!Hemia From Wan Smael Nomo!

Helen i stap smael taem i stanap klosap long troli. Tu woman i wokbaot bitim hem i go.

TU YANG woman i stap wokbaot tugeta long wan bisnes eria long Baguio City, Filipin. Tufala i luk wan troli blong ol buk blong yumi, be tufala i no go klosap. Sista Helen i stap stanap klosap long troli ya, mo i smael bigwan long tufala. Tufala woman ya i wokbaot i go nomo, be tufala i glad long bigfala smael blong Helen.

Biaen, taem tufala i stap gohom long bas, tufala i luk wan Haos Kingdom we i gat wan bigfala saen long hem, we i se jw.org. Tufala i tingbaot se hemia sem saen we tufala i bin luk long troli. Ale tufala i goaot long bas, tufala i go long get blong Haos Kingdom ya, mo jekem lis blong ol defren kongregesen wetem taem blong miting blong olgeta.

Tufala sem woman ya i smael taem tufala i luk Helen long Haos Kingdom.

Ale, long nekis miting long Haos Kingdom ya, tufala i kam joen. Be taem tufala i go insaed, ?tufala i luk hu? !Helen! Tufala i luksave wantaem se hem nao i smael bigwan long tufala. Helen i talem se: “Taem tufala i wokbaot i kam stret long mi, mi fraet lelebet. Mi ting se maet mi bin mekem wan samting we i rong.” Be tufala woman ya i eksplenem samting we i hapen.

Tufala yang woman ya i glad tumas long miting mo blong joen wetem ol brata sista, tufala i no fraet nating. Taem tufala i luk ol narafala oli klinim Haos Kingdom afta long miting, tufala i askem sipos tufala i save givhan. Biaen, wan long ol woman ya i aot long kantri, be narawan i stat blong kam long ol miting, mo i stat blong stadi Baebol. !Hemia from wan smael nomo!