Yangfala—Gohed Blong Kam Bigman Long Spirit Afta We Yu Baptaes

1. ?Wanem sam gudfala samting we plante yangfala oli mekem finis?

EVRI yia, plante taosen yangfala oli stap tekem baptaes. ?Yu yu kasem mak ya finis? Sipos yes, ol brata sista long kongregesen mo Jehova tu i glad tumas long yu. (Prov. 27:11) Traem tingbaot ol gudfala samting we yu mekem finis. Eksampol, maet blong plante yia yu tekem taem blong stadi long Baebol, mo yu faenemaot se Baebol i Tok blong God. Antap long hemia, yu save gud Man ya we i raetem tabu buk ya mo yu lavem hem. Mo from we yu lavem Jehova tumas, yu yu jusum blong givim laef blong yu long hem, mo tekem baptaes. !Hemia wan nambawan desisen!

2. ?Bambae yumi tokbaot wanem long stadi ya?

² I sua se i gat plante samting oli traem bilif blong yu taem yu stap traehad blong kasem mak ya blong baptaes. Be taem yu stap kam bigwan moa, bambae yu fesem plante moa niufala traem. Setan bambae i traem blong spolem lav we yu gat long Jehova mo stopem yu blong yu no mekem wok blong hem. (Efes. 4:14) Be yu no mas letem samting ya i hapen. ?Wanem i save halpem yu blong holemstrong mo kipim promes we yu mekem long Jehova? Yu mas “gohed kwik” blong kam bigman long spirit. (Hib. 6:1) ?Olsem wanem yu save mekem samting ya?

?YU SAVE MEKEM WANEM BLONG KAM BIGMAN LONG SPIRIT?

3. ?Evri Kristin oli mas mekem wanem afta we oli baptaes?

³ Afta long baptaes, yumi evriwan i mas folem advaes ya we Pol i givim long ol Kristin long Efesas. Hem i enkarejem olgeta blong oli kam ol Kristin we oli “bigman.” (Efes. 4:13) Hemia i min se oli mas ‘Gohed blong kam bigman long spirit.’ Pol i komperem fasin blong gru long saed blong spirit, olsem wan pikinini we i stap gruap. Taem wan bebi i bon, perens blong hem i glad tumas mo oli lavem hem. Be bebi ya i no save stap smol olwe. Taem ol yia oli pas, hem i mas lego ol “fasin ya we oli blong pikinini.” (1 Kor. 13:11) Hemia i sem mak long ol Kristin. Afta long baptaes, yumi mas gohed blong kam bigman. Naoia i gud yumi luk sam samting we bambae i halpem yumi blong mekem olsem.

4. ?Wanem fasin i save halpem yu blong kam bigman long saed blong spirit? Yu eksplenem. (Filipae 1:9)

⁴ Mekem lav blong yu long Jehova i kam bigwan moa. Naoia we i stap, yu yu lavem Jehova tumas. Be lav ya i save kam bigwan moa. ?Olsem wanem blong mekem? Aposol Pol i tokbaot wan rod long Filipae 1:9. (Ridim.) Pol i prea se lav blong ol Kristin long Filipae i save “kam bigwan we i kam bigwan moa yet.” Taswe yumi tu yumi save mekem lav blong yumi long Jehova i kam bigwan moa. Yumi save mekem olsem taem yumi gat ‘stret save mo yumi naf gud blong luksave ol samting.’ Taem yumi save Jehova moa, bambae yumi lavem hem moa, yumi tinghae long ol fasin mo ol samting we hem i mekem. Bambae yumi wantem tumas blong mekem hem i glad, mo yumi neva wantem mekem hem i harem nogud. Mo bambae yumi wantem mekem bes blong yumi blong kasemsave samting we hem i wantem yumi blong mekem mo olsem wanem blong mekem.

5-6. ?Olsem wanem blong lavem Jehova moa? Yu eksplenem.

⁵ Jisas i soemaot gud olgeta fasin blong Jehova. Taswe, taem yumi save gud Jisas, bambae yumi lavem Jehova moa. (Hib. 1:3) Beswan rod blong save gud Jisas, hemia blong stadi long ol fo Gospel. Sipos yu no stap ridim Baebol evri dei, i gud yu stat blong mekem naoia. Taem yu ridim ol stori long saed blong Jisas, traem makem ol gudfala fasin blong hem. Ol man oli laekem blong stap wetem hem, mo toktok wetem hem. Mo hem i laekem blong putum han blong hem i goraon long ol smol pikinini. (Mak 10:13-16) Jisas i kaen mo i fren gud wetem ol disaepol, mo hemia i mekem se oli no fraet blong talemaot ol filing blong olgeta long hem. (Mat. 16:22) Mo from we Jisas i folem gud ol fasin blong Papa blong hem, hemia i min se yumi tu yumi save kam klosap long Jehova, tru long prea. Taem yumi prea, yumi save talemaot olgeta samting we i stap long hat blong yumi long hem. Mo yumi trastem se bambae hem i no jajem yumi. Hem i lavem yumi mo i kea long yumi.—1 Pita 5:7.

