Ol Perens, Halpem Ol Pikinini Blong Yufala Blong Oli Lavem Jehova

1-2. ?From wanem sam vas blong Baebol oli kam moa impoten long yumi taem sam samting long laef blong yumi i jenis?

TAEM wan man mo woman i mared, plante taem tufala i lesin long wan tok we i stanap long Baebol long saed blong mared. Ol vas we oli tokbaot long taem ya, oli no niu long tufala. Be naoia oli moa impoten long tufala. ?From wanem? From we naoia bambae tufala i folem ol advaes ya.

² Hemia i sem mak taem wan Kristin kapol i kam wan papa mo mama. Long ol yia we i pas, maet tufala i harem plante tok we i tokbaot olsem wanem blong tijim pikinini, be naoia ol rul ya blong Baebol oli gat moa mining long tufala, from we bambae tufala i gat wan pikinini blong tijim hem. Hemia i wan bigfala responsabiliti. Taem ol samting long laef blong yumi oli jenis, sam vas blong Baebol we yumi save gud, oli kam moa impoten long yumi. Hemia nao from wanem ol man we oli wosipim Jehova, oli ridim Baebol mo tingting dip long hem “long olgeta dei long laef” blong olgeta, olsem we ol king blong Isrel oli stap mekem.—Dut. 17:19.

3. ?Bambae yumi tokbaot wanem long stadi ya?

³ Ol perens, yufala i gat wan nambawan privilej olsem wan Kristin, blong tijim ol pikinini blong yufala blong oli save Jehova. Yufala i wantem se oli save God, be yufala i wantem halpem olgeta tu blong oli lavem hem. ?Yufala save mekem wanem blong givhan long ol pikinini blong yufala, blong oli lavem Jehova? Long stadi ya bambae yumi tokbaot fo rul blong Baebol we i save givhan long ol perens. (2 Tim. 3:16) Mo tu, bambae yumi luk olsem wanem sam Kristin perens oli kasem gudfala frut taem oli folem ol advaes blong Baebol.

FO RUL WE I SAVE HALPEM OL PERENS

4. ?Wanem faswan rul we ol perens oli save folem blong givhan long ol pikinini blong oli lavem Jehova? (Jemes 1:5)

⁴ Rul namba 1: Lukaotem advaes blong Jehova. Askem Jehova blong i givim waes we yu nidim blong yu save halpem ol pikinini blong yu blong oli lavem hem. (Ridim Jemes 1:5.) Hem i wan nambawan man blong givim advaes. I gat plante risen from wanem yumi talem olsem. Hemia tu risen: Faswan, Jehova i gat moa ekspiriens long wok blong wan perens. (Sam 36:9) Mo nambatu, ol waes advaes we hem i givim, oltaem oli wok gud.—Aes. 48:17.

5. (1) ?Oganaesesen blong Jehova i givim wanem blong halpem ol perens? (2) Olsem video i soem, ?yu lanem wanem long fasin blong Brata mo Sista Amorim blong tijim ol pikinini blong tufala?

⁵ Jehova i yusum Tok blong hem mo oganaesesen blong hem blong givim plante save we i stanap long Baebol, we yu save yusum blong givhan long ol pikinini blong yu blong oli lavem Jehova. (Mat. 24:45) Eksampol, yufala i save faenem plante waes advaes we i stap long haf ya “Advaes Long Famle,” we i kamaot plante yia long ol Wekap! mo naoia i stap long websaet blong yumi. Mo tu, i gat plante video long jw.org we i save halpem ol perens, blong folem ol advaes blong Jehova blong tijim ol pikinini blong olgeta.b—Prov. 2:4-6.

6. ?Wanem tingting blong wan papa long ol advaes we hem mo waef blong hem i kasem long oganaesesen blong Jehova?

