Tingbaot Blong Prea From Ol Narafala

1. ?Olsem wanem yumi save se ol prea blong yumi oli impoten long Jehova?

PREA i wan nambawan presen we Jehova i givim. Traem tingbaot: Jehova i givim plante wok long ol enjel. (Sam 91:11) Mo tu, hem i givim sam impoten wok long Boe blong hem. (Mat. 28:18) ?Be hem i givim wok ya blong lesin long ol prea long wan narafala man? Nogat. Hemia wan wok we Jehova hem wan i jusum blong mekem. Jehova we i “Man blong harem ol prea,” i wantem tumas blong harem ol prea blong yumi.—Sam 65:2.

2. ?Olsem wanem aposol Pol i soemaot wan gudfala eksampol blong prea from ol narafala?

² Nating se yumi save prea blong tokbaot ol filing blong yumi long Jehova, be yumi mas tingbaot blong prea from ol narafala tu. Hemia nao samting we aposol Pol i mekem. Eksampol, taem hem i raet i go long kongregesen long Efesas, hem i talem se: “Mi gohed blong tokbaot yufala long ol prea blong mi.” (Efes. 1:16) Pol i prea tu from ol man wanwan. Eksampol, hem i talem long Timoti se: “Mi mi talem tangkiu long God, . . . long dei mo long naet, taem mi stap krae i go long God, oltaem mi stap tingbaot yu.” (2 Tim. 1:3) Pol i gat plante wari long laef blong hem we hem i save prea from. (2 Kor. 11:23; 12:​7, 8) Be yet, hem i tekem taem tu blong prea from ol narafala.

3. ?From wanem samtaem yumi save foget blong prea from ol narafala?

³ Maet samtaem yumi foget blong prea from ol narafala. ?From wanem? Wan sista we nem blong hem Sabrinaa i tokbaot wan risen, i se: “Laef blong yumi i bisi tumas mo yumi fesem plante problem. Taswe taem yumi prea, i isi blong tingbaot yumi wan nomo.” ?Samtaem yu tu yu mekem olsem? Sipos yes, stadi ya bambae i halpem yu. Bambae yumi luk (1) from wanem i impoten blong prea from ol narafala mo (2) olsem wanem blong mekem.

?FROM WANEM YUMI MAS PREA FROM OL NARAFALA?

4-5. ?Olsem wanem ol prea blong yumi oli gat “paoa blong givhan” long ol narafala? (Jemes 5:16)

⁴ Taem yumi prea from ol narafala, hemia i “gat paoa blong givhan.” (Ridim Jemes 5:16.) ?Ol prea blong yumi oli rili save givhan long ol narafala? Yes. Jisas i save se aposol Pita bambae i talem se i no save hem, taswe hem i talem long Pita se: “Mi mi prea from yu finis, blong bilif blong yu i no foldaon.” (Luk 22:32) Pol tu i save se prea i gat paoa. Taem oli putum hem long kalabus long Rom, hem i raet i go long Filimon se: “Mi mi gat hop se ol prea blong yufala bambae i mekem se mi kambak long yufala.” (Film. 22) Mo hemia nao samting we i hapen. Oli letem Pol i go fri, nao hem i gohed blong prij bakegen.

⁵ I tru, hemia i no min se yumi save fosem Jehova blong mekem samting we yumi askem. Be taem yumi prea, hem i luk samting we yumi stap wari from, mo maet samtaem hem i jusum blong mekem wanem we yumi askem. Taem yumi tingbaot samting ya, bambae yumi gat strong tingting blong prea long Jehova, mo lego ol wari blong yumi i stap long han blong hem.—Sam 37:5; 2 Kor. 1:11.

6. Taem yumi prea from ol narafala, ?hemia i mekem se yumi gat wanem filing long olgeta? (1 Pita 3:8)

⁶ Taem yumi prea from ol narafala, hemia i tijim yumi blong gat “bigfala sore.” (Ridim 1 Pita 3:8.) Wan man we i gat sore i luksave we narafala i stap safa, mo i wantem tumas blong givhan long hem. (Mak 1:​40, 41) Wan elda we nem blong hem Michael i talem se: “Taem mi prea from nid blong ol narafala, mi kasemsave moa long ol problem we oli stap fesem, mo hemia i mekem se mi lavem olgeta moa. Mi harem olsem se mi kam klosap moa long olgeta, nating se oli no save.” Wan elda we nem blong hem Richard i talem wan narafala gudfala samting we i kamaot taem yumi prea from ol narafala, i se: “Taem yumi prea from wan man, hemia bambae i mekem se yumi wantem moa blong halpem hem. Mo taem yumi mekem wan samting blong givhan long hem, hemia i olsem we yumi stap givhan long Jehova blong mekem samting we yumi prea from i kamtru.”

