Yumi No Mas Stap Kwaet Taem Yumi Prij Wetem Narafala
1. ?Yu save folem fasin blong aposol Pol olsem wanem, taem yu prij wetem wan narafala pablisa?
1 Taem aposol Pol i prij wetem ol narafala Kristin, hem i yusum janis ya blong mekem se ‘bilif blong olgeta i save givhan long hem, olsem we bilif blong hem tu i save givhan long olgeta.’ (Rom 1:12) Taem yu prij wetem wan narafala pablisa, ?yu yu yusum janis ya blong leftemap tingting blong hem mo givhan long hem? I nogud we yu stap kwaet nomo, be i gud we yu tokbaot ol samting we oli mekem se yu yu kamgud moa long wok blong prij.
2. ?Yumi save mekem wanem blong givhan long pablisa we i prij wetem yumi, blong hem i no fraet? ?Mo from wanem i impoten we yumi mekem olsem?
2 Yumi Givhan Long Narafala Blong i No Fraet: Sam pablisa oli fraet from we oli ting se oli no naf blong mekem wok ya. Yumi luksave samting ya long fes blong olgeta mo long voes blong olgeta. Yumi save givhan long olgeta blong oli no fraet, taem yumi talem ol gudfala toktok long olgeta. ?Wanem sam narafala rod blong givhan long ol narafala blong oli no fraet? Yu traem tingbaot wan brata we i stap goraon long ol kongregesen. Hem i talem long pablisa we i prij wetem hem se fastaem, hem tu i stap fraet blong toktok long ol man, be plante taem hem i prea blong hem i save sakemaot fraet ya. Wan narafala brata i stap storian wetem pablisa we i prij wetem hem, mo i tokbaot samting we i givhan long hem blong hem i no moa fraet, i se: “Mi mi smael long man, bifo we mi statem storian. Samtaem yumi mas prea blong Jehova i givhan long yumi blong smael long ol man, nating se i wan smol samting nomo.” ?Olsem wanem? ?I gat wan samting we i halpem yu blong yu no fraet taem yu prij? I gud yu tokbaot stori blong yu long pablisa we i prij wetem yu.
3. ?Yumi save tokbaot wanem long pablisa we i prij wetem yumi, blong hem i save kamgud moa long wok blong prij?
3 Yumi Tokbaot Sam Rod We Yumi Yusum Blong Prij: ?Yu yu tingbaot wan sotfala fastok no wan kwestin, no maet yu save wan samting we i hapen long ples blong yu, we yu save yusum blong statem storian wetem ol man? ?I gat wan fastok we yu bin yusum, nao gudfala samting i kamaot from? I gud yu tokbaot ol samting ya long pablisa we i prij wetem yu. (Prov. 27:17) Taem yutufala i stap go blong visitim wan man, yu save tokbaot ol samting we yu wantem talem long visit blong yu, mo ol tingting we yu rerem finis blong mekem se visit ya i kasem gud samting we yu wantem talem long hem. Mo taem yutufala i finis long wan Baebol stadi, yu save eksplenem from wanem yu jusum blong tokbaot wan poen, wan vas, no wan fasin blong tij, blong givhan long studen ya.
4. ?From wanem yumi mas glad blong givhan long ol narafala Kristin?
4 Ol fas Kristin bifo, oli givhan long ol man we oli no bilif, be i no hemia nomo. Oli luksave tu se i impoten we oli leftemap tingting blong ol narafala Kristin, mo mekem olgeta oli kam strong moa long bilif. (Wok 11:23; 15:32) Aposol Pol i trenem gud yangfala Timoti, mo biaen hem i talem long Timoti blong i serem samting we hem i lanem long ol narafala. (2 Tim. 2:2) Yes, sipos yumi tingbaot blong mekem i gud long ol Kristin brata mo sista blong yumi, taem yumi prij wetem olgeta, bambae yumi mekem olgeta oli harem gud tumas mo oli wok strong moa long wok blong prij. Be i no hemia nomo, yumi stap mekem Papa blong yumi long heven tu, i glad tumas long yumi.—Hib. 13:15, 16.