⁶ Plante perens oli glad tumas from help we Jehova i givim tru long oganaesesen blong hem. Wan papa nem blong hem Joe i talem se: “I no isi blong tijim trifala pikinini blong mitufala long trutok. Oltaem mi mo waef, i prea long Jehova blong i halpem mitufala. Mo plante taem mitufala i harem se wan atikol o video i kamaot long stret taem we i givhan long mitufala blong dil wetem situesen we mifala i fesem. Oltaem mitufala i dipen long ol advaes blong Jehova.” Joe mo waef blong hem i luksave se ol atikol mo ol video i halpem ol pikinini blong tufala blong oli kam klosap long Jehova.

7. ?From wanem i impoten we ol perens oli mekem bes blong olgeta blong soem gudfala eksampol? (Rom 2:21)

⁷ Rul namba 2: Soem gudfala eksampol. Ol pikinini oli wajem ol perens blong olgeta mo plante taem oli folem eksampol blong olgeta. I tru, ol perens oli no stret gud olgeta. (Rom 3:23) Be ol perens we oli waes oli mekem bes blong olgeta blong soem gudfala eksampol long ol pikinini blong olgeta. (Ridim Rom 2:21.) Wan papa i tokbaot ol pikinini i se: “Ol pikinini oli olsem sponj we oli pulum wota. Mo oli save talem long yumi sipos oli luk se samting we yumi mekem i no laenap wetem wanem we yumi tijim olgeta long hem.” Sipos yumi wantem se ol pikinini blong yumi oli lavem Jehova, yumi wan yumi nidim blong mekem lav we yumi gat long Jehova i kam strong, mo ol pikinini oli mas luksave samting ya.

8-9. ?Yu lanem wanem from samting we Andrew mo Emma i talem?

⁸ I gat plante rod we ol perens oli save folem blong tijim ol pikinini blong oli lavem Jehova. Makem samting we Andrew, wan yangfala brata we i gat 17 yia i talem, i se: “Oltaem perens blong mi i talem se prea i impoten. Evri naet papa i prea wetem mi, nating se mi mi mekem prea blong mi finis. Oltaem perens blong mifala i talem long mifala se: ‘Yufala i save prea long Jehova plante taem olsem we yufala i wantem.’ From samting ya, mi luksave se prea i impoten tumas. Naoia i isi blong mi prea mo mi harem save se Jehova i wan papa we i lavem mi.” Ol perens, tingbaot oltaem se lav we yufala i gat long Jehova i save halpem ol pikinini tu blong oli lavem hem.

⁹ Traem tingbaot eksampol blong Emma. Taem papa blong hem i lego olgeta, mama blong hem i mas pembak ol kaon blong papa blong olgeta. Emma i talem se: “Plante taem mama blong mi i no gat inaf mane, be oltaem hem i tokbaot olsem wanem Jehova i kea mo i givim samting we ol man blong hem oli nidim. Mi luksave long laef blong mama blong mi se hem i bilivim samting ya. Mama i folem ol samting we hem i tijim mi long hem.” ?Lesen? Nating se ol perens oli fesem hadtaem, be eksampol blong olgeta i save tijim ol pikinini blong olgeta.—Gal. 6:9.

10. ?Wetaem ol perens long Isrel bifo oli tokbaot Jehova long ol pikinini blong olgeta? (Dutronome 6:6, 7)

¹⁰ Rul namba 3: Toktok wetem ol pikinini oltaem. Jehova i talem long ol man Isrel bifo se oli mas tokbaot hem oltaem long ol pikinini blong olgeta. (Ridim Dutronome 6:6, 7.) Ol perens ya oli gat plante janis long dei blong storian wetem ol pikinini blong olgeta, mo halpem olgeta blong oli lavem Jehova. Eksampol, maet wan yangfala boe Isrel i spenem plante aoa wetem papa blong hem blong planem mo havestem ol kakae. Maet sista blong hem i spenem plante taem long wan dei blong halpem mama blong hem blong somap, wivim mo mekem ol narafala wok long haos. Taem ol perens mo ol pikinini oli wok tugeta, oli save tokbaot plante impoten topik. Eksampol, oli save tokbaot ol gudfala fasin blong Jehova mo olsem wanem hem i stap halpem famle blong olgeta.

