Gat Tingting Daon Mo Luksave Se i Gat Sam Samting We Yu No Save

1. ?Jehova i wokem yumi we yumi naf blong mekem wanem, mo from wanem?

JEHOVA i wokem yumi long wan fasin we yumi save tingting, lanem samting, kasemsave samting, mo folem long laef blong yumi. ?From wanem hem i wokem yumi olsem? Hem i wantem se yumi “faenem save blong God,” mo yumi yusum gud tingting blong yumi taem yumi mekem wok blong hem.—Prov. 2:​1-5; Rom 12:1.

2. (1) ?Yumi mas luksave wanem? (Job 37:​23, 24) (Mo tu, yu luk pija.) (2) ?From wanem yumi mas luksave samting ya?

² Nating se yumi save lanem samting, be i gat plante samting we yumi no save. (Ridim Job 37:​23, 24.) Tingbaot eksampol blong Job. Jehova i askem plante kwestin long hem we i mekem hem i luksave se i gat plante samting we hem i no save. Hemia i givhan long hem blong gat tingting daon mo blong stretem tingting blong hem. (Job 42:​3-6) I gud yumi tu yumi gat tingting daon mo luksave se i gat plante samting we yumi no save. Hemia bambae i pulum yumi blong trastem se Jehova bambae i soemaot long yumi samting we yumi mas save, blong yumi save mekem ol waes desisen.—Prov. 2:6.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot sam samting we yumi no save, mo ol nogud samting we oli save kamaot from. Mo tu, bambae yumi tokbaot from wanem i gud we yumi no save sam samting. Ol samting we bambae yumi tokbaot long stadi ya bambae oli mekem yumi trastem se Jehova, “Man ya we save blong hem i stret gud,” i stap talem long yumi ol samting we yumi mas save.—Job 37:16.

YUMI NO SAVE WETAEM EN BAMBAE I KAM

4. Folem Matiu 24:​36, ?wanem samting we yumi no save?

⁴ Ridim Matiu 24:36. Yumi no save wetaem en blong sistem blong wol ya bambae i kam. Taem Jisas i stap long wol, hem tu i no save “dei mo aoa” blong samting ya.a Biaen, hem i talem long ol aposol blong hem se Jehova nomo i save stret taem blong ol samting oli hapen. (Wok 1:​6, 7) Jehova i putum wan stret taem finis blong en blong sistem blong wol ya i kam, be yumi no save wetaem stret bambae i hapen.

5. From we yumi no save wetaem en bambae i kam, ?hemia i save mekem yumi harem olsem wanem?

⁵ Folem tok ya blong Jisas, yumi no save se bambae yumi wet kasem wetaem bifo we en i kam. From samting ya, maet tingting blong yumi i foldaon o yumi no gat longfala tingting, antap moa sipos yumi bin wet plante yia finis from dei ya. O maet i had blong yumi stanap strong taem ol famle o ol narafala oli jikim yumi. (2 Pita 3:​3, 4) Maet yu stap tingting se sipos yumi save stret dei we en bambae i kam, bambae i isi moa blong yumi gat longfala tingting mo stanap strong taem ol narafala oli jikim yumi.

6. ?From wanem i gud we yumi no save stret dei we en bambae i kam?

⁶ I gud we Jehova i no talemaot stret dei we en bambae i kam, olsem nao yumi save gat janis blong soemaot se yumi wosipim hem from we yumi lavem hem mo yumi trastem hem. Yumi wantem wosipim Jehova olwe, be i no blong wosipim hem nomo kasem we en i kam. Taswe yumi no mas tingbaot nomo wetaem “dei blong Jehova” bambae i kamtru, be i gud yumi tingbaot ol gudfala samting we bambae oli hapen afta long dei ya. Olsem nao, yumi save gohed blong mekem Jehova i glad mo kam klosap moa long hem.—2 Pita 3:​11, 12.

7. ?Wanem samting we yumi save?

