Kwestin
?Hu ya “woman” ya we Aesea 60:1 i tokbaot, mo olsem wanem hem i “girap” mo i “saenaot”?
Aesea 60:1 i talem se: “O woman, yu girap, yu saenaot from we laet blong yu i kam finis. Glori blong Jehova i stap saen long yu.” Ol vas raonabaot oli soemaot se “woman” ya hem i Saeon o Jerusalem, we i kapital blong Juda long taem ya.a (Aes. 60:14; 62:1, 2) Taon ya Jerusalem i pijarem nesen blong Isrel. Taswe ol tok we Aesea i talem, i mekem se yumi gat tu kwestin: Faswan, ?wetaem mo olsem wanem Jerusalem i “girap” mo i saenaot long saed blong spirit? Nambatu, ?ol tok blong Aesea oli stap kamtru long taem blong yumi?
?Wetaem mo olsem wanem Jerusalem i “girap,” mo i saenaot long saed blong spirit? Jerusalem mo tempol blong hem i kam nogud taem ol man Jiu oli go kalabus long Babilon blong 70 yia. Be afta we Media mo Pesia i winim Babilon, ol man Isrel we oli stap long olgeta ples we Babilon i rul long hem, oli kam fri mo oli save gobak long kantri blong olgeta mo mekem tru wosip bakegen. (Esra 1:1-4) Stat long 537 B.K.T., ol 12 traeb blong Isrel we oli laef yet, oli gobak long kantri blong olgeta. (Aes. 60:4) Mo oli stat blong mekem ol sakrefaes i go long Jehova, mekem ol lafet, mo bildim bak tempol. (Esra 3:1-4, 7-11; 6:16-22) Long taem ya, glori blong Jehova i stat blong saen long Jerusalem bakegen, we i minim ol man blong God. Nao olgeta oli kam olsem wan laet blong ol nesen we oli stap long tudak long saed blong spirit.
Be profet tok blong Aesea i no kamtru fulwan long taem ya. Bighaf blong ol man Isrel oli no moa gohed blong obei long Jehova. (Neh. 13:27; Mal. 1:6-8; 2:13, 14; Mat. 15:7-9) Biaen, oli sakemaot Mesaea, Jisas Kraes. (Mat. 27:1, 2) Long 70 K.T., ol enemi oli spolem Jerusalem mo tempol blong hem nambatu taem.
Jehova i bin talemaot finis se samting olsem bambae i hapen. (Dan. 9:24-27) Taswe i klia se folem stamba tingting blong hem, profet tok blong Aesea 60 bambae i no kamtru fulwan long Jerusalem long wol ya.
?Ol tok blong Aesea oli stap kamtru long taem blong yumi? Yes, be profet tok ya i kamtru long wan narafala woman, hemia “Jerusalem blong heven.” Aposol Pol i tokbaot hem se: “Hem i mama blong yumi.” (Gal. 4:26) Jerusalem blong heven, hemia haf blong oganaesesen blong God long heven, we i fulap long ol gudfala enjel. Mo ol “pikinini” blong hem, we hemia Jisas mo ol 144,000 man we God i makemaot olgeta olsem Pol, oli gat hop blong laef long heven. Olgeta ya oli kam “wan tabu nesen” hemia “Isrel blong God.”—1 Pita 2:9; Gal. 6:16.
?Olsem wanem Jerusalem blong heven i “girap” mo i “saenaot”? Hem i mekem olsem tru long ol pikinini blong hem, we God i makemaot olgeta long wol ya. Traem skelem ekspiriens blong olgeta wetem samting we profet tok blong Aesea japta 60 i tokbaot.
Ol tabu Kristin oli mas “girap” from we oli bin stap long tudak long saed blong spirit, taem rabis gras o apostasi i kam fulap afta we evri aposol oli ded. (Mat. 13:37-43) Biaen oli kalabus long Bigfala Babilon, we hemia olgeta giaman skul long wol. Ol tabu Kristin ya oli stap kalabus olsem gogo kasem “lashaf blong sistem blong wol,” we i stat long yia 1914. (Mat. 13:39, 40) Smoltaem afta, hemia long 1919, oli kam fri mo kwiktaem nomo oli stat blong saenaot long saed blong spirit, hemia taem oli joen fulwan long wok blong prij.b Long ol yia we i pas, plante man blong olgeta nesen oli kam long laet ya, mo hemia i minim tu smol haf blong Isrel blong God we i stap yet, hemia ol “ol king” we Aesea 60:3 i tokbaot olgeta.—Rev. 5:9, 10.
Long fiuja, ol tabu Kristin bambae oli mekem se laet blong Jehova i saenaot moa. ?Bambae oli mekem samting ya olsem wanem? Taem oli ded, bambae oli kam olsem haf blong “Niufala Jerusalem,” o waef blong Kraes, we hemia ol 144,000 king mo pris.—Rev. 14:1; 21:1, 2, 24; 22:3-5.
Niufala Jerusalem bambae i gat wan impoten wok, hemia blong mekem profet tok blong Aesea 60:1 i kamtru fulwan. (Skelem Aesea 60:1, 3, 5, 11, 19, 20 wetem Revelesen 21:2, 9-11, 22-26.) Long Isrel bifo, gavman i stap long Jerusalem. So long sem fasin, Niufala Jerusalem wetem Kraes bambae oli kam gavman we bambae i rul long niufala sistem blong wol. ?Olsem wanem Niufala Jerusalem i “kamaot long God long heven, i kamdaon”? Hemia taem hem i tekem aksen blong lidim ol man long wol. Ol man blong olgeta nesen we oli ona long God, “bambae oli wokbaot long laet we i stap kamaot long taon ya.” Mo tu, bambae oli kam fri fulwan long sin mo ded. (Rev. 21:3, 4, 24) Nao bambae “olgeta samting oli kam niuwan bakegen,” olsem we Aesea mo ol narafala profet oli bin talemaot. (Wok 3:21) Ol samting ya bambae oli stat blong kam niuwan taem Kraes i kam King, mo bambae oli kam niuwan fulwan long en blong Wan Taosen Yia Rul Blong Kraes.
a Long Niu Wol Translesen, Aesea 60:1 i yusum tok ya “woman,” be i no “Saeon” o “Jerusalem.” Hemia from we Hibru veb ya “girap” mo “saenaot,” oli yusum nomo blong tokbaot woman o gel, olsem we oli yusum tok ya “yu.”
b Esikel 37:1-14 mo Revelesen 11:7-12 tu oli tokbaot tru wosip we i stanap bakegen long 1919. Buk blong Esikel i tokbaot taem ya we olgeta tabu Kristin oli mekem tru wosip bakegen afta we oli bin kalabus blong plante yia. Buk blong Revelesen i tokbaot taem ya we wan smol grup blong ol tabu brata we oli stap lidim ol wok, oli mekem se tru save i kam antap bakegen afta we oli bin kalabus blong smoltaem. Mo long 1919, olgeta ya oli mekemap “gudfala slef we i waes.”—Mat. 24:45; yu luk buk ya Pure Worship of Jehovah—Restored At Last! long Inglis, pej 118.