Kamgud Moa Long Wok Blong Prij—Yu Givhan Long Narafala Pablisa

?From Wanem i Impoten?: Jisas i luksave se i impoten we yu folem narafala long wok blong prij. Taswe, taem hem i sanem ol seventi man blong hem blong oli go prij, hem i sanem olgeta oli go tutu. (Luk 10:1) Sipos yu prij wetem wan pablisa, nao yu luk se hem i no save ansa long man blong haos, yu save givhan long hem. (Pri. 4:9, 10) I gud yu serem save we yu gat wetem hem, no yu talem wan tingting we i save givhan long hem blong i kamgud moa. (Prov. 27:17) Yu save leftemap tingting blong hem tu, taem yutufala i stap wokbaot blong go long narafala haos.—Fil. 4:8.

?Yu Mekem Olsem Wanem?:

Taem pablisa ya i stap prij, i gud yu lesin long hem. (Jem. 1:19) Taem hem i ridim wan vas, i gud yu folem long Baebol blong yu. Olsem nao, yu save givhan long hem taem hem i nidim.
Yu mas luksave sipos i stret blong yu joen long storian no nogat, mo tu yu mas luksave wetaem i stret blong mekem olsem. (Prov. 15:23) Sipos yu folem wan narafala pablisa i go long Baebol stadi blong hem, bambae hem i glad sipos yu tu yu joen long storian. Be taem yutufala i prij, i gud yu letem hem i storian. Sipos pablisa ya i jes stat blong prij, no sipos hem i no save ansa long wan kwestin, no long man we i tok blong blokem hem, bambae hem i glad moa sipos yu givhan long hem. Sipos yu folem hem long wok blong prij, no blong mekem wan visit no wan Baebol stadi, yu no mas katem toktok blong hem, nao yu nomo yu toktok, no yu tokbaot wan defren samting.
I gud yu serem save we yu yu gat wetem pablisa we yu prij wetem hem. Sipos i gat janis, i gud yu talem sam tingting blong givhan long pablisa ya, blong i kamgud moa long wok blong prij. (Prov. 3:27) Taem yu luk se i stret, yu save askem long hem se: “?Wanem tingting blong yu long storian blong yumitu wetem man ya?” no “?Mi save talem wan samting long yu?” no yu save talem long hem se: “Samtaem mi mi mekem olsem.” I gud yu tingbaot se sam man oli glad we wanwan taem yu talem sam samting blong givhan long olgeta. Be sipos yu traem stretem evri mastik we oli mekem, bambae tingting blong olgeta i foldaon.

Yu Traem Mekem Samting Ya Long Manis Ya:

Taem yu mo narafala pablisa i finis long wok blong prij, i gud yu talem long hem bakegen ol samting we hem i mekem no i talem, we i mekem se yu yu glad tumas we hem i folem yu.