Ansa Long Wan Kwestin

◼ ?I stret blong pablisa i yusum Intenet blong prij mo blong mekem stadi long wan man long narafala kantri?

Sam pablisa oli yusum Intenet blong mekem Baebol stadi wetem wan man long kantri we gavman i putum tabu long wok blong prij, no long ples we i gat smol pablisa nomo. Samtaem i gat gudfala frut i kamaot. Nating se i olsem, trabol i save kamaot taem ol pablisa oli toktok long Intenet wetem ol strenja, no oli sanem imel long olgeta. (Yu luk Kingdom Wok Blong Yumi, Julae 2007 pej 5.) I tru, ol brata mo sista ya oli stap traehad blong talemaot Kingdom long ol man we hat blong olgeta i stret. Be hemia i save lidim olgeta blong oli toktok wetem sam man we oli olsem rabis fren, mo sam man blong apostasi tu. (1 Kor. 1:19-25; Kol. 2:8) Mo tu, long kantri we i tabu blong prij, maet gavman i stap jekem ol imel, nao oli save spolem ol brata mo sista blong yumi long kantri ya. Taswe, ol pablisa oli no mas yusum Intenet blong lukaot ol man long narafala kantri blong talemaot gud nius long olgeta.

Sipos yu prij long wan man blong narafala kantri we i kam visitim ples blong yumi, i gud yu soem long hem olsem wanem blong yusum jw.org blong faenem moa save, mo blong kontaktem branj ofis long ples blong hem. Hemia i moa gud i bitim we yu traem gohed blong storian wetem hem, taem hem i gobak long kantri blong hem. Yu talem long hem tu, se hem i save go long miting long Haos Kingdom we i stap klosap long haos blong hem. I tru, long sam kantri i no gat Haos Kingdom. Be sipos hem i wantem we ol Witnes oli kam luk hem, yu mas fulumap pepa ya Please Follow Up (S-43), mo yu givim long sekretari blong kongregesen. Hem bambae i yusum haf ya “Kongregesen” long jw.org, blong sanem. Branj ofis we i lukaot long wok blong prij long kantri we man ya i stap long hem, bambae i save rod we i beswan blong givhan long hem, from we oli save gud ol samting we i stap hapen long kantri ya.—Yu luk Kingdom Wok Blong Yumi, Jun 2014 pej 5, mo Novemba 2011 pej 2.

Sipos wan man we yu stap visitim hem i muv i go long narafala kantri, no sipos yu stap stadi wetem wan man long narafala kantri long Intenet, yu mas folem advaes we i stap antap. Be yu save gohed blong storian wetem man ya gogo wan pablisa long ples blong hem i go luk hem. Nating se i olsem, sipos wan man i stap long kantri we gavman i putum tabu long wok blong yumi, yu mas lukaot gud taem yu tokbaot Baebol long leta, long telefon, no long Intenet.—Mat. 10:16.