11. ?Wetaem ol Kristin perens oli save toktok wetem ol pikinini blong olgeta?

¹¹ Tede, laef i defren. Long plante kantri, ol perens mo ol pikinini oli no gat taem blong spenem tugeta long wan dei. Maet ol perens oli wok mo ol pikinini oli go long skul. From samting ya, ol perens oli mas traehad blong faenem taem blong toktok wetem ol pikinini blong olgeta. (Efes. 5:15, 16; Fil. 1:10) Mo famle wosip i wan nambawan janis blong mekem samting ya. Wan yangfala brata we nem blong hem Alexander i talem se: “Oltaem papa blong mi i mekem plan blong famle wosip. Mo hem i no letem wan samting i blokem mifala blong joen tugeta long taem ya. Afta long famle wosip, mifala i tokbaot plante impoten samting.”

12. ?Hed blong famle i mas tingbaot wanem long taem blong famle wosip?

¹² Sipos yu yu wan hed blong famle, ?yu save mekem wanem blong ol pikinini blong yu oli glad long famle wosip? I gud yu stadi wetem olgeta long niufala buk ya !Enjoem Laef Olwe! Buk ya i mekem se i isi blong gat wan gudfala storian. Yu wantem se ol pikinini blong yu oli talemaot ol tingting mo filing blong olgeta, taswe yu no mas yusum taem blong famle wosip blong tok long olgeta o stretem olgeta. Mo tu, yu no mas kros sipos oli talem wan samting we i no laenap wetem samting we Baebol i talem. Defren olgeta, yu mas glad se oli talemaot ol tingting mo filing blong olgeta, mo yu mas enkarejem olgeta blong oli gohed blong mekem olsem. Beswan rod blong givhan long olgeta, hemia sipos yu save samting we i stap long tingting blong olgeta.

13. ?Wanem sam narafala taem we ol perens oli save halpem ol pikinini blong kam klosap long Jehova?

¹³ Ol perens, tekem evri janis long wan dei blong halpem ol pikinini blong yufala blong oli kam klosap long Jehova. Yufala i no mas wet se long taem blong stadi nomo bambae yufala i tokbaot Jehova long olgeta. Makem samting we wan mama, nem blong hem Lisa i talem, i se: “Mifala i yusum evri samting raon long mifala blong tijim ol pikinini blong mifala long saed blong Jehova. Eksampol, taem dog blong mifala i mekem wan fani samting we ol pikinini oli laf from, mifala i talem long olgeta se hemia i soemaot se Jehova i wan hapi God, mo se hem i wantem we yumi hapi mo harem gud long ol fani samting tu.”

14. ?From wanem i impoten we ol perens oli halpem ol pikinini blong olgeta blong jusum gud ol fren? (Ol Proveb 13:20)

¹⁴ Rul namba 4: Halpem ol pikinini blong yu blong jusum ol gudfala fren. Baebol i soemaot klia se ol fren oli save pulum yumi blong mekem samting we i gud o samting we i nogud. (Ridim Ol Proveb 13:20.) Ol perens, ?yufala i save ol fren blong ol pikinini blong yufala? ?Yufala i mitim olgeta mo spenem sam taem wetem olgeta? ?Yufala i save mekem wanem blong halpem ol pikinini blong yufala blong jusum ol fren we oli lavem Jehova? (1 Kor. 15:33) Yufala i save mekem samting ya, sipos yufala i invaetem ol man we oli frengud wetem Jehova, oli kam long haos blong yufala, blong yufala i save mekem sam samting tugeta wetem ol pikinini blong yufala.—Sam 119:63.

15. ?Ol perens oli save mekem wanem blong ol pikinini oli faenem ol gudfala fren?