⁶ Jisas i sore long ol man. Aposol Matiu i talem se: “Taem hem i luk ol man we oli plante tumas, hem i sore tumas long olgeta, from we ol narafala oli stap spolem olgeta mo oli no lukaot long olgeta, oli olsem ol sipsip we i no gat man blong lukaot long olgeta.” (Mat. 9:36) ?Mo olsem wanem long Jehova? Jisas i talem se: “Papa blong mi long heven i no wantem se wan long ol smolwan ya i lus.” (Mat. 18:14) Ol tok ya oli mekem yumi glad from we yumi save se Jehova i lavem yumi tumas. Taem yumi stap traehad blong savegud Jisas, lav blong yumi long Jehova i kam bigwan moa.

7. Taem yu spenem taem wetem ol Kristin we oli bigman long spirit, ?olsem wanem hemia i halpem yu?

⁷ Yu save lanem blong soemaot lav mo kam bigman long spirit, taem yu spenem taem mo traehad blong savegud ol brata sista we oli bigman long spirit insaed long kongregesen blong yu. Traem luk glad we oli kasem. Oli no rigret nating long desisen we oli tekem blong mekem wok blong Jehova. Askem olgeta blong oli talemaot sam ekspiriens we oli gat long wok blong Jehova. Mo sipos yu mas mekem wan impoten desisen, i gud yu askem advaes blong olgeta. Rimemba, “taem i gat plante man blong givim advaes, ol samting oli go gud.”—Prov. 11:14.

8. ?Yu save mekem wanem sipos yu gat tu tingting long samting we Baebol i talem?

⁸ Blokem tu tingting. Olsem we yumi tokbaot finis long haf 2, Setan bambae i traem blokem yu blong yu no kam bigman long spirit. Wan rod we hem i save yusum, hemia blong mekem yu gat tu tingting long sam tijing blong Baebol. Eksampol, maet sam man bambae oli traem blong mekem yu bilivim se i no God we i krietem yumi, be yumi kamaot from evolusen. Taem yu pikinini, maet yu neva tingbaot samting ya, be naoia yu stap lanem long skul. Maet yu harem olsem se samting we tija blong yu i talem i tru. Nating se i olsem, maet olgeta oli neva traem blong faenemaot se i gat wan Krieta. Tingbaot rul ya we i stap long Ol Proveb 18:17 we i se: “Oltaem man we i talemaot ol poen blong hem fastaem, ol man oli ting se hem i stret, gogo kasem taem we man we i agensem hem i kam, i stap askem ol kwestin long hem.” Taswe i bitim we yu bilivim evri samting we yu lanem long skul, i gud yu traem faenemaot trutok we i stap long Baebol, mo mekem risej long ol buk blong yumi. Toktok wetem ol brata mo sista we bifo oli bilif long evolusen, mo askem olgeta se wanem nao i mekem olgeta oli bilif se i gat wan Krieta we i lavem yumi. Ol storian olsem oli save halpem yu blong trastem se i gat wan Krieta.

9. ?Yu yu lanem wanem long ekspiriens blong Melissa?

⁹ Wan sista nem blong hem Melissa i naf blong blokem tu tingting taem hem i mekem risej long topik blong kriesen.b Hem i talem se: “Long skul, ol tija oli eksplenem evolusen long wan fasin we i mekem ol man oli ting se i tru. Fastaem, mi no wantem mekem risej from mi fraet se bambae mi faenemaot se evolusen i tru. Be afta mi tingbaot we Jehova i wantem se bilif blong yumi i stanap long ol pruf. Ale mi stat blong mekem risej. Mi ridim buk ya Is There a Creator Who Cares About You? mo ol buklet ya Was Life Created? mo The Origin of Life—Five Questions Worth Asking. Hemia ol stret samting we mi nidim. Mi wis se mi bin mekem samting ya long stat finis.”

