Yu Mekem Se Manis Maj, Eprel, Mo Mei, i Wan Taem Blong Glad
1. ?Wanem i save givhan long yu blong yu harem gud moa long manis Maj, Eprel, mo Mei?
1 ?Yu yu wantem harem gud moa long manis Maj, Eprel, mo Mei? Wan samting we i save givhan long yu blong yu harem gud olsem, hemia blong spenem moa taem long wok blong prij. Mo sipos yu naf, yu save mekem haftaem paenia. ?Olsem wanem wok ya i save mekem yu yu glad moa?
2. ?Olsem wanem wok blong prij i mekem yumi glad moa?
2 Yu Save Glad Moa: I gat tu samting we oli save mekem yumi glad. Fas samting, hemia taem yumi wosipim Jehova mo yumi kasem ol samting we Jehova i givim. (Mat. 5:3) Mo nambatu, hemia taem yumi givim samting long ol narafala. (Wok 20:35) Taem yumi prij, yumi stap wosipim Jehova mo yumi givhan long ol man. Taswe i stret nomo blong talem se taem yumi spenem moa taem long wok blong prij, bambae yumi glad moa. Bambae yumi gat gudhan long wok blong prij. Ale, taem yumi gat gudhan, yumi no moa fraet blong toktok. Mo tu, yumi gat plante janis blong storian wetem ol man mo blong statem ol Baebol stadi. Olgeta samting ya oli mekem yumi glad tumas long wok blong Jehova.
3. ?From wanem Maj mo Eprel oli gudfala manis blong mekem haftaem paenia?
3 Tufala gudfala manis blong mekem haftaem paenia, hemia Maj mo Eprel. Long tufala manis ya, yumi save jusum sipos yumi wantem mekem 30 no 50 aoa. Mo tu, long Sarede 22 Maj, go kasem dei blong Memoriol long 14 Eprel, bambae yumi joen long spesel wok blong singaot ol man oli kam long Memoriol. Ol pablisa bambae oli glad tumas blong prij wetem ol narafala pablisa, olsem we “solda blong wan i joen long solda blong narawan,” blong oli finisim gud ol teritori blong kongregesen long stret taem.—Sef. 3:9, NW.
4. ?Sipos yu wantem mekem haftaem paenia, yu mas mekem wanem?
4 Yu Mas Rere Naoia: Sipos yu no mekem plan blong yu yet, i gud yu tekem taem blong lukluk bakegen long program blong yu, mo yu traem luk sam samting we yu save jenisim. Olsem nao, yu save spenem moa taem long wok blong prij, long wan long ol manis ya, no long trifala manis wantaem. I gud yu prea long Jehova long saed ya. (Jem. 1:5) Yu tokbaot plan blong yu long famle blong yu mo long ol narafala long kongregesen. (Prov. 15:22) Nating se yu sik no yu bisi tumas, be yu save kasem glad long wok blong haftaem paenia.
5. ?Sipos yumi prij moa long trifala manis ya, bambae yumi harem olsem wanem?
5 Jehova i wantem se ol man blong hem oli glad. (Sam 32:11) Sipos yumi spenem moa taem long wok blong prij long trifala manis ya, bambae yumi glad we yumi glad tumas. Be i no hemia nomo, bambae yumi mekem Papa blong yumi long heven tu, i glad tumas.—Prov. 23:24; 27:11.