Sam Stori

◼ Ostrelia: Jon i wan man we i skul gud. Taem hem i smol hem i stap go long jos, be biaen hem i “bilif strong se i no gat God.” Wan paenia brata i givim buklet ya, Was Life Created, long hem mo biaen taem hem i kambak, hem i givim buklet ya, Origin of Life long hem. Brata ya i gohed blong tekem ol niufala magasin we oli tokbaot ol samting we God i wokem no ol profet tok blong Baebol, i go givim long hem. Taem hem i luk we Jon i rere, hem i givim buk ya, The Bible—God’s Word or Man’s? long hem. Afta we Jon i ridim buk ya, hem i talem se hem i “no moa bilif strong se i no gat God olsem fastaem.” Biaen, brata ya i givim buk ya Baebol Tijim long hem, mo i soem long hem pej 20 haf 8 mo pej 23 mo 24 haf 13 kasem 16. Ol vas we oli stap long haf ya oli mekem Jon i sapraes tumas, nao hem i talem se: “Ating i moa gud mi stadi long Baebol bakegen.”

◼ Meksiko: Wan man i talem long wan brata se hem i no bilif se Baebol i kamaot long God. Ale, brata i askem, sipos hem i save soemaot long man ya, ol pruf we oli soemaot we Baebol i kamaot long God. Tufala i storian plante, biaen man ya i stat blong harem nogud from samting we hem i lanem long Baebol. Samting we i pulum tingting blong hem moa, hemia ol rul blong God. Hem i talem long brata ya se: “Fastaem, taem we yumitu ridim Baebol mi luk se ol advaes blong hem oli sem mak nomo long ol narafala buk, mo i no gat paoa long mi nating. Be naoia taem yumitu ridim, antap moa ol advaes long saed blong ol rabis fasin mo gudfala fasin, hemia i mekem mi harem nogud tumas.”

◼ Yunaeted Stet: Wan man mo woman blong hem tufala i prij long ol bigfala taon we oli bisi. Nao tufala i mitim wan woman Taewan, we i bilif long God be i ting se Baebol i wan buk blong ol man long ol kantri long wes. Woman ya i kam lukluk ol magasin from we hem i harem nogud, nating we hem i gat gudfala laef. Hem i ting se Baebol nao bambae i givhan long hem blong save from wanem hem i laef. Brata mo sista ya, tufala i stat stadi wetem hem long buk ya, Baebol Tijim, mo buklet ya Lasting Peace and Happiness—How to Find Them. Olgeta oli no stat long japta 2 blong buk ya, be oli go stret long wan haf blong buklet ya we nem blong hem, “A Guidebook for the Blessing of All Mankind.” Taem oli finisim ol fas sikis paragraf, woman ya i sapraes blong luk se Baebol i defren long ol narafala buk blong jos. Afta we oli stadi long ol profet tok we oli kamtru, woman ya i talem se: “!I no gat wan narafala buk we mi tingbaot we i stret gud olsem Baebol!”

◼ Japan: Wan man i talem long wan brata se hem i no bilif long God. Ale brata ya i gohed blong visitim hem. Hem i soem haf ya, “?I Gat Wan Man We i Wokem Samting Ya?” we i stap insaed long Wekap! Sloslo, man ya i jenisim tingting blong hem mo i agri se i gat wan man we i wokem olgeta samting. Naoia hem i bilif se God i stap, mo brata ya i mekem Baebol stadi wetem man ya long buklet ya, !Gud Nius We i Kamaot Long God!

◼ Kanada: Wan sista i givim niufala magasin long wan woman we i aot long haos, blong go long trak blong hem. Taem sista ya i kambak, woman ya i talem strong long hem se, hem i no intres mo hem i no bilif long God. Be sista ya i gat strong tingting blong gobak luk hem. Hem i tekem buklet ya, A Satisfying Life—How to Attain It, i go long hem. Sista ya i go long haos blong woman ya, nao i talem long hem se: “Mi mi save finis we yu no bilif long God, be mi mi tingbaot yu from mi save se yu wan nomo, yu i stap lukaot long pikinini blong yu.” Ale sista ya i openem buklet ya i go long pej 4, mo tufala i storian long paragraf 6 we i tokbaot weples man i save faenem ol gudfala advaes. Biaen, hem i leftemap tingting blong woman ya blong ridim stadi 2, we i tokbaot olsem wanem blong tijim pikinini. Woman ya i glad tumas blong karem buklet ya.