⁷ I impoten blong tingbaot nomo samting we yumi save, hemia se ol las dei oli stat long yia 1914. Jehova i talemaot plante profet tok we oli pruvum klia se ol las dei oli stat long 1914, mo hem i talemaot tu ol samting we bambae oli hapen long wol stat long yia ya. From samting ya, yumi sua se “bigfala dei blong Jehova i klosap finis.” (Sef. 1:14) Mo tu, yumi save se Jehova i givim wan impoten wok long yumi, hemia blong talemaot “gud nius ya blong Kingdom” long olgeta ples long wol. (Mat. 24:14) Yumi stap talemaot gud nius ya long samwe 240 kantri mo long bitim 1,000 lanwis. Yumi no nid blong save stret “dei mo aoa” we en bambae i kam, blong yumi save wok strong long wok blong prij.

YUMI NO SAVE SAMTING WE JEHOVA BAMBAE I MEKEM BLONG HALPEM YUMI

8. Taem Baebol i tokbaot “ol wok blong tru God,” ?hem i minim wanem? (Prija 11:5)

⁸ Samtaem, yumi no save “ol wok blong tru God.” (Ridim Prija 11:5.) Hemia i minim ol samting we Jehova i mekem o i letem i hapen, blong mekem stamba tingting blong hem i kamtru. Yumi no save stret from wanem Jehova i letem sam samting i hapen, o wanem we bambae hem i mekem blong halpem yumi. (Sam 37:5) Yumi no save ol samting ya, sem mak olsem we yumi no save olsem wanem wan bebi i stap gru long bel blong mama blong hem, mo ol saentis tu oli no kasemsave fulwan long samting ya.

9. Taem yumi no save olsem wanem Jehova bambae i halpem yumi, ?hemia i save mekem se yumi gat wanem tingting?

⁹ Taem yumi no save olsem wanem Jehova bambae i halpem yumi, maet yumi fraet blong mekem sam desisen. Maet yumi fraet blong lego sam samting blong mekem moa long wok blong prij, olsem blong mekem laef blong yumi i no fasfas, o blong muv i go long wan ples we i nidim moa man blong prij. O maet yumi save gat tingting ya se God i no glad long yumi, from we yumi putum wan mak long wok blong prij be yumi no kasem, o yumi prij plante be i no gat gudfala frut i kamaot, o yumi kasem plante problem long wan spesel wok we yumi mekem blong oganaesesen.

10. Taem yumi no save samting we Jehova bambae i mekem blong halpem yumi, ?hemia i tijim yumi blong gat wanem fasin?

¹⁰ Taem yumi no save samting we Jehova bambae i mekem blong halpem yumi, hemia i tijim yumi blong gat tingting daon. Yumi luksave se ol tingting mo fasin blong Jehova oli hae moa i bitim ol tingting mo fasin blong yumi. (Aes. 55:​8, 9) Mo tu, yumi lanem blong trastem moa Jehova, mo yumi dipen long hem blong i givhan long yumi. Taem yumi luk gudfala frut i kamaot long wok blong prij o long wan wok blong oganaesesen, yumi presem Jehova from. (Sam 127:1; 1 Kor. 3:7) Be sipos ol samting oli no kamaot olsem we yumi wantem, yumi mas tingbaot yet se Jehova i luk evri samting. (Aes. 26:12) Yumi mekem samting we yumi naf blong mekem, mo trastem se oltaem Jehova bambae i halpem yumi mo lidim yumi, nating se hem i no folem sem rod we hem i bin mekem long taem bifo.—Wok 16:​6-10.

11. ?Wanem samting we yumi save?

¹¹ I gud blong tingbaot ol samting we yumi save. Yumi save se oltaem ol samting we Jehova i mekem oli soemaot se hem i gat lav, stret fasin, mo waes. Yumi save se Jehova i tinghae long yumi from ol samting we yumi mekem long wok blong hem, mo blong givhan long ol brata mo sista. Mo tu, yumi save se oltaem Jehova i stap givim pei long olgeta we oli holemstrong long hem.—Hib. 11:6.