10-11. ?Wanem i save halpem yu blong holemtaet klin fasin? (1 Tesalonaeka 4:3, 4)

¹⁰ Blokem rabis fasin. Taem yu kam yangfala, ol filing blong seks oli save kam strong, mo samtaem ol narafala bambae oli traem pulum yu blong mekem rabis fasin blong seks. Setan i wantem se yu folem ol filing blong yu. ?Be wanem i save halpem yu blong no foldaon long trap ya? (Ridim 1 Tesalonaeka 4:3, 4.) Taem yu prea, yu save talemaot filing blong yu long Jehova. Talem samting we i rili stap long hat blong yu, mo askem hem blong i halpem yu blong stanap strong. (Mat. 6:13) Tingbaot se Jehova i wantem blong halpem yu, be i no blong jajem yu. (Sam 103:13, 14) Baebol i save halpem yu tu. Melissa we yumi tokbaot hem finis, i stap traehad blong sakemaot ol nogud tingting. Hem i talem se: “Taem mi ridim Baebol evri dei, hemia i halpem mi blong mi gohed blong faet agensem ol rong filing we mi gat. Mo i rimaenem mi tu se laef blong mi i blong Jehova mo se mi wantem mekem wok blong hem.”—Sam 119:9.

¹¹ I nogud yu traem stretem ol problem blong yu, yu wan. Be i gud yu toktok long perens blong yu. I tru se i no isi blong tokbaot samting olsem, be i impoten we yu mekem. Melissa i talem se: “Mi prea blong mi gat strong tingting, biaen mi go tokbaot problem blong mi long papa blong mi. Afta long hemia, mi harem gud bigwan mo mi save se Jehova i praod long mi.”

12. ?Olsem wanem yu save mekem ol gudfala desisen?

¹² Letem ol rul blong Baebol oli lidim yu. Taem yu stap gruap, perens blong yu bambae i letem yu yu mekem ol prapa desisen blong yu. Be yet, i gat plante samting we yu yu no save. ?Olsem wanem yu save lukaot gud blong no mekem mastik we i save spolem frensip blong yu wetem Jehova? (Prov. 22:3) Wan sista nem blong hem Kari i eksplenem samting we i halpem hem blong mekem ol gudfala desisen. Hem i luksave se taem yu bigman long spirit, yu no nidim ol rul blong talem evri samting we yu mas mekem long laef. Hem i talem se: “Mi nidim blong kasemsave tingting blong Jehova long saed blong ol samting, i bitim we mi jes folem ol rul.” Taem yu ridim Baebol, i gud yu askem se: ‘?Wanem nao tingting blong Jehova insaed long vas ya? ?I gat ol rul insaed long vas ya we oli save halpem mi blong mekem samting we i stret? Sipos yes, ?mi save kasem wanem gudfala samting sipos mi folem ol rul ya?’ (Sam 19:7; Aes. 48:17, 18) Taem yu ridim Baebol mo yu tingting dip long ol rul blong hem, bambae i moa isi blong yu mekem ol desisen we Jehova i glad long hem. Taem yu gohed blong kam bigman long spirit, bambae yu makem se yu no nidim wan rul long evri samting we yu mekem, from yu kasemsave finis tingting blong Jehova long saed blong ol samting.

13. ?Olsem wanem ol gudfala fren oli save halpem yu? (Ol Proveb 13:20)

¹³ Jusum ol fren we oli lavem Jehova. Olsem we yumi tokbaot finis, ol fren we yumi jusum oli save halpem yumi blong kam bigman long spirit. (Ridim Ol Proveb 13:20.) Wan sista nem blong hem Sara i lusum glad we hem i gat. Be biaen, wan samting i halpem hem blong i kasembak glad ya. Sara i talem se: “Mi faenem ol gudfala fren long stret taem. Evri wik, mi mo wan sista i joen wanples blong rerem Wajtaoa stadi. Wan narafala fren i halpem mi blong mi stat blong givim ol ansa bakegen long ol miting. From we ol fren ya oli halpem mi, mi stat blong mekem prapa stadi blong mi mo mi tinghae moa long prea. Mi stat blong frengud moa wetem Jehova mo mi glad bakegen.”

14. ?Olsem wanem Julien i faenem ol gudfala fren?

¹⁴ ?Olsem wanem yu save faenem ol gudfala fren we bambae oli givhan long yu? Julien, we naoia i wan elda, i talem se: “Taem mi yangfala, mi faenem ol gudfala fren taem mi joen long wok blong prij. Ol fren ya oli wok strong long wok blong Jehova mo oli halpem mi blong luksave se wok blong prij i givim bigfala glad. Ale, mi stat blong putum mak ya blong mekem wok blong prij fultaem. Mi luksave from wanem mi no bin gat ol gudfala fren, hemia from we mi stap jusum nomo blong fren wetem olgeta we oli gat sem yia olsem mi. Mo tu sam taem biaen, mi faenem sam gudfala fren long Betel. Eksampol blong olgeta i halpem mi blong jusum gud ol samting blong mekem blong spel mo pleplei, mo i mekem mi kam klosap moa long Jehova.”