¹⁵ Traem tingbaot ekspiriens blong wan papa we nem blong hem Tony. Hem i eksplenem samting we hem mo waef blong hem i mekem blong halpem ol pikinini blong tufala blong oli faenem ol gudfala fren. Hem i talem se: “Long ol yia we i pas, mi mo waef blong mi i invaetem ol brata mo sista we oli gat defdefren yia mo bakgraon, oli kam long haos blong mifala. Oli joen wetem mifala blong kakae mo mekem famle wosip. Hemia i wan nambawan rod blong save gud olgeta we oli lavem Jehova, mo oli mekem wok blong hem. Mifala i invaetem ol eria elda, ol misinari, mo ol narafala blong oli stap long haos blong mifala. Ol pikinini blong mitufala oli lanem plante samting long ekspiriens mo strong tingting blong olgeta, mo oli luk olsem wanem oli wok had long wok blong Jehova. Hemia i halpem ol pikinini blong mitufala blong oli kam klosap long Jehova.” Ol perens, yufala i mas gat strong tingting blong halpem ol pikinini blong yufala blong oli faenem ol gudfala fren.

!NO LUSUM HOP!

16. ?Olsem wanem sipos wan pikinini i talem se hem i no moa wantem wosipim Jehova?

¹⁶ ?Olsem wanem sipos yu traem bes blong yu blong tijim ol pikinini blong yu, be wan i talem se hem i no moa wantem wosipim Jehova? Yu no mas kwik blong gat tingting ya se yu no mekem gud wok blong yu. Jehova i givim nambawan presen ya, hemia fasin fri blong jus long yumi evriwan, inkludum ol pikinini, se bambae yumi jusum blong wosipim Jehova o nogat. Sipos pikinini blong yu i lego Jehova, yu no mas lusum hop, from we wan dei bambae hem i kambak. Tingbaot eksampol blong boe ya we i lusum rod. (Luk 15:11-19, 22-24) Yangfala man ya i mekem plante samting we i no stret, be biaen hem i kambak. Maet sam man oli gat tingting ya se: “Hemia i jes wan stori nomo, i no save hapen long yumi tede.” Be blong talem stret, i save hapen. Traem luk ekspiriens blong yangfala man ya we nem blong hem Elie.

17. ?Olsem wanem ekspiriens blong Elie i enkarejem yu?

¹⁷ Elie i tokbaot perens blong hem i se: “Tufala i mekem bes blong tufala blong tijim mi blong mi lavem Jehova mo Tok blong hem Baebol. Be taem mi gat samwe 15 yia, mi stat blong rebel.” Elie i stat blong mekem ol samting we i no stret, mo i sakemaot olgeta samting we perens blong hem i tijim hem long hem. Afta we hem i aot long haos, hem i stat blong mekem ol fasin we i no stret. Nating se i olsem, samtaem hem i stap tokbaot Baebol long wan fren blong hem. Elie i talem se: “Taem mi tokbaot Jehova long fren blong mi, mi stat blong tingbaot Jehova moa. Sloslo, ol sid blong trutok we i stap long hat blong mi, hemia ol samting we perens blong mi i tijim mi long hem, oli stat blong gru bakegen.” Smoltaem afta, Elie i kambak long trutok.c !I sua se perens blong hem i mas glad tumas se tufala i traehad blong tijim hem blong i lavem Jehova, stat taem hem i pikinini!—2 Tim. 3:14, 15.

18. ?Wanem tingting blong yu long ol perens we oli wok had blong tijim ol pikinini blong olgeta blong oli lavem Jehova?

¹⁸ Ol perens, yufala i gat wan nambawan wok blong mekem, hemia blong tijim wan niufala jeneresen blong oli wosipim Jehova. (Sam 78:4-6) !Hemia i no wan isi wok, mo mifala i talem bigfala tangkiu long yufala from we yufala i wok had blong halpem ol pikinini blong yufala! Sipos yufala i gohed blong mekem bes blong yufala blong halpem ol pikinini blong oli lavem Jehova, mo tijim olgeta blong oli obei long hem, yufala i save sua se Papa blong yumi long heven bambae i glad tumas.—Efes. 6:4.