YUMI NO SAVE SAMTING WE BAMBAE I HAPEN TUMORO

12. Folem Jemes 4:​13, 14, ?yumi no save wanem?

¹² Ridim Jemes 4:​13, 14. Yumi no save se laef blong yumi bambae i olsem wanem tumoro. Long wol ya, “taem mo samting we i hapen we man i no tingbaot” i stap kasem yumi evriwan. (Pri. 9:11) From samting ya, yumi no save se ol plan we yumi stap mekem naoia bambae oli go gud o nogat, mo yumi no save sipos bambae yumi laef yet blong mekem ol plan ya oli kamtru, o nogat.

13. Taem yumi no save samting we bambae i hapen long fiuja, ?hemia i save mekem yumi harem olsem wanem?

¹³ Taem yumi no save samting we bambae i hapen long fiuja, maet i had blong yumi stanap strong long ol trabol. ?From wanem yumi talem olsem? From we maet yumi wari long ol samting we i save hapen, nao yumi no moa glad. Ol trabol mo ol samting we i hapen we yumi no tingbaot, oli save mekem yumi harem nogud mo yumi wari. Mo taem samting we yumi tingbaot i no kamtru olsem we yumi wantem, hemia i save mekem se yumi no glad mo tingting blong yumi i foldaon.—Prov. 13:12.

14. ?Yumi mas mekem wanem blong stap glad? (Mo tu, yu luk ol pija.)

¹⁴ Taem yumi stanap strong long ol trabol, yumi pruvum se yumi mekem wok blong Jehova from we yumi lavem hem, be yumi no stap tingbaot yumi wan nomo. Ol stori long Baebol oli soemaot se Jehova bambae i no protektem yumi long evri trabol we yumi fesem, mo hem i no mekem plan blong evri samting we i stap hapen long laef blong yumi. Jehova i save se blong yumi stap glad, yumi no nid blong save evri samting we bambae i hapen long fiuja, be yumi mas gohed blong askem hem blong i lidim yumi mo yumi obei long hem. (Jer. 10:23) Taem yumi lukluk i go long Jehova blong i givhan long yumi long ol desisen we yumi mekem, i olsem we yumi stap talem se: “Sipos hem i wil blong Jehova, bambae yumi laef, mo yumi mekem samting ya, o samting ya.”—Jem. 4:15.

15. ?Yumi save wanem long saed blong fiuja?

¹⁵ Nating se evri dei yumi no save wanem bambae i hapen, be yumi save se Jehova i promes blong givim laef we i no save finis long yumi, long heven o long wol. Yumi save se Jehova i no save giaman, mo se i no gat wan samting i save blokem hem blong mekem ol promes blong hem oli kamtru. (Taet. 1:2) Mo tu, hem nomo i save “talemaot samting we bambae i kamtru, mo longtaem finis [hem i] talemaot ol samting we oli no kamtru yet.” Plante samting we Jehova i bin talemaot bifo oli kamtru finis, mo bambae hem i mekem ol promes blong hem blong fiuja tu oli kamtru. (Aes. 46:10) Yumi save gud se i no gat wan samting we i save blokem Jehova blong i no lavem yumi. (Rom 8:​35-39) Jehova bambae i givim waes mo paoa we yumi nidim blong yumi stanap strong long eni trabol we yumi fesem, mo bambae hem i mekem yumi harem gud bakegen. Mo yumi save sua se Jehova bambae i halpem yumi mo i blesem yumi.—Jer. 17:​7, 8.