15. ?Pol i givim wanem woning long Timoti? (2 Timoti 2:20-22)

¹⁵ ?Olsem wanem sipos yu makem se wan man insaed long kongregesen i save spolem frensip blong yu wetem Jehova? Pol i save se i gat sam man long kongregesen long faswan handred yia we oli no bigman long spirit, mo hem i wonem Timoti blong i stap longwe long olgeta. (Ridim 2 Timoti 2:20-22.) Frensip we yumi gat wetem Jehova i sas we i sas. Yumi wok had blong kam klosap long hem, taswe yumi no wantem letem eni man i spolem frensip blong yumi wetem Jehova.—Sam 26:4.

PUTUM OL MAK WE OLI HALPEM YU BLONG KAM BIGMAN LONG SPIRIT

16. ?Wanem sam mak we yu save jusum blong putum?

¹⁶ Putum ol gudfala mak. Jusum ol mak we bambae oli mekem bilif blong yu i kam strong mo oli givhan long yu moa blong yu kam bigman long spirit. (Efes. 3:16) Eksampol, maet yu save jusum blong kam gud moa long prapa stadi blong yu mo ridim Baebol oltaem. (Sam 1:2, 3) O maet yu save traehad blong prea oltaem mo kamgud moa long ol prea blong yu. Maet yu mas lukaot gud moa long samting we yu jusum blong spel mo pleplei, o long fasin blong yusumgud taem blong yu. (Efes. 5:15, 16) Jehova bambae i glad tumas taem hem i luk we yu stap traehad blong kam bigman long spirit.

17. ?Olsem wanem fasin blong halpem ol narafala i save givhan long yu?

¹⁷ Taem yu halpem ol narafala, hemia i givhan tu blong yu kam bigman moa long spirit. Jisas i talem se: “Man i harem gud moa taem hem i givim samting, i bitim we hem i kasem samting.” (Wok 20:35) Bambae yu kasem glad sipos yu yusum taem mo paoa blong yu blong halpem ol narafala. Eksampol, yu save putum mak blong halpem wan olfala o wan we i sik insaed long kongregesen blong yu. Maet yu save mekem soping blong olgeta, o halpem olgeta blong yusum ol elektronik divaes. Sipos yu yu wan brata, yu save putum mak blong kam wan man blong givhan, wetem tingting ya blong givhan moa long ol brata mo sista. (Fil. 2:4) Mo tu yu save soemaot lav long ol man aotsaed long kongregesen, taem yu serem gud nius blong Kingdom long olgeta. (Mat. 9:36, 37) Sipos i posibol, yu save putum mak tu blong mekem wok blong Jehova fultaem.

18. Taem yu mekem wok blong Jehova fultaem, ?olsem wanem hemia i halpem yu blong kam klosap moa long hem?

¹⁸ Taem yu mekem wok blong Jehova fultaem, hemia i save mekem yu kam klosap moa long hem. Sipos yu yu wan paenia, maet bambae yu gat janis blong go long Skul Blong Kingdom Ivanjelis. Maet yu save wok long Betel, o joen long ol tiokratik konstraksen projek. Wan yangfala paenia sista nem blong hem Kaitlyn i talem se: “Taem mi spenem taem long wok blong prij wetem ol brata mo sista we oli bigman long spirit, hemia i halpem mi blong kam klosap long Jehova afta we mi baptaes. Eksampol blong olgeta i pulum mi blong stadi moa long Baebol mo kam gud long fasin blong mi blong tij.”

19. ?Bambae yu kasem wanem blesing sipos yu gohed blong kam bigman long spirit?

¹⁹ Taem yu gohed blong kam bigman long spirit, bambae yu harem gud from we yu kasem plante blesing. Bambae yu no yusum paoa blong yu blong mekem ol samting we oli no impoten. (1 Jon 2:17) Bambae yu no harem nogud olsem ol man we oli mekem ol nogud desisen, be bambae yu faenem trufala glad. (Prov. 16:3) Gudfala eksampol blong yu bambae i enkarejem ol narafala Kristin we oli yangfala, mo olfala. (1 Tim. 4:12) Mo samting we i moa impoten se, bambae yu gat pis mo yu harem gud from we yu mekem Jehova i glad mo yu frengud wetem hem.—Prov. 23:15, 16.