7. Taem yumi prea from ol narafala, ?olsem wanem hemia i givhan long yumi? (Filipae 2:​3, 4) (Mo tu, yu luk ol pija.)

⁷ Taem yumi prea from ol narafala, hemia i givhan long yumi blong no tingbaot tumas ol trabol blong yumi. (Ridim Filipae 2:​3, 4.) Yumi evriwan i stap fesem ol hadtaem from we Setan nao i kontrolem wol. (1 Jon 5:19; Rev. 12:12) Taem yumi gat fasin ya blong prea from ol narafala, hemia i mekem yumi tingbaot oltaem se “olgeta brata blong [yumi] long fulwol we oli bilif, olgeta tu oli stap safa sem mak olsem [yumi].” (1 Pita 5:9) Wan paenia we nem blong hem Katherine i talem se: “Taem mi prea from ol narafala, hemia i mekem mi tingbaot se olgeta tu oli stap fesem ol hadtaem. Hemia i givhan long mi blong mi no tingbaot tumas ol trabol blong mi.”

OLI NIDIM WE YUMI PREA FROM OLGETA

8. ?Yumi save tingbaot hu long ol prea blong yumi?

⁸ ?Yumi save tingbaot hu long ol prea blong yumi? Yumi save prea from sam grup blong ol man, olsem olgeta we oli gat problem blong helt, ol yangfala long skul we ol narafala oli stap spolem olgeta o pulum olgeta blong mekem samting we i no stret, mo olgeta we oli stap safa from we oli kam olfala. Mo tu, yumi save prea from ol brata mo sista we ol famle blong olgeta o gavman i stap agensem olgeta. (Mat. 10:​18, 36; Wok 12:5) Sam long ol brata mo sista blong yumi oli mas lego haos blong olgeta, from i gat faet long ples blong olgeta. Ol narafala oli fesem ol disasta. Maet yumi no save gud ol brata mo sista ya, be taem yumi prea from olgeta, yumi soemaot se yumi stap folem tok blong Jisas we i se: “Yufala . . . i mas lavlavem yufala.”—Jon 13:34.

9. ?From wanem yumi mas prea from ol brata we oli stap lidim yumi mo from ol waef blong olgeta?

⁹ Yumi save prea tu from olgeta we oli stap lidim yumi long oganaesesen blong Jehova. Hemia i minim Hed Kampani mo ol helpa blong olgeta, ol Branj Komiti, ol ovasia long ol branj ofis, ol eria elda, ol elda, mo ol man blong givhan. Plante long ol brata ya oli gat ol wari blong olgeta, be yet oli stap wok had blong givhan long yumi. (2 Kor. 12:15) Eksampol, wan eria elda we nem blong hem Mark i talem se: “Wan samting we i had long mi, hemia se mi stap longwe long perens blong mi. Tufala i stap kam olfala mo tufala tugeta i gat ol problem blong helt. Nating se sista blong mi mo hasban blong hem i stap lukaot long tufala, be mi harem nogud from we mi no save mekem plante samting blong sapotem tufala.” Nating se yumi save ol wari blong ol gudfala brata ya o nogat, be i gud we yumi tingbaot olgeta long ol prea blong yumi. (1 Tes. 5:​12, 13) Yumi save prea tu from ol waef blong ol brata ya, from we oli wok had blong sapotem gud hasban blong olgeta long wok we oli stap mekem.

10-11. Taem yumi prea from wan grup blong ol brata mo sista, ?Jehova i glad blong lesin? Yu eksplenem.

¹⁰ Olsem we yumi jes tokbaot, plante taem yumi prea from wan grup blong ol brata mo sista. Eksampol, sipos yumi no save wan brata o sista we i stap long kalabus o i lusum wan famle long ded, be maet yumi save askem Jehova blong i givhan long olgeta. Wan elda we nem blong hem Donald i se: “I gat plante brata mo sista we oli stap fesem ol hadtaem, mo maet yumi no save prea from olgeta wanwan. Taswe samtaem yumi save prea from evri brata mo sista we oli stap safa.”

¹¹ ?Jehova i glad long ol prea olsem? !Yes! Yumi no save nid blong ol brata mo sista wanwan, taswe i stret nomo we yumi prea from olgeta evriwan. (Jon 17:20; Efes. 6:18) Ol prea olsem oli soemaot se yumi ‘lavem olgeta brata blong yumi we oli bilif.’—1 Pita 2:17.

TAEM YUMI PREA FROM OL MAN WANWAN

12. ?Olsem wanem fasin luksave bambae i givhan long yumi taem yumi stap prea from ol narafala?

¹² Gat fasin luksave. Yumi save prea tu from ol brata mo sista wanwan. ?I gat wan long kongregesen blong yu we i kasem wan strong sik? ?I gat wan yangfala we i harem nogud from ol fren blong hem long skul oli stap pulum hem blong mekem samting we i no stret? ?I gat wan papa o mama we hem wan nomo i stap traehad blong “stretem mo givim woning” long pikinini blong hem, “folem tingting blong Jehova”? (Efes. 6:4) Sipos yu traehad blong gat fasin luksave, bambae yu naf blong kasemsave filing blong ol brata mo sista, mo bambae yu wantem tumas blong prea from olgeta.b—Rom 12:15.