YUMI NO KASEMSAVE FULWAN OLSEM WANEM JEHOVA I SAVE GUD YUMI

16. ?Jehova i save wanem long saed blong yumi? ?Mo hemia i mekem yumi harem olsem wanem? (Ol Sam 139:​1-6)

¹⁶ Ridim Ol Sam 139:​1-6. Jehova i save gud evri samting long saed blong yumi, from we hem nao i wokem yumi. Hem i kasemsave gud long ol tingting mo filing blong yumi. Hem i save samting we yumi talem, mo evri samting we i stap long hat blong yumi. Mo tu, hem i save gud ol samting we yumi mekem, mo from wanem yumi mekem. Olsem we King Deved i talem, Jehova i stap klosap long yumi oltaem blong lukaot gud long yumi mo givhan long yumi. ?Yu harem olsem wanem taem yu save se God Ya We i Gat Olgeta Paoa, mo we hem i Hae Masta blong heven mo wol we i wokem olgeta samting, i rili kea long yu? Maet yumi harem olsem Deved we i talem se: “Long mi, save ya i gud tumas. Hem i hae we i hae tumas, mi no save makem.”—Sam 139:​6, fut.

17. ?From wanem maet i had blong trastem se Jehova i save gud yumi?

¹⁷ Yumi gruap long ol famle we oli gat ol defdefren fasin, yumi kamaot long ol defdefren kalja, mo yumi gat ol defdefren bilif bifo. Taswe maet i had blong trastem se Jehova i wan Papa we i lavem yumi, mo i kea long yumi. O maet yumi harem se ol mastik blong yumi bifo oli nogud we oli nogud, mo yumi ting se Jehova i stap longwe long yumi, mo bambae hem i neva kam klosap long yumi. Samtaem Deved tu i harem olsem. (Sam 38:​18, 21) O maet wan man we i stap traehad blong jenisim laef blong hem blong mekem God i glad, i stap tingting se: ‘Sipos God i save gud mi, ?from wanem hem i askem long mi blong jenisim ol fasin we i had tumas long mi blong lego?’

18. ?From wanem yumi mas lanem blong trastem se Jehova i save gud yumi moa i bitim yumi wan? (Mo tu, yu luk ol pija.)

¹⁸ Yumi mas lanem blong trastem se Jehova i save gud yumi moa i bitim yumi wan, mo se hem i save gud ol gudfala fasin blong yumi we yumi no luk. Nating se Jehova i luk ol slak fasin blong yumi, be hem i kasemsave se yumi wantem mekem samting we i stret, mo hem i lavem yumi. (Rom 7:15) Taem yumi tingbaot se Jehova i stap luk ol gudfala fasin blong yumi, hemia bambae i mekem yumi glad mo yumi gat strong tingting blong mekem wok blong hem.

19. ?Yumi save wanem long saed blong Jehova?

¹⁹ Yumi save se Jehova hem i lav. Yumi sua gud long samting ya. (1 Jon 4:8) Yumi save se Jehova i givim ol loa blong hem long yumi from we hem i lavem yumi, mo hem i wantem se yumi gat wan gudfala laef. Yumi save se Jehova i wantem givim laef we i no save finis long yumi. Taswe hem i givim ransom blong mekem se yumi save kasem laef ya. Presen ya ransom i mekem yumi sua se yumi save mekem Jehova i glad, nating se yumi sinman. (Rom 7:​24, 25) Mo yumi save tu se “God i hae moa long hat blong yumi, mo hem i save evri samting.” (1 Jon 3:​19, 20) Yes, Jehova i save gud evri samting long saed blong yumi, mo hem i trastem yumi se yumi naf blong mekem samting we hem i wantem.

20. ?Wanem bambae i halpem yumi blong yumi no wari tumas long ol samting we yumi no save?

²⁰ Jehova i talemaot long yumi evri samting we yumi nid blong save. Taswe yumi no mas wari tumas long ol samting we yumi no save, be yumi mas tingbaot nomo ol samting we oli rili impoten. Sipos yumi mekem olsem, yumi soemaot se yumi gat tingting daon mo yumi trastem fulwan Jehova, “Man ya we save blong hem i stret gud.” (Job 36:4) I tru se naoia i gat plante samting we yumi no save, be long fiuja Jehova bambae i gohed olwe blong tijim yumi long plante niufala samting.—Pri. 3:11.