It? Hemia from we, hem i eksplenem olsem wanem ol jos oli spolem mo twistim Tok blong God. Wan paenia brata long Brasil, i talem long ol man se: “I moa gud blong save wanem we Baebol i tokbaot. Plante man oli ridim Baebol from oli wantem save samting we i stap insaed, be i no blong sapotem tingting blong wan skul. Sipos yu tu yu mekem olsem, bambae yu sapraes long ol samting we yu lanem.”
9. Sipos yumi prij long wan man we i no wantem save samting we Baebol i tijim, ?yumi no mas mekem wanem, mo from wanem?
9 Jehova i lukluk hat blong ol man wanwan. (1 Saml. 16:7; Prov. 21:2) Hem i stap pulum ol man we hat blong olgeta i stret, blong oli kam long tru wosip. (Jon 6:44) Plante long ol man ya, oli neva harem trutok, no maet oli gat smol save nomo long Baebol. Be wok blong prij nao, i givim janis long olgeta blong “save trutok,” mo blong ‘God i save sevem olgeta.’ (1 Tim. 2:4) !Be sipos i gat samfala we oli no wantem nating blong save samting we Baebol i tijim, yu no mas letem tingting blong yu i foldaon! Yu traem yusum wan narafala buk blong traem pulum tingting blong olgeta. Biaen yu tokbaot sam samting we bambae i pulum olgeta i go long buk ya ?Wanem Samting We Baebol i Rili Tijim?, we yumi yusum blong mekem stadi long man.
[Tok blong pija long pej 4]
Sipos man blong haos i talem se, hem i no bilif long God, yu traem mekem olsem:
• Yu askem long hem se, “?Yu gat tingting ya longtaem finis?”
• Sipos hem i wan Budis, i gud yu yusum buklet ya, Lasting Peace and Happiness—How to Find Them, long pej 9-12.
• Sipos hem i bilif long evolusen, yu yusum:
Wekap! long haf ya, “?I Gat Wan Man We i Wokem Samting Ya?”
DVD ya, The Wonders of Creation Reveal God’s Glory
Buklet ya, A Satisfying Life—How to Attain It, stadi 4; Was Life Created?; mo The Origin of Life—Five Questions Worth Asking
• Sipos hem i no moa bilif long God, from hem i luk se i gat fulap kruked fasin, ol man oli safa, yu yusum:
Buk ya, Is There a Creator Who Cares About You?, long japta 10
Buklet ya, ?God i Rili Kea Long Yumi?, haf 6, mo What Is the Purpose of Life?, haf 6
• Taem yu luk se man blong haos i stat blong agri se God i stap, yu jenisim buk i go long Baebol Tijim. I moa gud blong statem long japta 2, no wan narafala haf we i stret long hem.
[Tok blong pija long pej 5]
Sipos man blong haos i no bilif long Baebol, yu traem mekem olsem:
• Yu traem luk japta 17 mo 18 blong buk ya, Life—How Did It Get Here? By Evolution or by Creation?
• Ol Hindu. Yu yusum buklet ya, Why Should We Worship God in Love and Truth?
• Ol man Jiu. Yu yusum buklet ya, Will There Ever Be a World Without War?, pej 3-11.
• Yu tokbaot ol gudfala frut we i kamaot, taem yumi folem ol rul blong Baebol. I gat plante advaes blong Baebol we oli wok gud. Yu save soemaot:
Wekap! long haf ya, “Advaes Long Famle”
DVD ya, The Bible—Its Power in Your Life
Buklet ya, !Gud Nius We i Kamaot Long God!, long stadi 9 mo 11. Buklet ya, A Book for All People, pej 22-26; mo A Satisfying Life—How to Attain It, stadi 2
Ol Budis. Yu yusum buklet ya, The Pathway to Peace and Happiness, pej 3-7.
Ol Muslim. Yu yusum buklet ya, Real Faith—Your Key to a Happy Life, long stadi 3.
Sipos yu prij long wan man we i no laekem Baebol, i gud yu soemaot se toktok blong yu i no kamaot long Baebol. Maet yu save tokbaot Baebol wetem hem, afta we yu visitim hem plante taem.
• Yu eksplenem long hem olsem wanem ol profet tok blong Baebol oli kamtru. Yu save yusum:
DVD ya, The Bible—Accurate History, Reliable Prophecy
Buklet ya, A Book for All People, pej 27-29
• Sipos yu harem se man ya i stap askem plante kwestin long saed blong ol samting we Baebol i tijim, i gud yu jenisim buk i go long Baebol Tijim.
[Tok blong pija long pej 6]
Sipos man blong haos i talem se: “Mi mi no bilif long God,” yu save talem se:
• “?Yu yu glad sipos mi eksplenem long yu smoltaem, samting we i pulum mi blong bilif se i gat wan God we i wokem olgeta samting?” Biaen yu tokbaot poen ya we i stap long Reasoning buk pej 84-86, no maet yu mekem plan blong givim wan buk long hem we yu laekem tumas blong ridim.
• “Be sipos i gat wan God, ?yu yu wantem se hem i olsem wanem?” Plante man we yumi mitim olgeta, oli ansa se, oli wantem kam klosap long wan God we i lavem man, fasin blong hem i stret, mo i gat sore mo i mekem i sem mak long olgeta man. Yu soemaot long hem long Baebol we God i gat ol fasin ya. (Maet yu save yusum japta 1 blong buk ya Baebol Tijim, long haf 6.)
Sipos man blong haos i talem se: “Mi mi no bilif long Baebol,” yu save talem se:
• “Plante man oli gat tingting olsem. Samfala oli ting se Baebol i no tokbaot saens mo ol rul blong hem oli no wok gud. Yu talem long mi, ?yu yu ridim Baebol finis? [Yu letem man i ansa. Biaen yu soem fastok blong buklet ya, A Book for All People we i stap long pej 3, mo yu givim long hem.] Plante man oli no moa tinghae long Baebol, from ol jos oli twistim ol tijing blong hem. Nekis taem, mi glad blong soem sam eksampol long yu we oli stap long pej 4 mo 5.”
• “Plante man oli gat sem tingting olsem yu. ?Yu yu glad sipos mi soem long yu wan samting long Baebol we mi mi sapraes long hem? [Yu ridim Job 26:7 no Aesea 40:22, we i soemaot se Baebol i tok tru long saed blong saens.] Baebol i tokbaot tu, ol waestok we oli save givhan long ol famle. Nekis taem, mi save soem wan eksampol long yu.”
• “Tangkiu blong talemaot tingting blong yu. Sipos God i bin raetem wan buk blong ol man, ?yu ting se buk ya i tokbaot wanem?” Biaen yu soemaot long man ya, wan tok long Baebol we i laenap wetem tingting blong hem.