13. ?Yumi save mekem wanem blong prea from olgeta we yumi neva mitim olgeta?

¹³ Talem nem blong olgeta. Taem yumi prea, yumi save talem nem blong ol brata mo sista, nating se yumi neva mitim olgeta. Eksampol, traem tingbaot ol brata mo sista blong yumi we oli stap long kalabus long ol ples olsem Crimea, Eritrea, Rasia, mo Singapo. Long jw.org, yu save faenem nem blong olgeta we oli stap long kalabus.c Wan eria elda we nem blong hem Brian i talem se: “Mi faenem se taem mi raetemdaon nem blong wan long ol brata mo sista we i stap long kalabus, mo biaen mi talem nem blong hem long wan laod voes, hemia i givhan long mi blong tingbaot nem blong hem taem mi prea.”

14-15. ?Wanem i save givhan long yumi blong tingbaot wan stret samting blong prea from?

¹⁴ Tingbaot wan stret samting blong prea from. Michael, we yumi bin tokbaot finis, i talem se: “Taem mi ridim ol stori long jw.org we i tokbaot ol brata we oli kalabus, mi traem blong tingbaot se bambae mi mi harem olsem wanem sipos mi nao mi stap long kalabus. Mi save se bambae mi wari from waef blong mi, mo bambae mi wantem meksua se hem i gat samting we hem i nidim. Hemia i givhan long mi blong tingbaot wan stret samting we mi save askem, taem mi stap prea from ol brata we oli mared, we oli stap long kalabus.”—Hib. 13:​3, fut.

¹⁵ Taem yumi tingbaot laef blong ol brata mo sista long kalabus, hemia bambae i givhan long yumi blong tingbaot wan stret samting blong prea from. Eksampol, yumi save prea se ol gad blong kalabus bambae oli kaen long olgeta, mo se ol haeman bambae oli letem olgeta oli fri blong mekem wosip. (1 Tim. 2:​1, 2) Yumi save prea tu se eksampol blong olgeta bambae i leftemap tingting blong kongregesen blong olgeta, mo se ol man we oli no bilif tu bambae oli luk gudfala fasin blong olgeta, nao oli lesin long mesej blong yumi. (1 Pita 2:12) Yumi save mekem sem samting taem yumi prea from ol brata mo sista we oli stap fesem ol narafala trabol. Taem yumi gat fasin luksave, yumi talem nem blong ol brata mo sista long prea blong yumi, mo yumi tingbaot wan stret samting blong prea from, yumi soemaot se yumi “lavlavem” yumi mo yumi “fulap long fasin ya.”—1 Tes. 3:12.

STRET TINGTING WE YUMI MAS GAT TAEM YUMI PREA

16. ?Wanem stret tingting we yumi mas gat taem yumi prea? (Matiu 6:8)

¹⁶ Olsem we yumi bin luk, ol prea blong yumi oli save givhan long ol narafala. Be yumi mas gat stret tingting taem yumi prea. Taem yumi prea, yumi stap talemaot ol samting we Jehova i save finis, mo Jehova i no nidim we yumi talem long hem samting we hem i mas mekem. Jehova i save samting we ol man blong hem oli nidim bifo we oli askem. (Ridim Matiu 6:8.) Taswe, ?from wanem yumi mas prea from ol narafala? Antap long ol risen we yumi tokbaot finis, fasin ya blong prea from ol narafala i wan rod blong soemaot se yumi kea long olgeta. Lav nao i pulum yumi blong prea from ol narafala. Mo Jehova i glad tumas taem hem i luk we ol man blong hem oli folem fasin blong hem blong lavem narafala.

17-18. Taem yumi prea from ol narafala, ?hemia i soemaot wanem? Talem wan pijatok.

¹⁷ Sipos yumi prea be i no gat wan samting i jenis, yumi no mas harem nogud. Ol prea blong yumi oli soemaot se yumi lavem ol brata mo sista blong yumi, mo Jehova i tinghae long samting ya. Traem tingbaot pijatok ya: Long wan famle, i gat tu smol pikinini, wan boe mo wan gel. Smol boe ya i sik, nao sista blong hem i krae i go long papa blong tufala se: “!Papa plis! Yu givhan long brata blong mi. !Hem i sik tumas!” Papa ya i stap mekem sam samting finis blong lukaot gud long boe blong hem, from we hem i lavem hem. Nating se i olsem, hem i glad tumas taem hem i luk we smol gel blong hem i lavem mo i kea long brata blong hem, taswe hem i askem papa blong tufala blong i halpem brata blong hem.

¹⁸ Long sem fasin, Jehova i wantem se yumi kea long ol narafala mo yumi prea from olgeta. Taem yumi mekem olsem, yumi soemaot se yumi lavem olgeta, mo Jehova i tinghae long samting ya. (2 Tes. 1:3; Hib. 6:10) Mo tu, olsem we yumi bin tokbaot, ol prea blong yumi oli save givhan long olgeta. Taswe, i gud yumi tingbaot oltaem blong prea from ol narafala.