Wan Spesel Wok Blong Singaot Ol Man
1. ?Wetaem bambae yumi stat blong singaot ol man oli kam long ol asembli?
1 Sipos yu spenem plante taem mo plante mane, blong yu rerem wan gudfala kakae, bambae yu glad blong singaot ol fren mo ol famle blong yu blong oli kam kakae. Long sem fasin, ol brata oli wok had blong mekemrere bigfala kakae we bambae i kamaot long asembli blong tri dei, mo ol intenasnal asembli long yia ya. Tri wik bifo we asembli blong yumi i stat, bambae yumi gat janis blong singaot ol man oli kam. ?Wanem samting bambae i givhan long yumi blong yumi glad blong singaot olgeta?
2. ?Wanem samting bambae i mekem se yumi wantem joen fulwan long spesel wok ya?
2 Sipos yumi tingbaot ol gudfala kakae we yumi kasem long ol asembli, bambae yumi wantem joen fulwan blong singaot ol man oli kam long asembli ya. (Aes. 65:13, 14) Yumi mas tingbaot tu se, evri yia, spesel wok ya blong singaot ol man oli kam long asembli, i stap karem plante gudfala frut. Sam long ol man we yumi singaot olgeta, oli kam. Nating se plante man, no smol man nomo oli kam long asembli, be gudfala wok we yumi mekem i leftemap nem blong Jehova, mo i soemaot se hem i stap givim samting long gladhat blong hem.—Sam 145:3, 7; Rev. 22:17.
3. ?Bambae yumi seremaot pepa blong singaot ol man olsem wanem?
3 Long olgeta kongregesen wanwan, kampani blong ol elda bambae i talemaot, olsem wanem blong seremaot pepa blong singaot ol man. Bambae oli talem long yumi sipos yumi save lego pepa ya long ol haos blong man we i no stap, no sipos yumi save seremaot, taem yumi prij long pablik ples. Long ol wiken, sipos yumi luk se i stret yumi save seremaot ol magasin tu wetem pepa ya. Sipos spesel wok ya i gohed kasem fas Sarede blong manis, i moa gud yumi mekem spesel wok ya, i bitim we yumi statem Baebol stadi. Taem wok ya i finis, bambae yumi glad tumas we yumi singaot plante man, blong oli kam joen wetem yumi long bigfala kakae we Jehova i givim long yumi.