Yusum Gud Ol Refrens We i Lidim Yumi i Go Long Ol Narafala Vas

Long Baebol Long Niu Wol Translesen, i gat ol refrens we i lidim yumi i go long ol narafala vas we i givim moa save long yumi long saed blong wan vas, mo i soemaot se evri haf blong Baebol oli joen gud. Yu save faenem ol refrens ya long ol smol leta blong alfabet we oli stap klosap long ol toktok. Sipos yu yusum wan Baebol we oli printim, bambae yu luk ol semfala leta blong alfabet ya long lis we i stap long medel blong wanwan pej, mo klosap long ol leta blong alfabet ya i gat ol narafala vas blong Baebol we i joen wetem wan vas. Sipos yu yusum jw.org o JW Library^® app, yu save tajem ol smol leta ya blong alfabet blong luk ol narafala vas.

Ol refrens ya oli givhan long yumi blong faenem:

Ol vas we oli tokbaot sem stori: Yu save luk wan eksampol long 2 Samuel 24:1 mo 1 Kronikel 21:1.

Ol vas we oli talem sem toktok: Ol vas ya oli soemaot wetaem faswan taem we wan toktok i kamaot long Baebol. Yu save luk wan eksampol long Matiu 4:4 mo Dutronome 8:3.

Ol vas we oli soemaot olsem wanem wan profet tok i kamtru: Ol vas ya oli talem wetaem wan profet tok i kamtru. Yu save luk wan eksampol long Matiu 21:5 mo Sekaraea 9:9.